އިނގުރައިދޫ ކައުންސިލް ފުޓްސަލް ފިއެސްޓާގައި މިރޭގެ ކުޅެވުނު ގުރޫޕް ސްޓޭޖު ފަހު މެޗުގައި 8-0 ގެ ނަތީޖާއަކުން ލަނޑާ ބަލިކޮށް މުބާރާތުގެ ސެމީފައިނަލްގެ ފަހު ޖާގަ އެފްސީ ހެސަ ވާދަ އިން ހޯދައިފި އެވެ.

މިރޭގެ މެޗުގެ ފުރަތަަމަ ހާފު އެފްސީ ހެސަ ވާދަ އިން ނިންމާލީ 4-0 ގެ ނަތީޖާއަކުން ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ވެސް އެޓީމުން ވަނީ އިތުރު ހަތަރު ލަނޑު ކާމިޔާބުކޮށްފައެވެ.

މި މެޗު އެއްވަރު ކޮށްލައިގެން ވެސް ސެމީގެ ޖާގައެއް ހޯދުމުގެ ފުރުސަތު އެފްސީ ހެސަ ވާދައަށް އޮތް އިރު، ލަނޑާއަށް ސެމީގެ ޖާގައެއް ހޯދުމުގެ ފުރުސަތު އޮތީ ފަސް ލަނޑުގެ ތަފާތަކުން މޮޅުވެގެންނެވެ. ނަމަވެސް މި މެޗުގައި އެޓީމުގެ ފަރާތުން އެވަރުގެ ނަތީޖާއަކުން މޮޅުވެވޭފަދަ ކުޅުމެއް ފެނިގެން ގޮސްފައެވެ ނުވެއެވެ.

Advertisement

އެފްސީ ހެސަ ވާދައިގެ ހަސަން މާއިލްގެ ފަރާތުން މޮޅު ކުޅުމެއް ފެނިގެންދިޔަ މިމެޗުގައި އެޓީމުގެ މުހައްމަދު މަމްދޫހު ވަނީ ފަސް ލަނޑުޖަހާފައެވެ. އަދި އެޓީމުގެ އަބްދުﷲ ނަބީހް އާއި ހުސެއިން މާއިސް އިތުރުން ހަސަން މާއިލް މިއިން ކޮންމެ ކުޅުންތެރިއެއް ވަނީ މި މެޗުގައި އެއް ލަނޑު ކާމިޔާބުކޮށްފައެވެ. 

މި މެޗުގެ މޭން އޮފް ދަ މެޗަކަށް ހޮވުނީ އެފްސީ ހެސަ ވާދައިގެ ހަސަން މާއިލް އެވެ.

މުބާރާތުގެ ސެމީ ފައިނަލުގެ ދެ މެޗު މާދަމާރޭ ކުޅުމަށް ހަމަޖެހިފައިވާ އިރު 21:30 ކުޅޭ ސެމީ ފައިނަލުގެ ފުރަތަަމަ މެޗުގައި ބައްދަލުކުރާނީ ގްރޫޕް އޭގެ އެއްވަނަ ސްޓްރީޓް ބްރަދާސް އާއި ގްރޫޕް ބީގެ ދެވަނަ ހަލަފް އެފްސީ އެވެ.

މާދަމާ ރޭ 22:30 ގައި ކުޅެވޭ މުބާރާތުގެ ސެމީ ފައިނަލުގެ  ދެވަަނަ މެޗުގައި ގުރޫޕް ބީގެ އެއްވަނަ ދަ ސްކޯޕިއަން ނުކުންނާނީ ގްރޫޕްގެ އޭގެ ދެވަނަ އެފްސީ ހެސަ ވާދަ އާއި ދެކޮޅަށެވެ. މި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް މަހުގެ ތިންވަނަ ދުވަހުގެ ރޭ އެވެ.