ސްކޫލުތަކުގައި މޫނުބުރުގާ އަޅަން އެދޭ އަންހެން ދަރިވަރުން އެ ޙައްޤުން މަޙްރޫމު ނުކުރުމަށް ރާއްޖޭގެ ދީނީ ޢިލްމުވެރިންގެ އެންމެ ބޮޑު އިއްތިޙާދުން ގޮވާލައިފިއެވެ.

ދީނީ ޢިލްމުވެރިން މިފަދައިން ގޮވާލާފައިވަނީ ޢަރައްބިއްޔާ ސްކޫލުގައި މޫނުބުރުގާ އަޅައިގެން ތަޢުލީމު ޙާޞިލު ކުރަމުންދާ އަންހެން ދަރިވަރުންގެ މޫނުބުރުގާ ނަގަން އެ ސްކޫލުގެ މެނޭޖުމަންޓުން މަޖުބޫރު ކުރަމުންދާ މައްސަލައާ ގުޅިގެނެވެ.

140 އަށް ވުރެ ގިނަ ދީނީ ޢިލްމުވެރިން ހިމެނިވަޑައިގަންނަވާ ޢިލްމުވެރިންގެ ގުޅުމުން ނެރުއްވާފައިވާ ބަޔާނުގައި ވިދާޅުވެފައިވަނީ، ޢަރަބިއްޔާ ސްކޫލުގެ މެނޭޖުމަންޓުގެ އެނިންމުމާ މެދު ރާއްޖޭގެ ދީނީ ޢިލްމުވެރިންގެ ހައިސިއްޔަތުން ވަރަށް ބޮޑަށް ކަންބޮޑުވެ ވަޑައިގަންނަވާ ކަމުގައެވެ.

Advertisement

އަދި މޫނުބުރުގާ އަކީ އިސްލާމް ދީނުގައި ޝަރުޢުވެގެންވާ ކަމެއް ކަމާމެދުގައި ޞަޙާބީންގެ ޒަމާނުން ފެށިގެން އޭގެ ފަހުން ވަޑައިގެންނެވި ޢިލްމުވެރިންގެ މެދުގައި އެއްވެސް ޚިލާފެއް ނުވާ ކަމުގައެވެ. އަދި އެއީ ރާއްޖޭގެ ޤާނޫނުގައި މަރުޖިޢު ދީފަފައިވާ ހަތަރު މަޒުހަބުގައި ވެސް އެއީ އިއްތިފާގުވެފައިވާ ކަމެއް ކަމުގައެވެ.

ބަޔާނުގައި އިތުރަށް ބަޔާންކޮށްފައިވާ ގޮތުގައި، މޫނުބުރުގާ އެޅުމުގައި ޢިލްމުވެރިންގެ މެދުގައި ހަމައެކަނި އޮތް އިޚްތިލާފެއް އޮތީ އެއީ ވާޖިބެއް ތޯ ނުވަތަ ނޫންތޯއާ މެދުގައެވެ. އަދި ފިތުނަވެރިކަމާއި ފާޙިޝްކަންކަން ފެތުރިފައިވާ މުޖުތަމައުއެއްގައި އުޅޭ ނަމަ އަންހެނާގެ މޫނު ނިވާކުރަން ޖެހޭކަމަށް ސުންނަތް ޖަމާއަތުގެ ހަތަރު މަޒްހަބުގެ ޢިލްމުވެރިން ވެސް ދެކިލަށްވާ ކަމުގައިވެސް ބަޔާނުގައި ވެއެވެ.

އޭގެ އިތުރުން، ޢިލްމުވެރިންގެ ގުޅުމުން ވިދާޅުވެފައިވަނީ، މޫނުބުރުގާ އެޅުން ވާޖިބެއް ކަމުގައި ދެކިގެން އެއަޅާ މީހުންގެ ނިންމުމަށް ކޮންމެ މުސްލިމަކު ވެސް އިޙްތިރާމު ކުރުން ލާޒިމްވެގެންވާ ކަމުގައެވެ. އަދި މޫނުބުރުގާއަކީ އިޚްތިލާފީ މައްސަލައެއް ކަމުގައި ބުނެ މޫނު އަޅާ މީހުންގެ މޫނުބުރުގާ ނެގުމަށް މަޖުބޫރު ކޮށްގެން އެޙައްޤު ނިގުޅައިގަނެގެން ނުވާނެ ކަމުގައެވެ.

ހަމައެއާއެކު ރާއްޖޭގެ ހުރިހާ މުއައްސަސާއެއްގައި ވެސް މޫނުބުރުގާ އަޅަން ބޭނުން މީހުންނަށް އެކަމުގެ އިޙްތިޔާރު އެތަނެއްގެ ޔުނީފޯމުކޯޑުގައި ލިބިދޭންވާނެ ކަމަށް ވެސް ޢިލްމުވެރިންގެ ގުޅުމުން ގޮވާލާފައިވެއެވެ.

ބަޔާން ނިންމާލަމުން ޢިލްމުވެރިންގެ ފަރާތުން ސަރުކާރަށް އިލްތިމާސް ކުރައްވާފައިވަނީ، ސްކޫލުތަކުގެ ޔުނީފޯމްކޯޑު ކަނޑައަޅާއިރު ނިވާކަން ކުޑަ ހެދުން ލުމަށާއި، ދެ ޖިންސުގެ ދަރުވަރުން ވަކި ނުވާ މިންވަރަށް ދެ ޖިންސުގެ ޔުނީފޯމުތައް އެއްގޮތް ވިޔަ ނުދިނުމަށް ކޮށްފައިވާ އިލްތިމާސަކުންނެވެ.

މޫނުބުރުގާގެ މައްސަލަ އަނެއްކާވެސް ސަމާލުކަމަށް އައިސްފައިމިވަނީ ޢަރަބިއްޔާ ސްކޫލްގައި ކިޔަވަމުން އަންނަ ބައެއް އަންހެން ދަރިވަރުން ސްކޫލަށް ހާޒިރުވާއިރު މޫނު ބުރުގާ އަޅައިގެން ހާޒިރުވުން މަނާކޮށް މޫނު ބުރުގާ އަޅައިގެން ސްކޫލަށް ހާޒިރުނުވުމަށާއި، މޫނުބުރުގާ އަޅައިފައި ތިބޭ ދަރިވަރުންނާއި އެދަރިވަރުންގެ ބެލެނިވެރިން ސްކޫލްގެ އޮފީހަށް ހާޒިރުކުރާ ކަމަށް ބުނާ މައްސަލައަކާއި ގުޅިގެނެވެ.

ބައެއް ބެލެނިވެރިން ފަރާތުން ޚަބަރު ލިބިފައިވާ ގޮތުގައި އެސްކޫލުގައި މޫނުއަޅާ ކުދިންނަށް އަންނަނީ ނަފްސާނީ ގޮތުން ބިރު ދައްކަމުންނެވެ. އެގޮތުން މޫނު އަޅާ ދަރިވަރުން ކުލާހުން ނެރެގެން ގެންގޮސް އެކުދިންނަށް ބިރު ދައްކާ ކަމަށާއި މޫނު ނަގައިގެން ނޫނީ ސްކޫލަށް އައިސްގެން ނުވާނެ ކަމަށް ބުނާކަމަށް ބެލެނިވެރިން ދަނީ ބުނަމުންނެވެ.