މާލެ ސަރަހައްދުގެ ހޮސްޕިޓަލުތަކަށާއި، ތެލެސިމާ ކުދިންނާއި މީހުންނަށް ބޭނުންވާ ލޭ އެއްތަނަކުން ލިބޭނެ އިންތިޒާމު ހަމަޖެއްސުމަށް ސެންޓްރަލައިޒްޑްގެ ބްލަޑް ސެންޓަރެއް ޤާއިމްކުރުމުގެ މަސައްކަތްކުރަމުން އަންނަކަމަށް މޯލްޑިވިއަން ބްލަޑް ސާވިސަސްއިން ހާމަކޮށްފި އެވެ. 

މިކަމާއި ގުޅިގެން މޯލްޑިވިއަން ބްލަޑް ސަރވިސްގެ އެސޯސިއޭޓް ސްޕެޝަލިސްޓް އިން ޕީޑިއަރިޓްކްސް ޑރ.އަޙްމަދު އުމަރު ވިދާޅުވީ މާލެ ސަރަޙައްދުގައި ހުރި ހުރިހާ ހޮސްޕިޓަލަކަށް ބޭނުންވާ ލޭ އެއްތަނަކުން ފޯރުކޮށްދިނުމަށްޓަކައި ސެންޓްރަލައިޒްޑްގެ ބްލަޑް ސެންޓަރެއް ޤާއިމްކުރުމުގެ ޕައިލެޓް ޕްރޮޖެކްޓެއް މިއަހަރު ފެށުމަށް ނިންމާފައިވާކަމަށެވެ. 

އެ މަސައްކަތް ފެށުމަށްޓަކައި މާލެ ސަރަޙައްދުގެ ހޮސްޕިޓަލްތަކާއި މޯލްޑިވިއަން ބްލަޑް ސަރވިސްއަށް ބޭނުންވާ ލޭގެ މިންވަރު ހޯދާފައިވާ ކަމަށާއި، ސެންޓްރަލައިޒްޑްގެ ބްލަޑް ސެންޓަރަށް ވަޞީލަތްތަކާއި މުވައްޒަފުންވެސް ހަމަޖައްސައި ނިމިފައިވާކަމަށްވެސް އުމަރު ވިދާޅުވިއެވެ.

ޑރ އުމަރުގެ ވާހަކައިގައި ވަނީ ލޭ ރައްކާކުރުމަށް ހުރި ދަތިތަކަށްވެސް އަލިއަޅުވާލައްވާފަ އެވެ. 

ބްލަޑް ބޭންކުގައި ރައްކާކޮށްފައި ހުންނަ ލޭ އެންމެ ގިނައިން ބޭނުންވަނީ ތެލެސިމާ ކުދިންނާއި މީހުންނަށެވެ. 

ރާއްޖޭގައި ތެލަސީމިއާއަށް ފަރުވާ ހޯދާ 600 އަށްވުރެ ގިނަ ކުދިން އެބަތިބިކަމަށް އެމްބީއެސް މައުލުމާތުދެއެވެ. އަދި ތެލަސީމިއާ ކުދިންނަށް ލޭ އެޅުމަށްޓަކައި، ހަފްތާއަކަށް 160 ޔުނިޓްގެ ލޭ ބޭނުންވެއެވެ.

މީގެތެރެއިން 360 އަށްވުރެ ގިނަ ކުދިންނަކީ މާލެ ސަރަޙައްދުގައި ދިރިއުޅޭ، މާލޭގައި ހުންނަ ތެލަސީމިއާ ސެންޓަރުން ފަރުވާ ހޯދާ ކުދިންނެވެ. 

ސެންޓަރަލައިޒްޑް ބްލަޑް ސެންޓަރާއެކު މިހާރަށް ބޮޑު ގިނައިން ލޭ ރައްކާކޮށްފައި ބެހެއްޓޭނެ އިންތިޒާމު ހަމަޖެހިގެންދާނެ ކަމަށާއި، ލޭ ހޯދުމަށް އުފުލަން ޖެހޭ ތަކުލީފުތައް ކުޑަވެގެންދާނެ ކަމަށް އެމްބީއެސްއިން ވަނީ ބުނެފައެވެ.