"އެހީ" ޖަމިއްޔާގެ ފަރާތުން ރަމަޟާން މަހާއި ގުޅިގެން ކުރިއަށްގެންދާ "އެހީ އިފްޠާރް" ސުފުރާއަށް ކާބޯތަކެތި ހަދިޔާކުރުމުގެ ފުރުޞަތު އަދިވެސް ހުޅުވާލެވިފައިވާކަމަށް އެޖަމިއްޔާއިން ބުނެއެވެ.

އެހީ ޖަމިއްޔާއިން ކުރިއަށް ގެންދާ އިފްޠާރު ޕްރޮގްރާމް މާލޭގެ އިތުރުން ރާއްޖޭގެ ބައެއް އެހެން ރަށްރަށުގައިވެސް ކުރިއަށްގެންދިއުމުގެ ފުރުސަތު ހުޅުވާލެވިފައި އޮތްކަމަށް އެޖަމިއްޔާއިން ބުނެފައިވެއެވެ.

ކޮންމެ ދުވަހަކު މިސްކިތްތަކުގަ އިފްތާރު ޕެކޭޖް  ބެހުމުގެ އިތުރުން ބޮޑު 3 މިސްކިތެއްގަ ގިނަ އަދަދެއްގެ މީހުންނަށް ބައިވެރި ވެވޭ ގޮތަށް ސުފުރާ އެޅުންވެސް ވެސް އެހީ ޖަމިއްޔާގެ އިފްޠާރް ޕްރޮގްރާމްގެ ދަށުން ކުރިއަށް ދެއެވެ. ހުޅުމާލެ ފޭސް ދޭއްގެ ވަގުތީ މިސްކިތް (އުސްމާން ބިން އައްފާން)ގެ ސުފުރާއަށް ދުވާލަކު 90 އަށް ވުރެ ގިނަ މީހުން ބައިވެރިވާ ކަމަށް އެޖަމިއްޔާއިން ހާމަކޮށްފައިވެއެވެ.

Advertisement

 މިކަމައި ގުޅޭ އިތުރު މައުލޫމާތު ބޭނުންނަމަ، 7803433 ނަމްބަރުން އެމައުލޫމާތު ލިބޭނެ ކަމަށާއި ތަކެތި ހަދިޔާ ކުރަން ބޭނުންވާ ނަމަ ހަމަ އެނަމްބަރަށް ގުޅައިގެން އެކަން ހަމަޖެހޭނެ ކަމަށްވެސް އެޖަމިއްޔާއިން ބުނެފައިވެއެވެ. ތަކެތި ހަދިޔާ ކުރުމުގެ އިތުރުން ފައިސާގެ އެހީތެރިކަން ފޯރުކޮށްދިނުމަށް ވެސް އެޖަމިއްޔާއިން ވަނީ ފުރުޞަތު ފަހި ކޮށްދީފައެވެ. އެގޮތުން ފައިސާއިން އެހީވާން ބޭނުންވާނަމަ އެޖަމިއްޔާގެ އެކައުންޓަށް ޓްރާންސްފަރ ކުރުމަށް ވަނީ ހުޅުވާލައިފައެވެ. 

ރޯދަ ވެރިޔަކަށް ރޯދަ ވިއްލާނެ ފަދަ ޞަދަޤާތް ކުރުން ނުވަތަ ރޯދަ ވީއްލުން ދިނުމަކީ އެކަމުގެ ޘަވާބާއި ދަރުމަ ހުރި ކަމަކެވެ.

މާތް ނަބިއްޔާ ޞައްލަﷲ ޢަލައިހި ވަސައްލަމްގެ ޙަދީޘް ބަސްފުޅެއްގައި ވަނީ (مَنْ فَطَّرَ صَائِمًا كَانَ لَهُ مِثْلُ أَجْرِهِ غَيْرَ أَنَّهُ لَا يَنْقُصُ مِنْ أَجْرِ الصَّائِمِ شَيْئًا ) "رواه الترمذي، 807 وقال هذا حديث حسن صحيح" މާނައީ: " ރޯދަވެރިޔަކަށް ރޯދަވީއްލުން ދީފި މީހަކަށް އެ ރޯދަވެރިޔާއަށް ލިބޭ ސަވާބާއި ދަރުމަ އެ ރޯދަވީއްލުން ދިން މީހާއަށް ވެސް ލިބޭ ހުއްޓެވެ. އެއީ އަނެކާގެ އަޖުރުން އެއްވެސް ބައެއް އުނިވުމެއް ނެތިއެވެ."

ފަސޭހަ ކަމާއިއެކު އަޖުރު ހޯދައިގަތުމަށް، ރޯދަ ވެރިންނަށް ރޯދަ ވީއްލުން ހަދިޔާ ކުރުމަށް އެހީ ޖަމިއްޔާއިން ހުޅުވާލައިފައި މިއޮތް ފުރުޞަތަކީ ރަމަޟާން މަހު އޭގެ ބޭނުން ހިފުމަށް ރަނގަޅު ފުރުސަތެކެވެ.