އިނގުރައިދޫ ކައުންސިލް ފުޓްސަލް ފިއެސްޓާގައި މިރޭ ކުޅެވުނު ފުރަތަމަ މެޗުގައި ގްރޫޕް ބީގެ ޕްރޯ ފުޓްސަލް ކުލަބާއި އެފްސީ ބްރަދާސް ވާދަކުރި މެޗު 5-2 ގެ ނަތީޖާއަކުން ކާމިޔާބުކޮށް އެފްސީ ބްރަދާސްއިން ސެމީ ފައިނަލުގެ އުންމީދު ދަމަހައްޓައިފި އެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ކުރިހޯދީ ޕްރޯ ފުޓްސަލް ކުލަބުންނެވެ. ނަމަވެސް ފުރަތަމަ ހާފު ނިމުމުގެ ކުރިން އެފްސީ ބްރަދާސް އިން ދެ ލަނޑު ކާމިޔާބުކޮށް މެޗުގެ ލީޑު ހޯދިއެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔަ އިރު މިހާފުގައި އެފްސީ ބްރަދާސް އިން އިތުރު ތިން ލަނޑު ކާމިޔާބުކުރިއިރު ޕްރޯ ފުޓްސަލް ކުލަބަށް ކާމިޔާބު ކުރެވުނީ އެންމެ ލަނޑެކެވެ.

މި މެޗުގައި އެފްސީ ބްރަދާސްގެ ނަސްރުﷲ މުހައްމަދު ދެ ލަނޑު ކާމިޔާބުކޮށްދިން އިރު، އެޓީމުގެ އަހުމަދު ޝަރީފް، ހުސައިން ޝަޚާއުގެ އިތުރުން އަހުމަދު އަބޫބަކުރު މިއިން ކޮންމެ ކުޅުންތެރިއަކު ވަނީ އެއް ލަނޑު ކާމިޔާބުކޮށްފައެވެ.

ޕްރޯ ފުޓްސަލް ކުލަބުން މި މެޗުގައި ކާމިޔާބުކުރި ދެ ލަނޑު ކާމިޔާބުކޮށްދިނީ ޙަސަން ރިޒާން އަދި މުހައްމަދު ނާއިމްއެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ އެފްސީ ބްރަދާސްއަށް މި މެޗުގައި ދެ ލަނޑު ކާމިޔާބުކޮށްދިން ނަސްރުﷲ މުހައްމަދު އެވެ.

މިރޭގެ މެޗުން ލިބުނު ތިން ޕޮއިންޓާއެކު އެފްސީ ބްރަދާސްއަށް ދެ މެޗުން ތިން ޕޮއިންޓް ލިބިފައިވާއިރު، މި ގުރޫޕްގެ އެއްވަނައިގައި އޮތީ 6 ޕޮއިންޓާއެކު ހަލަފް އެފްސީ އެވެ. ދެވަނައިގައި އޮތް ދަ ސްކޯޕިއަންއަށް ވެސް ދެ މެޗުން ތިން ޕޮއިންޓް ލިބިފައިވާއިރު ގްރޫޕްގެ ފަހު މެޗުގައި މި މަހުގެ 31 ވަނަ ދުވަހުގެރޭ އެޓީމު ނުކުންނާނީ ޕްރޯ ފުޓްސަލް ކުލަބާއި ދެކޮޅަށެވެ.

މި ގްރޫޕްގެ ކޮންމެ ޓީމެއް މިހާތަނަށް ދެމެޗު ކުޅެފައިވާއިރު ޕޮއިންޓެއް ނުލިބި ގުރޫޕް ފުލުގައި އޮތީ ޕްރޯ ފުޓްސަލް ކުލަބެވެ. 

މި މުބާރާތުގައި މާދަމާރޭ ވެސް ދެ މެޗު ކުޅުމަށް ވަނީ ހަމަޖެހިފައެވެ. މިގޮތުން 21:30 ގައި ފަށާ ފުރަތަަމަ މެޗުގައި ބައްދަލުކުރާނީ ގްރޫޕް އޭގެ ސްޓްރީޓް ބްރަދާސް އާއި ޔޯ ބުރު އެފްސީ އެވެ. އަދި މާދަމާރޭ 22:30 ގައި ކުޅެވޭ ދެވަަނަ މެޗުގައި ގްރޫޕް ބީގެ އެފްސީ ބްރަދާސް ނުކުންނާނީ އެގްރޫޕްގެ އެއްވަނައިގައި އޮތް ހަލަފް އެފްސީއާއި ދެކޮޅަށެވެ.