މިއީ ހިޖުރައިން ހަތްވަނަ އަހަރު ހިނގާފައިވާ ޙާދިސާއެކެވެ.  ރަސޫލާ މުހައްމަދު ޞޢވ އަށް ކިޔަމަންވުމުގައި އެކަލޭގެފާނުގެ މަތިވެރި ޞަޙާބީންގެ ފަރާތުން ފެނިގެން ދިޔަ އާދަޔާޚިލާފު ކިޔަމަންތެރިކަމެއްގެ ވާހަކައެކެވެ.

އެއަހަރުގެ މުހައްރަމު މަހު ރަސޫލާގެ އަރިހުގައި 1600 ޞަހާބީން މަދީނާއިން ނުކުމެވަޑައިގަތެވެ. އޭގެ ތެރެއިން 200 ބޭކަލުން ދަތުރުކުރެއްވީ ސަވާރީގައެވެ. ބާކީ 1400 ބޭކަލުން ދަތުރުކުރެއްވީ ފައިމަގުގައެވެ. ދަތުރު ކުރައްވަމުން ގެންދެވީ އެދުވަސްވަރު ޔަހޫދީންގެ މައިމަރުކަޒުކަމުގައިވާ ޚައިބަރަށެވެ.

ޚައިބަރު އޮންނަނީ މަދީނާއާ އަށް މަންޒިލު ދުރުގައެވެ. އެއީ ގާތްގަނޑަކަށް 165 ކިލޯމީޓަރުގެ ދުރުމިނެވެ. އެދުވަސްވަރު ޚައިބަރުގައި ޔަހޫދީންގެ ވަރަށްބޮޑު އާބާދީއެއް އޮތެވެ. ބުނެވޭ ގޮތުގައި ހަނގުރާމަކުރާ މީހުންގެ ގޮތުގައިވެސް ވިހި ހާހަށްވުރެއް ގިނަ ޔަހޫދީން ޚައިބަރުގައި ތިއްބެވެ. އެއީ އެޒަމާނުގައި ތަރައްޤީވެ ކުރިއަރާފައިވާ، އަސްކަރީގޮތުން ބާރުގަދަ ރަށެކެވެ. 

ޚައިބަރު ހަނގުރާމައަކީ ދުވަސްތަކަކަށް ދިގުލައިގެން ދިޔަ ހަނގުރާމައެކެވެ. އެބައިމީހުންގެ ވަރުގަދަ ކިއްލާތައް ހިފުމަށް މުސްލިމުން އެތައް މަސައްކަތެއް ކުރަންޖެހުނެވެ. އަދި އެންމެ ވަރުގަދަ ބޮޑު ކިއްލާ ހިފުމަށް ވިހި ދުވަހަށްވުރެއް ގިނަދުވަހު އެތަން ހިޞާރު ކޮށްގެން މުސްލިމުންނަށް ތިބެންޖެހުނެވެ.

މިދިގު ލައިގެން ދިޔަދިޔުމުގައި މުސްލިމުންގެ ލަޝްކަރަށް ވަރަށް ބޮޑު ބަނޑުހައި ހޫނުކަމެއް ކުރިމަތިވެގެންދިޔައެވެ. ކާބޯތަކެތި މަދުވެގެންގޮސް މުސްލިމުންގެ ލަޝްކަރަށް އެކަމުގެ ވޭން ތަހައްމަލުކުރަންޖެހުނެވެ.

އިމާމް ބުޚާރީ އަދި މުސްލިމު މިވާހަކަ، ޢަބްދުالله ބިން އައުފާ ރަޟިޔަالله ޢަންހުގެ ކިބައިން ރިވާކުރައްވާފައިވެއެވެ. އެކަލޭގެފާނު ވިދާޅުވިއެވެ.

"ޚައިބަރުގެ (ޙިޞާރުގެ) ރޭތަކުގައި ތިމަންބޭކަލުންނަށް ވަރަށް ބޮޑު ބަނޑުހައި ހޫނު ކަމެއް ޖެހުނެވެ. އަދި ޚައިބަރުގެ ދުވަހު ތިމަންބޭކަލުންނަށް ޙިމާރު ލިބުނެވެ. ދެން ތިމަންބޭކަލުން އެކަތިލައި ތެލީގައި ކައްކަނިކޮށް، ރަސޫލުالله صلى الله عليه وسلم ފަރާތުން ގޮވާލައްވާ ބޭކަލަކު ގޮވާލެއްވިއެވެ.

"ތިޔަބައިމީޙުން ތެލި ބަންޑުން ޖަހާށެވެ. އަދި އެއިން އަހުލީ ޙިމާރުން އެއްވެސް މިންވަރެއް ނުކާށެވެ." 

ސުވާލަކީ މިގޮވައިލެއްވުމާއިއެކު ދެން ކަންތައް ވެގެންދާނީ ކިހިނެތްތޯއެވެ! ބަނޑުހައި ހޫނުކަމުގައިތިބި ޞަޙާބީން، އެވަގުތު ކައްކަމުންދިޔަ ހިމާރުގެ މަސްތެލިތައް މިއަމުރުފުޅާއިއެކު އުކާލައްވާނެތޯއެވެ!

އިސްލާމްދީނަށް ފުރިހަމައަށްވަދެ އިލާހީ އަމުރުފުޅުތަކަށް ކިޔަމަންވެ ބޯލަނބާ ބައެއްގެ ފަރާތުން ފެންނާނެ އެންމެ ފުރިހަމަ ނަމޫނާ އެވަގުތު ރަސޫލާގެ ޞަޙާބީންގެ ފަރާތުން ފެނިގެންދިޔައެވެ.

އުނދުންމަތީގައި، ކެއުމަށް ތައްޔާރުކުރެވެމުންދިޔަ މަސްތެލިތައް ވަގުތުން ބަންޑުން ޖައްސަވާލެއްވިއެވެ. އެފަދައިން ކަން ކުރަން އެންގެވި ކަމަށްޓަކައި އެބޭކަލުން އެއްވެސް ޝަކުވާއެއް ނުކުރައްވައެވެ. ދެކޮޅު ހެދުމުގެ ގޮތުން ކުޑަބަހެއްވެސް ބުނެނެލުމެއްނެތި އެކަން ކުރެއްވިއެވެ. މާތްالله އާއި ރަސޫލާ ޞައްލަالله އަލައިހި ވަސައްލަމަގެ އަމުރުފުޅަށް ކިޔަމަންވުމުގައި އެބޭކަލުންވަނީ ވަގުތުން ނަމޫނާ ދައްކަވާފައެވެ. 

މިވާހަކައަށް ވިސްނާލުމަށްފަހު އަހަރުމެންގެ ދިރިއުޅުމަށް ވިސްނާލުމުން ފާހަގަވަނީ ކޮން ކަމެއްތޯއެވެ! ފެންނަނީ ކޮން ތަފާތެއްތޯއެވެ!

اللهގެ އަމުރުފުޅެއް ނުވަތަ ނަހީކުރެއްވުމެއްގެ ވާހަކަ އަހަރުމެންނަށް ބުނެދެވިއްޖެނަމަ އަހަރުމެންނަށް ކަންތައް ކުރެވެނީ ކިހިނެތްބާއެވެ! ޢާލަމްތަކަށް ރަޙްމަތެއްކަމުގައި ފޮނުއްވެވި މާތް ނަބިއްޔާގެ އަމުރުފުޅުތަކާއި ސުންނަތަށް އަހަރުމެންނަށް އެޞަހާބީން ފަދައިން ފުރިހަމައަށް ތަބާވެވޭބާއެވެ! ނުވަތަ އެކަލޭގެފާނު ނުކުރުމަށް އަމުރު ކުރެއްވި ކަންކަމުން އަހަރުމެންނަށް ދުރުވެވެނީ ކިހާ މިންވަރަކަށްބާއެވެ! މިއީ ހައްތާވެސް އަހަރުމެންގެ ނަފްސުތަކާއި ކުރަންޖެހޭ އަދި އޭގެ ޖަވާބު ހޯދަންޖެހޭ ސުވާލުތަކެވެ.