އިނގުރައިދޫ ކައުންސިލް ފުޓްސަލް ފިއެސްޓާގައި މިރޭގެ ގުރޫޕް ބީގައި ފަހުވަގުތު ކާމިޔާބުކުރި ލަނޑާއެކު 4-5 ގެ ނަތީޖާއަކުން ހަލަފް އެފްސީ ބަލިކޮށް މުބާރާތުގެ ސެމީފައިނަލްގެ އުންމީދު އެފްސީ ބްރަދާސްއިން ދަމަހައްޓައިފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ހާފުގެ ކުޅުން ނިމިގެންދިޔައީ 4-2 ގެ ނަތީޖާއަކުން ހަލަފް އެފްސީ ކުރީގައި އޮވެގެންނެވެ. ނަމަވެސް ދެވަަނަ ހާފްގައި އެފްސީ ބްރަދާސްއިން ވަނީ އެޓީމުގެ ކުޅުން ރަނގަޅުކޮށް އިތުރު ތިން ލަނޑު ކާމިޔާބުކޮށް މެޗު ގެ ނަތީޖާ އެންމެ ފަހުން މިނެޓުގައި އެޓީމުގެ ކޮޅަށް އަބުރާލާފައެވެ.

މިރޭގެ މެޗުގައި ހަލަފް އެފްސީގެ ހަތަރު ލަނޑު ވެސް ކާމިޔާބުކޮށްދިނީ އެޓީމުގެ އަބްދުލް މުހައިމިން އަސްލަމެވެ. މި މެޗުގައި އެފްސީ ބްރަދާސްގެ އަހުމަދު އަބޫބަކުރު ދެ ލަނޑު ކާމިޔާބުކޮށްދިން އިރު އެޓީމުގެ އަހުމަދު ޝަރީފް، އަހުމަދު އަހުނަފް އަދި  ހުސެއިން ޝަހާއު މިއިން ކޮންމެ ކުޅުންތެރިއެއް ވަނީ އެއް ލަނޑު ކާމިޔާބުކޮށްފައެވެ.

މި މެޗުގެ މޭން އޮފް ދަ މެޗަކަށް ހޮވުނީ އެފްސީ ބްރަދާސްއަށް މި މެޗުގައި ދެ ލަނޑު ކާމިޔާބުކޮށްދިން އަހުމަދު އަބޫބަކުރު އެވެ.

މި މެޗުން ލިބުނު ތިން ޕޮއިންޓާއެކު އެފްސީ ބްރަދާސް މިވަގުތު އޮތީ ކުޅުނު ތިން މެޗުން ލިބުނު 6 ޕޮއިންޓާއި ފައިދާ އެއް ގޯލާއެކު ގުރޫޕް ބީގެ ދެވަނައިގައެވެ. މުބާރާތުގައި އެޓީމު ކުޅުނު ތިން މެޗުގައި 13 ލަނޑުޖެހިއިރު ބައިކޮޅަށް ވަދެފައިވަނީ 12 ލަނޑެވެ.

މި ގުރޫޕްގެ އެއްވަނައިގައި އޮތީ މިރޭގެ މެޗުން ބަލިވި ހަލަފް އެފްސީ އެވެ. ތިން މެޗު ކުޅެގެން އެޓީމަށް ވެސް 6 ޕޮއިންޓް ލިބިފައިވާއިރު އެޓީމަށް ފައިދާ 12 ގޯލު އެބައޮތެވެ. މުބާރާތުގައި އެޓީމު ކުޅުނު ތިން މެޗުގައި 19 ލަނޑުޖެހިއިރު ބައިކޮޅަށް ވަދެފައިވަނީ 7 ލަނޑެވެ. މިއާއި މުބާރާތުގެ ސެމީ ފައިނަލުގެ ޖާގައެއް އެޓީމަށް ވަނީ ކަށަވަރުވެފައެވެ.

މިގުރޫޕްގައި ހިމެނޭ ދަ ސްކޯޕިއަންއަށް ދެ މެޗުން ތިން ޕޮއިންޓް ލިބިފައިވާއިރު އެޓީމަށް މިވަގުތު ފައިދާ އަދި ގެއްލުން ގޯލެއް ވެސް ނެތެވެ. މުބާރާތުގައި އެޓީމު ކުޅުނު ދެ މެޗުގައި 10 ލަނޑުޖެހިއިރު ބައިކޮޅަށް ވެސް 10 ލަނޑު ވަދެފައިވެ އެވެ. ނަމަވެސް ވެސް މާދަމާ ރޭ ކުޅޭ މިގުރޫޕްގެ ފަހު މެޗުގައި ޕްރޯ ފުޓްސަލް ކުލަބު އަތުން 2 ލަނޑުގެ ތަފާތަކުން މޮޅުވެ މުބާރާތުގެ ސެމީ ފައިނަލަށް ދިއުމުގެ ފުރުސަތު އެޓީމަށް ވެސް އެބައޮތެވެ.