2019 ވަނަ އަހަރު މަޖިލިސް އިންތިޚާބުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެމްޑީޕީގެ ބައެއް ކެންޑިޑޭޓުންނާ ދެކޮޅަށް މަސައްކަތް ކުރެއްވި ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ތުހުމަތު ކުރައްވައިފި އެވެ. 

ވައްޑެ މިއަދު ކުރެއްވި ޓުވީޓެއްގައި ވިދާޅުވީ، 2019ގެ މަޖިލިސް އިންތިހާބުގައި އެމްޑީޕީން ވަކިން ވާދަކުރަން ޤައުމީ މަޖިލިސް އިއްތިފާޤުން ނިންމައި، ދާއިރާތަކުގައި ޕްރައިމަރީތައް ބާއްވައި ކެންޑިޑޭޓުން ހޮވާފައި ވަނިކޮށް، ރައީސް ސޯލިހު އެމްޑީޕީގެ ބައެއް ކެންޑިޑޭޓުންނާ ދެކޮޅަށް މަސައްކަތް ކުރެއްވި ކަމަށެވެ. 

އަދި އެކަން ހަނދާންކުރަންޖެހޭ ކަމަށްވެސް އޭނާ ވިދާޅުވި އެވެ. 

Advertisement

ނަމަވެސް، އެއީ ކޮން ކެންޑިޑޭޓުންނާއި ދެކޮޅަށް ކަމެއް ވައްޑެ ވިދާޅެއް ނުވެއެވެ. 

ވައްޑެގެ ޓުވީޓަށް ރައްދު ދެއްވައި ރައީސް ޞާލިހުގެ ފެކްޝަނުގެ މެންބަރެއް ކަމަށްވާ ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ވަނީ އޭނާ އާއި ދެކޮޅަށް އެމްޑީޕީގެ ރައީސް މުހައްމަދު ނަޝީދު އަދި އެ ޕާޓީގެ ނާއިބު ރައީސް މުހައްމަދު ޝިފާޒް މަސައްކަތް ކުރެއްވި ކަމަށް ތުހުމަތު ކުރައްވާފައެވެ. 

"މީހުންގެ ދުލުގަ ހިފާގެން ނުދަމަބަލަ. އަޅުގަނޑާދެކޮޅަށް މަސައްކަތްކުރީ އެމް ޑީ ޕީ ގެ ރައީސާ ނައިބު ރައީސް." ވައްޑެ އަށް ރައްދު ދެއްވައި ކުރެއްވި ކޮމެންޓު ގައި ޝިފާއު ވިދާޅުވިއެވެ.  

ޝިފާއު އަށް ރައްދު ދެއްވަމުން ވަައްޑެ ވަނީ އޭނާގެ އެ ވާހަކަ ދޮގު ކުރައްވާފައެވެ. 

"‎2019 ގައި އެމްޑީޕީ ރައީސް އާއި ނައިބު ރައީސް އިދިކޮޅަށް އެއްވެސް ކަމެއް ކުރިނަމަ ޝިފާއު ނުހޮވުނީސްކަން އެންމެން ދަންނާނެ." ވައްޑެ ވިދާޅުވި އެވެ. 

އެމްޑީޕީގެ އެތެރޭގައި ގިނަ ހަމަނުޖެހުންތަކެއް އުފެދި ޕާޓީ ދެ ފެކްޝަނަކަށް ބެހިފައިވާއިރު، ރައީސް ނަޝީދަށް ތާއީދު ކުރައްވާ މެންބަރުން އަންނަނީ "ފިކުރެއްގެ ދިރުން" ނަމުގައި ވަކި ގޮތްޕެއް އުފައްދަވައި، ޖުމްހޫރީ ޕާޓީ އާއި އެކު ގިނަ މަޝްވަރާތަކެއް ކުރަމުންނެވެ. އަދި ރިޔާސީ އިންތިޚާބުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދު ނުކޮށް އެފަދައިން ޖޭޕީ އާއި އެކު މަޝްވަރާތައް ކުރައްވަމުންދަނީ އެމްޑީޕީއަށް ރަނގަޅަށް ކަމަށް އެ ފެކްޝަނުން ބުނެއެވެ.