ކީރިތި ރަސޫލާ ޞައްލަالله ޢަލައިޙި ވަސައްލަމްގެ ސަލަފުއް ޞާލިޙުން ރަމަޟާން މަހު ގިނަގިނައިން ޤުރުއާން ކިޔަވައިވިދާޅުވި ކަމަށް މިއަދުގެ ހުކުރު ޚުތުބަގައި ބުނެފިއެވެ.

ސަލަފުއް ޞާލިޙުން ރަމަޟާން މަހާއި ކުރިމަތި ލައްވާފައިވަނީ ހަމަ އެންމެ ހިނދުކޮޅެއްވެސް ހެޔޮކަމުން މަޙްރޫމް ނުވާގޮތައް ކަމަށް ޚުޠުބާގައި ބުނެފައިވެއެވެ. ހެޔޮ އެއްވެސް ކަމެއް އެބޭކަލުން ދޫކޮށެއް ނުލައްވައެވެ. އެގޮތުން ބައެއް ބޭކަލުން ކީރިތި ޤުރުއާން ކިޔަވާވިދާޅުވުމުގައި މުޅި ދުވަސް ހޭދަކުރައްވާ ކަމަށް ޚުޠުބާގައި ބުންޏެވެ.

މާތްالله ރުއްސުންލެއްވި ޢަބްދުالله ބިން މަސްޢޫދު ރަމަޟާން މަސް ނޫން މަސްމަހުގައިވެސް އެއްހުކުރުން އަނެއް ހުކުރަށް ޤުރުއާން ޚަތިމް ކުރައްވާ ކަމަށާއި ރަމަޟާން މަހު ތިން ދުވަހުން ޚަތިމެއް ކުރައްވާކަމަށް ޚުޠުބާގައި ފާހަގަކުރިއެވެ.

Advertisement

މީގެ އިތުރުން ތާބިޢީ ބޭކަލެއް ކަމަށްވާ ޤަތާދާ ރަޙިމަހުالله ރަމަޟާން މަސް ނޫން އެހެންމަސްމަހުގައި ތިން ދުވަހުން ޤުރުއާން ޚަތިމް ކުރައްވާ ކަމަށާއި، ރަމަޟާން މަހު ތިން ދުވަހުން ޚަތިމެއް ކުރައްވާ ކަމަށްވެސް ޚުޠުބާގައި ބުނެފައިވެއެވެ. އަދި ރަމަޟާން މަހުގެ ފަހުދިހައެއްގައި ކޮންމެ ދުވަހަކު ޚަތިމެއް ކުރައްވައެވެ.

އިބްނު ރަޖަބް ރަޙިމަހުالله ވިދާޅުވެފައިވަނީ ޢާންމުކޮށް ތިން ދުވަހަށްވުރެ އަވަހަށް ޚަތިމެއް ކުރުމަކީ މަކްރޫޙަ ކަމެއް ކަމުގައިވިޔަސް، ރަމަޟާން މަސްފަދަ ހެޔޮކަމުގެ މޫސުމްތަކާއި، މައްކާފަދަ މުޤައްދަސް ތަންތަނުގައި، ކީރިތި ޤުރުއާން ވީހާވެސް ގިނައިން ކިޔެވުން މުސްތަޙައްބު ވެގެންވާކަމަށެވެ. އެއީ މާތްވެގެންވާ ޒަމާނާއި، މުޤައްދަސް ތަންތަނުގައި، ހެޔޮކަން އިތުރުވާތީ، އެފުރުޞަތު ލިބިގަތުގެ ގޮތުން ކަމަށް ޚުޠުބާގައި ބުނެފައިވެއެވެ.

"އިސްވެ ބަޔާންވެދިޔަ ޚަބަރުތަކުގެ މުރާދަކީ، ފަހަރެއްގައި ވެސް ތަޖުވީދުގެ ހަމަތަކާއި، އަކުރުތަކުގެ މަޚްރަޖާއި، ފިލިތަކަށް ބެލުމެއް ނެތި އަވަސްއަވަހަށް ޤުރުއާން ކިޔެވުމެއް ނޫން، ނަމަވެސް އެބޭކަލުންގެ ޙަޔާތްޕުޅުން ހިތްވަރު ލިބި، ވީހާވެސް ގިނަވަގުތު، ޤުރުއާން ކިޔެވުމުގައި ހީވާގިވުން" ޚުޠުބާގައި ބުނެފައިވެއެވެ.

ސަލަފުއް ޞާލިޙުން ރަމަޟާން މަހު ގިނަގިނައިން ޤުރުއާން ކިޔަވައިވިދާޅުވުމުގެ އިތުރުން އެމަހުގެ ރޭތަކުގައި ނަމާދު ކުރުމުގައި ވެސް އެހާމެ ހީވާގި އުޅުއްވިއެވެ.