އިނގުރައިދޫ ކައުންސިލް ފުޓްސަލް ފިއެސްޓާގައި ރޭ ކުޅެވުނު ދެވަނަ މެޗުގައި ދަ ސްކޯޕިއަން 7-4 ގެ ނަތީޖާއަކުން ބަލިކޮށް ގުރޫޕް ބީގެ އެއްވަނަ މަގާމު ހަލަފް އެފްސީ އިން ހޯދައިފި އެވެ.

ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔަ މިމެޗުގެ ފުރަތަަމަ ހާފު ނިމުނުއިރު 2-1 ގެ ނަތީޖާއަކުން ކުރީގައި އޮތީ ހަލަފް އެފްސީ އެވެ. މެޗުގެ ދެވަނަ ހާފުގައި ދެޓީމުގެ ފަރާތުން ގިނަ ލަނޑުތަކެއް ވަނީ ފެނިގެން ގޮސްފައެވެ.  ދެވަނަ ހާފުގައި ހަލަފް އެފްސީ އިން ފަސް ލަނޑު ކާމިޔާބު ކުރި އިރު، ދަ ސްކޯޕިއަން އިން ވަނީ ތިން ލަނޑު ކާމިޔާބުކޮށްފައެވެ.

މި މެޗުގައި ހަލަފް އެފްސީގެ އަލީ ހާފިޒް، އަލީ ފާތިހް އަދި ނާޖިހް މުހައްމަދު މިއިން ކޮންމެ ކުޅުންތެރިއެއް ދެ ލަނޑު ކާމިޔާބުކޮށްދިން އިރު އެޓީމުގެ އަނެއް ލަނޑު ކާމިޔާބުކޮށްދިނީ އަބްދުލް މުހައިމިން އަސްލަމެވެ.

ދަ ސްކޯޕިއަންގެ މުހައްމަދު އިޔާދު އަލީ މި މެޗުގައި ތިން ލަނޑު ކާމިޔާބުކޮށް ހެޓްރިކް ހެދިއިރު އެޓީމުގެ އަނެއް ލަނޑު ކާމިޔާބުކޮށްދިނީ އިބްރާހިމް ޝަފްރާޒްއެވެ. މި މެޗުގެ މޮޅުކުޅުންތެރިއަކަށް ހޮވުނީ ހަލަފް އެފްސީގެ އަލީ ހާފިޒް އެވެ.

މި މެޗުން ލިބުނު ތިން ޕޮއިންޓާއެކު ދެ މެޗުން ހަ ޕޮއިންޓް ހަމަކޮށް ގުރޫޕް ބީގެ އެއްވަނައިގައި މިވަގުތު އޮތީ ހަލަފް އެފްސީ އެވެ. މި މެޗުން ބަލިވި ދަ ސްކޯޕިއަންއަށް ދެ މެޗުން ތިން ޕޮއިންޓް ލިބިފައިވާއިރު މިވަގުތު އެޓީމު އޮތީ ގްރޫޕް ބީގެ ދެވަނައިގައެވެ.

މިރޭ ވެސް މި މުބާރާތުގެ ދެ މެޗު ކުޅުމަށް ހަމަޖެހިފައި ވާއިރު 21:30 ގައި ކުޅޭ ފުރަތަަމަ މެޗުގައި ބައްދަލުކުރާނީ ގްރޫޕް ބީގެ ޕްރޯ ފުޓްސަލް ކުލަބާއި އެފްސީ ބްރަދާސް އެވެ. އަދި 22:30 ގައި ކުޅޭ ދެވަަނަ މެޗުގައި ބައްދަލުކުރާނީ ގްރޫޕް އޭގެ ލަނޑާއި ޔޯ ބުރު އެފްސީ އެވެ.