ޔޫރޯ ކޮލިފައިން ގްރޫޕް އޭގައި އަމިއްލަ ދަނޑުގައި ވަރުގަދަ ސްޕެއިން 2-0 ގެ ނަތީޖާއަކުން ބަލިކޮށް ސްކޮޓްލޭންޑް އިން ގުރޫޕްގެ ދެވަނައިގައި ހަމަޖެހިލައިފި އެވެ.

މިރޭގެ މެޗަކީ 1984 ވަނަ އަހަރުގެ ފަހުން ސްކޮޓްލޭންޑަށް ސްޕެއިންގެ މައްޗަށް ކުރި ހޯދުނު ފުރަތަމަ ފަހަރެވެ. އަދި މި ދެޓީމު އެންމެ ފަހުން ވާދަކޮށްފައިވަނީ 2011 ވަނަ އަހަރު އެވެ. އެ މެޗު 3-1 ގެ ނަތީޖާއަކުން ކާމިޔާބުކުރީ ސްޕެއިން އެވެ.

މިރޭގެ މެޗުގައި ސްކޮޓްލޭންޑް އިން ކާމިޔާބުކުރި ދެ ލަނޑުވެސް ކާމިޔާބުކޮށްދިން މެންޗެސްޓަރ ޔުނައިޓެޑް މިޑްފީލްޑަރު ސްކޮޓް މެކް ޓޮމިނޭ އެވެ. އެޓީމު ފުރަތަަމަ ލަނޑު ފުރަތަަމަ ހާފުގެ 7 ވަނަ މިނެޓުގައި އޭނާ ކާމިޔާބުކޮށްދިނީ އެންޑްރޫ ރޮބަޓްސަން ތަނަވަސްކޮށްދިން ފުރުސަތެއްގައެވެ.

ދެވަަނަ ހާފު ފެށިގެން ހަވަނަ މިނެޓުގައި ސްޕެއިންގެ ޕެނަލްޓީ އޭރިއާ ބޭރުން ލިބުނު ފުރުސަތެއްގައި ސްކޮޓްލޭންޑްގެ ދެވަނަ ލަނޑު މެކް ޓޮމިނޭ ކާމިޔާބުކޮށްދިން އިރު ޔޫރޯ ކޮލިފައިންގައި މި ހަފްތާގައި ސައިފްރަސް އާއި ދެކޮޅަށް ކުޅުނު މެޗުގައި ވެސް އޭނާ ވަނީ ދެ ލަނޑު ކާމިޔާބުކޮށްފައެވެ.

މިރޭގެ މެޗުން ލިބުނު ތިން ޕޮއިންޓާއެކު ގްރޫޕް އޭގެ އެއްވަނައިގައި ސްކޮޓްލޭންޑް އޮތީ ދެ މެޗުން ލިބުނު ހަ ޕޮއިންޓާއި އެކުގައެވެ. މި މެޗުން ބަލިވި ސްޕެއިންއަށް ދެ މެޗުން ލިބުނު ތިން ޕޮއިންޓާއެކު އެޓީމު އޮތީ ގްރޫޕްގެ ދެވަނައިގައެވެ.