އިނގުރައިދޫ ކައުންސިލް ފުޓްސަލް ފިއެސްޓާގައި ރޭ ކުޅެވުނު ފުރަތަަމަ މެޗުގައި އެފްސީ ހެސަ ވާދަ 4-1 ގެ ނަތީޖާއަކުން ބަލިކޮށް މުބާރާތުގެ ސެމީފައިނަލްގެ ފުރުސަތު ސްޓްރީޓް ބްރަދާސް އިން ބޮޑުކޮށްފި އެވެ.

ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގައި ފުރަތަަމަ ލަނޑުޖަހައި ކުރިހޯދީ އެފްސީ ހެސަ ވާދަ އިންނެވެ. މި ލަނޑު އެޓީމަށް ކާމިޔާބުކޮށްދިނީ ފުރަތަމަ މެޗުގައި ޔޯ ބުރު އެފްސީ ކޮޅަށް ހަތަރު ލަނޑުޖެހި މަމްދޫހު އެވެ.

އެފްސީ ހެސަ ވާދައިގެ ލަނޑަށްފަހު ސްޓްރީޓް ބްރަދާސް އިން ވަނީ ފުރަތަަމަ ހާފު ނިމުމުގެ ކުރިން ގާތްގާތުގައި ދެ ލަނޑު ކާމިޔާބުކޮށް މެޗުގެ ލީޑު ނަގާފައެވެ. އެޓީމު ފުރަތަަމަ ލަނޑު އައިހަމް ކާމިޔާބުކޮށްދިން އިރު ދެވަނަ ލަނޑު ކާމިޔާބުކޮށްދިނީ މުހައްމަދު އިސާމް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ނަތީޖާއަކުން ސްޓްރީޓް ބްރަދާސް ކުރީގައި އޮވެގެންނެވެ.

ދެވަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި ސްޓްރީޓް ބްރަދާސް އިން ވަނީ އިތުރު ދެ ލަނޑު ކާމިޔާބުކޮށްފައެވެ. މި ދެލަނޑު ވެސް އެޓީމަށް ކާމިޔާބުކޮށްދިނީ މެޗުގެ މޮޅު ކުޅުންތެރިޔަކަށް ހޮވުނު އައިހަމް އެވެ. 

މިރޭގެ މެޗުން ލިބުނު ތިން ޕޮއިންޓާއެކު ދެ މެޗުން ސްޓްރީޓް ބްރަދާސްއަށް ވަނީ ހަ ޕޮއިންޓް ލިބިފައެވެ. ގްރޫޕް އޭގެ އެއްވަނައިގައި އެޓީމު މިވަގުތު އޮތް އިރު މި މެޗުން ބަލިވި އެފްސީ ހެސަ ވާދައަށް ދެ މެޗުން ލިބިފައިވަނީ ތިން ޕޮއިންޓެވެ. 

މިރޭ ވެސް މި މުބާރާތުގެ ދެ މެޗު ކުޅުމަށް ހަމަޖެހިފައި ވާއިރު 21:30 ގައި ކުޅޭ ފުރަތަަމަ މެޗުގައި ބައްދަލުކުރާނީ ގްރޫޕް ބީގެ ޕްރޯ ފުޓްސަލް ކުލަބާއި އެފްސީ ބްރަދާސް އެވެ. އަދި 22:30 ގައި ކުޅޭ ދެވަަނަ މެޗުގައި ބައްދަލުކުރާނީ ގްރޫޕް އޭގެ ލަނޑާއި ޔޯ ބުރު އެފްސީ އެވެ.