އިނގުރައިދޫ ކައުންސިލްގެ ފުޓްސަލް ފިއެސްޓާ ގެ ގްރޫޕް ބީގައި ރޭ އެފްސީ ބްރަދާސްއާައި ވާދަކުރި މެޗު 6-3 ގެ ނަތީޖާއަކުން ކާމިޔާބުކޮށް ދަ ސްކޯޕިއަން އިން މުބާރާތުގެ ފެށުން ރަނގަޅުކޮށްފި އެވެ.

އިނގުރައިދޫ ފުޓްސެލް ދަނޑުގައި ރޭ ކުޅެވުނު މެޗު ކޮންމެ ހާފެއްގައި ދަ ސްކޯޕިއަން އިން ތިން ލަނޑު ކާމިޔާބުކުރިއިރު އެފްސީ ބްރަދާސް އިން ކާމިޔާބުކުރި ތިން ލަނޑުވެސް ފެނިގެންދިޔައީ މެޗުގެ ދެވަނަ ހާފުގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ދަ ސްކޯޕިއަން ޓީމުގެ މުހައްމަދު އިޔާދު އަލީ ހަތަރު ލަނޑު ކާމިޔާބު ކުރި އިރު އެޓީމުގެ އަނެއް ދެ ލަނޑު ކާމިޔާބުކޮށްދިނީ ސޮފްވާން އަލިމަނިކު އަދި އިބްރާހީމް ޝަފްރާޒް އެވެ. މި މެޗުގައި އެފްސީ ބްރަދާސްގެ  ނަސްރުﷲ މުހައްމަދު ދެ ލަނޑު ކާމިޔާބު ކުރި އިރު އެޓީމުގެ އަނެއް ލަނޑު ޖެހީ ހުސެއިން ޝަޚާއުއެވެ.

މި މެޗުގެ މޭން އޮފް ދަ މެޗަކަށް ހޮވުނީ މި މެޗުގައި ދަ ސްކޯޕިއަން ޓީމަށް ހަތަރު ލަނޑު ކާމިޔާބުކޮށްދިން މުހައްމަދު އިޔާދު އަލީ އެވެ. އިޔާދު އަކީ ނިމިދިޔަ ގޯލްޑަން ފުޓްސަލް ޗެލެންޖްގެ އެންމެ ގިނަ ލަނޑުޖެހި ކުޅުންތެރިޔާ އެވެ 

ރޭގެ މެޗުން ލިބުނު ތިން ޕޮއިންޓާއެކު ދަ ސްކޯޕިއަން މިވަގުތު އޮތީ ގްރޫޕް ބީގެ ދެވަނައިގައެވެ. މި ގުރޫޕްގެ އެއްވަނައިގައި މިވަގުތު އޮތީ ގުރޫޕްގެ ފުރަތަމަ މެޗުގައި ޕްރޯ ފުޓްސަލް ކުލަބް އަތުން 8-1 ގެ ނަތީޖާއަކުން މޮޅުވި ހަލަފް އެފްސީ އެވެ. މި ދެ ޓީމަށް ވެސް ތިން ޕޮއިންޓް ލިބިފައިވާއިރު ހަލަފް އެފްސީއަށް އެއްވަނަ ލިބެނީ ފައިދާ ގޯލުގެ ތަފާތުންނެވެ.

މިރޭ ވެސް މި މުބާރާތުގެ ދެ މެޗު ކުޅުމަށް ވަނީ ހަމަޖެހިފައެވެ. 21:30 ގައި ފަށާ ފުރަތަަމަ މެޗުގައި ބައްދަލުކުރާނީ ގްރޫޕް އޭގެ ސްޓްރީޓް ބްރަދާސް އާއި އެފްސީ ހެސަ ވާދައެވެ. އަދި 22:30 ގައި ފަށާ ދެވަަނަ މެޗުގައި ބައްދަލުކުރާނީ ގްރޫޕް ބީގެ ހަލަފް އެފްސީ އާއި ދަ ސްކޯޕިއަން އެވެ.