އިހަވަންދިއްޕޮޅުގައި ޓްރާންސްޝިޕްމަންޓު ބަނދަރެއް ތަރައްގީކުރުމުގެ ކުރިން އެތަނުގައި ޚިދުމަތް ފޯރުކޮށްދިނުމަށް ފެސިލިޓީއެއް (ޕޯޓު ސިޓީއެއް) ޤާއިމްކުރުމަށް ކުރަންޖެހޭ މުހިންމު ގިނަ މަސައްކަތްތަކެއް ކުރެވިފައިވާ ކަމަށާއި، މިހާރު ކުރެވެމުންދާ މަސައްކަތަކީ އެ ބަނދަރު ތަރައްގީކުރަން ފެށުމުގެ ކުރިން ޤާނޫނާއި ޤަވައިދުތަކަށް ގެންނަންޖެހޭ ބަދަލުތައް ގެނައުމުގެ މަސައްކަތްކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ. 

ފައްޔާޒު އެހެން ވިދާޅުވީ، އިހަވަންދިއްޕޮޅުގައި ޓްރާންސްޝިޕްމަންޓް ބަނދަރެއް ތަރައްގީކުރެވެންދެން އެ ސަރަހައްދުން ދަތުރުކުރާ އާގުބޯޓުފަހަރަށް ހިދުމަތްދިނުމަށްޓަކައި އިކޮނޮމިކް މިނިސްޓްރީން ތަންފީޒުކުރުމަށް ރައީސުލްޖުމްހޫރިއްޔާ ހަވާލުކުރައްވާފައިވާ މަސައްކަތްތައް ކުރިއަށް ގެންދިއުމަށްޓަކައި މިހާތަނަށް ކޮށްފައިވާ މަސައްކަތްތަކާބެހޭ މައުލޫމާތު ލިޔުމުން ހޯދުމަށް ހޯރަފުށީ ދާއިރާގެ މެމްބަރު އަހުމަދު ސަލީމް އެދިވަޑައިގަތުމުން، މެމްބަރުގެ ސުވާލަށް ލިޔުމުން ޖަވާބުދެއްވާ ފޮނުވި ސިޓީފުޅެއްގަ އެވެ. 

މެމްބަރުގެ ސުވާލަށް ޖަވާބުދެއްވަމުން ފައްޔާޒު ފޮނުވި ސިޓީފުޅުގައި ވަނީ އާގުބޯޓުފަހަރަށް ހިދުމަތްދިނުމަަށް ކުރަންޖެހޭ ކަންކަމާއި ގުޅޭ ގޮތުން ގިނަ މަސައްކަތްތަކެއް ކޮށްފައިވާކަމަށެވެ. 

އެގޮތުން ކަމާބެހޭ އިދާރާތަކާއެކު މަޝްވަރާތައް ކުރިއަށް ގެންގޮސް އެ ސަރަހައްދުގައި އެންމެ ފުރަތަމަ ހިދުމަތްތައް ފަށައިގަންނައިރު ކްރޫ ޗޭންޖާއި ޝިޕް ސަޕްލައިސް އަދި ބަންކަރިންއަށް އަމާޒުކުރުމަށް މަޝްވަރާކޮށްފައިވާ ކަމަށާއި، އެ ހިދުމަތްތައް ފަށައިގަތުމަށް މިހާރު އަމަލުކުރަމުންދާ ގަވާއިދުތަކަށް ގެންނަންޖެހޭ ބަދަލުތައް ދިރާސާކޮށް، އެ ގަވާއިދުތައް އިސްލާހުކުރުމުގެ މަސައްކަކުގެ ބޮޑުބައި ނިމިފައިވާ ކަމަށެވެ. 

ފައްޔާޒު ވިދާޅުވީ  އެ މަސައްކަތުގެ ތެރެއިން އެސްޓީއޯ އިން ބަންކަރިންގެ ހިދުމަތްތައް ފެށުމަށްޓަކައި ބައިނަލްއަގުވާމީ ތެޔޮ ކުންފުނިތަކާ މަޝްވަރާކޮށް އެކަމަށް ބޭނުންވާ އިންވެސްޓްމަންޓް ހޯދުމުގެ މަސައްކަތްވެސް އިކޮނޮމިކް މިނިސްޓްރީން ކުރަމުންދާ ކަމަށެވެ. 

އޭނާ ވިދާޅުވީ، އިހަވަންދިއްޕޮޅު ޕޯޓް ސިޓީގެ ކަންކަން އިންތިޒާމުވެ ތަރުތީބު ވެގެން އަންނައިރު، ކަމާބެހޭ ހިދުމަތްތަކަކީ ޕޯޓް ސިޓީގެ މަޝްރޫއުގެ ތެރެއިން ފޯރުކޮށްދެވޭނެ ހިދުމަތްތަކަކަށް ވެގެންދާނެ ކަމަށެވެ.

އެހެންކަމުން މި ސަރަހައްދުގެ އެހެން ރަށެއްގައި ޓްރާންސިޝަން އެރޭންޖްމަންޓްގެ ގޮތުގައި އިންވެސްޓްތަކެއް ކުރުމުގެ ބަދަލުގައި ސަރުކާރުގެ މިހާރުގެ އަމާޒަކީ އިހަވަންދިއްޕޮޅު ޕޯޓް ސީޓީގެ މަޝްރޫއު ފަށައިގަތުމަށް ބޭނުންވާނެ ބިން ހިއްކުމަށް އަވަހަށް ފަށައި އިހަވަންދިއްޕޮޅުގެ ސްޓްރީޓިޖިކް ލޮކޭޝަންގެ އެޑްވާންޓޭޖުގެ ތެރެއިން ދެވެން ފެށޭނެ ހިދުމަތްތައް ޕޯޓް ސިޓީގެ މަޝްރޫއުގެ ތެރެއިން ދެމެހެއްޓެނިވި އަދި ކޯސްޓް އިފެކްޓިވް ގޮތެއްގައި ދިނުމަށް ވީހާވެސް އަވަހަށް ފެށުންކަމަށް ފައްޔާޒު ވިދާޅުވި އެވެ.