އިޒްރާއިލްގެ މިލިޓަރީ އިން ސީރިޔާގެ ދަމަސްކުސް އަށް މިސައިލް ހަމަލާއެއް ދީފިއެވެ.

އިޒްރާއިލްގެ މިލިޓަރީ އިން ދިން މިހަމަލާގައި ސީރިޔާގެ ސިފައިންގެ ދެ މީހަކު ވަނީ ޒަހަމްވެފައެވެ.

ރޭ ދަންވަރު 1:20 ހާއިރު ދިން މިހަމަލާތަކުގެ ސަބަބުން ސިރިޔާގެ ސިފައިންގެ ދެމީހަކު ޒަހަމްވުމުގެ އިތުރުން ބައެއް އިތުރު ގެއްލުންތައްވެސް ލިބިފައިވާކަމަށް ސީރިޔާގެ ޑިފެންސް މިނިސްޓްރީ އިން ވަނީ ބުނެފައެވެ.

Advertisement

އިޒްރާއިލްގެ މިލިޓަރީ އިން ދަމަސްކަސްއަށް ފޮނުވާލި ބައެއް މިސައިލްތައް ސީރިޔާގެ ސިފައިން ވައްޓާލައިފައިވާ ކަމަށްވެސް ސީރިޔާގެ ޑިފެންސް މިނިސްޓްރީ އިން ވަނީ ބުނެފައެވެ.

ސީރިޔާގެ ސަރުކާރުގެ ބާރުގެ ދަށުގައި އޮތް ސަރަހައްދުތަކަށް ފާއިތުވި އަހަރުތަކުގެ ތެރޭގައި ވެސް އިޒްރާއިލުން މިސައިލް ހަމަލާތައް ވަނީ ދީފައެވެ. އޭގެ ތެރޭގައި ފާއިތުވިމަހު ހަލަބް އެއަރޕޯޓަށް ދެފަހަރު މަތިން ދިން ހަމަލާތައް ފާހަގަ ކޮށްލަން ޖެހެއެވެ.

އިޒްރާއިލުން ހަލަބްގެ އެއަރޕޯޓަށް ހަމަލާދިން އިރު އެ އެއަރޕޯޓަކީ ފެބްރުއަރީ 6ގައި އައި ބިންހެލުންތަކުގައި ހާލުގައި ޖެހުނު ސީރިޔާގެ ނިކަމެތި ރައްޔިތުނަށް ބޭނުންތެރި އެހީތައް ފޯރުކޮށްދިނުމސް ހުޅުވިފައި އޮތް ދޮރޯއްޓެވެ.

އިޒްރާއިލްގެ މިލިޓަރީ އިން ދިން ހަމަލާތަކުގެ ސަބަބުން ހަލަބް އެއަރޕޯޓަށް އެހީ ހިފައިގެން ޖައްސަން ދިޔަ ބޯޓުތައް ޑައިވާޓް ކުރަން ޖެހުމުގެ ސަބަބުން ހާލުގައި ޖެހިފައިތިބި ފަރާތްތަކަށް އެހީ ފޯރުކޮށްދެވުނު ލެއް ވަރަށް ބޮޑަށް ލަސްވެގެން ވެސް ދިޔައެވެ.