އިނގުރައިދޫ ކައުންސިލް ފުޓްސަލް ފިއެސްޓާގައި މިރޭގެ ކުޅެވުނު ދެވަނަ މެޗުގައި ގްރޫޕް އޭގެ ޔޯ ބުރު އެފްސީ އާއި ލަނޑާ ވާދަކުރި މެޗު 4-0 ގެ ނަތީޖާއަކުން ކާމިޔާބުކޮށް ލަނޑާއިން މުބާރާތުގެ ފުރަތަަމަ ތިން ޕޮއިންޓް ހޯދައިފިއެވެ.

މިރޭގެ މެޗުގެ ފުރަތަަމަ ހާފުގައި ލަނޑާއިން ތިން ލަނޑުގެ ލީޑެއް ނެގިއިރު ފުރަތަމަ ހާފުގައި ޔޯ ބުރު އެފްސީއަށް އެކަށީގެންވާ ކުޅުމެއް ދެއްކޭގޮތެއްނުވި އެވެ. ނަމަވެސް މެޗުގެ ދެވަނަ ހާފުގައި އެޓީމުން ވަނީ ކުޅުން ރަނގަޅުކޮށް ލަނޑާގެ އެޓޭކްތައް ހުއްޓުވުމުގައި ރަގަޅު ޑިފެންސިވް ކުޅުމެއް ދައްކައިދީފައެވެ. 

މެޗުގެ ދެވަނަ ހާފުގައި ލަނޑާއިން އިތުރު ލަނޑެއް ކާމިޔާބުކުރި އިރު، މި މެޗުގައި އެޓީމުގެ އަލީ ޝާފިއު ވަނީ ދެލަނޑު ކާމިޔާބުކޮށްފަ އެވެ. އެޓީމުގެ އަނެއް ދެ ލަނޑު ކާމިޔާބުކޮށްދިނީ ޖަނާހު އަބްދުއްރަހުމާން އާއި މުހައްމަދު ވަޖީހު އެވެ. އަދި މި މެޗުގެ މޭން އޮފް ދަ މެޗަކަށް ހޮވިފައިވަނީ ލަނޑާ ޓީމަށް މި މެޗުގައި ދެ ލަނޑު ކާމިޔާބުކޮށްދިން އަލީ ޝާފިއު އެވެ.

މިރޭގެ މެޗުގެ ނަތީޖާއާއެކު މިގުރޫޕްގެ އެއްވަނައިގައި އޮތް ސްޓްރީޓް ބްރަދާސްއަށް މުބާރާތުގެ ސެމީ ފައިނަލުގެ ޖާގައެއް ވަނީ ކަށަވަރުވެފައެވެ. އަދި ގުރޫޕް އޭގައި ކޮންމެ ޓީމެއް ދެ މެޗު ކުޅެފައިވާއިރު ދެ މެޗުން ވެސް ބަލިވެ ބާކީ އެއް މެޗު އޮއްވައި ޔޯ ބުރު އެފްސީ ވަނީ މުބާރާތުން ކަޓާފައެވެ.

އެފްސީ ހެސަ ވާދަ އާއި ލަނޑާއަށް ވެސް ދެ މެޗު ކުޅެގެން ތިން ޕޮއިންޓް ލިބިފައިވާއިރު މި ގުރޫޕުން ސެމީގެ ފަހުޖާގަ ލިބިގެންދާނީ މުބާރާތުގެ ގްރޫޕް ސްޓޭޖުން ފަހު މެޗުގައި މި މަހުގެ 31 ވަނަ ދުވަހުގެ ރޭ މިދެޓީމު ވާދަކުރާ މެޗުން މޮޅުވާ ޓީމަކަށެވެ. އެ މެޗު އެއްވަރު ވެއްޖެ ނަމަ ލަނޑުގެ ތަފާތުން ކުރި ލިބެނީ އެފްސީ ހެސަ ވާދައަށެވެ.

މި މުބާރާތުގައި މާދަމާރޭ ވެސް ދެ މެޗު ކުޅުމަށް ވަނީ ހަމަޖެހިފައެވެ. މިގޮތުން 21:30 ގައި ފަށާ ފުރަތަަމަ މެޗުގައި ބައްދަލުކުރާނީ ގްރޫޕް އޭގެ ސްޓްރީޓް ބްރަދާސް އާއި ޔޯ ބުރު އެފްސީ އެވެ. އަދި މާދަމާރޭ 22:30 ގައި ކުޅެވޭ ދެވަަނަ މެޗުގައި ގްރޫޕް ބީގެ އެފްސީ ބްރަދާސް ނުކުންނާނީ އެގްރޫޕްގެ އެއްވަނައިގައި އޮތް ހަލަފް އެފްސީއާއި ދެކޮޅަށެވެ.