އިނގުރައިދޫ ކައުންސިލްގެ ފުޓްސަލް ފިއެސްޓާގައި މިރޭގެ ގުރޫޕް އޭގައި 7-3 ގެ ނަތީޖާއަކުން ޔޯ ބުރު އެފްސީ ބަލިކޮށް ގުރޫޕްގެ އެއްވަނަ ޓީމުގެ ގޮތުގައި ސްޓްރީޓް ބްރަދާސް އިން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

މިރޭގެ މެޗުގެ ފުރަތަަމަ ހާފުގައި ސްޓްރީޓް ބްރަދާސް އިން ތިން ލަނޑުގެ ލީޑެއް ނެގިއިރު، މެޗުގެ ދެވަނަ ހާފުގައި އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ.

މި މުބާރާތުގައި ކުރިން ކުޅުނު ދެ މެޗުގައި ވެސް ލަނޑެއް ކާމިޔާބުކުރެވިފައި ނުވާ ޔޯ ބުރު އެފްސީ އިން މިރޭގެ މެޗުގެ ދެވަަނަ ހާފުގައި، މުބާރާތުގެ އެންމެ ވަރުގަދަ އެއްޓީމުކޮޅަށް ވަނީ ތިން ލަނޑު ޖަހާފައެވެ.

ދެވަނަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިރޭގެ މެޗުގައި ސްޓްރީޓް ބްރަދާސްގެ އަހުމަދު އައިހަމް ވަނީ އެޓީމަށް ހަތަރު ލަނޑު ކާމިޔާބުކޮށްދީފައެވެ. އަދި އެޓީމުގެ އިސްލާމީ ޝައިހާން ދެ ލަނޑު ކާމިޔާބުކޮށްދިންއިރު އެޓީމުގެ އަނެއް ލަނޑު ކާމިޔާބުކޮށްދިނީ ހުސެއިން މިބުޝާމްއެވެ.

މި މެޗުގައި ޔޯ ބުރު އެފްސީގެ ލަނޑުތައް ކާމިޔާބުކޮށްދިނީ މުހައްމަދު އައިކު ބިން ޝަމީމް، މުހައްމަދު އާހިލް ހަސަން އާއި ރާއިފް އިބްރާހީމް މޫސާ އެވެ. މި މެޗުގެ މޭން އޮފް ދަ މެޗަކަށް ހޮވުނީ ސްޓްރީޓް ބްރަދާސްއަށް ހަތަރު ލަނޑު ކާމިޔާބުކޮށްދިން އަހުމަދު އައިހަމް އެވެ.

މި މެޗުން ލިބުނު ތިން ޕޮއިންޓާއެކު ގްރޫޕް އޭގެ އެއްވަނަ ސްޓްރީޓް ބްރަދާސްއަށް ލިބެނީ ނުވަ ޕޮއިންޓާއެކު އެވެ. މި މެޗުން ބަލިވި ޔޯ ބުރު އެފްސީ މުބާރާތް ނިންމާލީ ކުޅުނު ތިން މެޗުން ވެސް ބަލިވެ އެއްވެސް ޕޮއިންޓެއް ނުލިބިއެވެ.

މި ގުރޫޕުން ސެމީގެ ފަހު ޖާގަ ކަށަވަރުކުރުމަށްޓަކައި އެފްސީ ހެސަ ވާދަ މާދަމާ ރޭ ނުކުންނާނީ ލަނޑާ އާއި ދެކޮޅަށެވެ. މިދެޓީމަށް ވެސް ދެ މެޗުން ތިން ޕޮއިންޓް ލިބިފައިވާއިރު މި ގުރޫޕްގެ ދެވަނަ ލިބޭނީ މާދަމާ ރޭގެ މެޗުން މޮޅުވާ ޓީމަކަށެވެ.  މެޗު އެއްވަރުވެއްޖެ ނަމަ ސެމީގެ ފުރުސަތު ލިބޭނީ އެފްސީ ހެސަ ވާދައަށެވެ. 

މާދަމާ ރޭ މުބާރާތުގެ ގްރޫޕް ސްޓޭޖުގެ ފަހު ދެމެޗު ކުޅުމަށް ހަމަޖެހިފައިވާ އިރު 21:30 ކުޅޭ ފުރަތަަމަ މެޗުގައި ބައްދަލުކުރާނީ ގްރޫޕް ބީގެ ޕްރޯ ފުޓްސަލް ކުލަބާއި ދަ ސްކޯޕިއަން އެވެ. އަދި ދެވަނަ މެޗުގައި 22:30 އެފްސީ ހެސަ ވާދަ ނުކުންނާނީ ލަނޑާ އާއި ދެކޮޅަށެވެ.