އިނގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ފަސޭހަކަމާއި އެކު 4-1 ގެ ނަތީޖާއަކުން ލީޑްސް ބަލިކޮށް އާސެނަލް އިން ޕްރިމިއާ ލީގު ތާވަލްގެ އެއްވަނައިގައި 8 ޕޮއިންޓަށް އެޓީމުގެ ލީޑު ފުޅާކޮށްފި އެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި އާސެނަލްއަށް ލީޑު ހޯދައި ދިނީ ބްރެޒިލްގެ ފޯވާޑް ގެބްރިއަލް ޖީސަސް އެވެ. މިއީ ފުރަތަމަ ހާފުގެ 35 ވަނަ މިނެޓުގައި އެޓީމަށް ލިބުނު ޕެނަލްޓީއަކުން އޭނާ ކާމިޔާބުކޮށްދިން ލަނޑެކެވެ.

ދެވަަނަ ހާފު ފެށިގެން ދެވަނަ މިނެޓުގައި އާސެނަލްގެ ދެވަަނަ ލަނޑު ކާމިޔާބުކޮށްދިނީ އެޓީމުގެ ޑިފެންޑަރު ބެން ވައިޓެވެ. މިއީ އެޓީމުގެ ބްރެޒިލް ފޯވާޑް ގެބްރިއަލް މާޓިނެލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ދެވަަނަ ހާފު 55 ވަނަ މިނެޓުގައި އާސެނަލްގެ ތިންވަނަ ލަނޑު ކާމިޔާބުކޮށްދިނީ ޖީސަސް އެވެ. މިއީ އެޓީމުގެ ބެލްޖިއަމް މިޑްފީލްޑަރު  ލިއަންޑްރޯ ޓްރޮސާޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އާސެނަލް އިން ތިން ލަނޑުގެ ލީޑެއްގައި ވަނިކޮށް ލީޑްސް އިން ވަނީ ދެވަނަ ހާފުގެ 76 ވަނަ މިނެޓުގައި ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ.

މިލަނޑު އެޓީމަށް ކާމިޔާބުކޮށްދިނީ ޑެންމާކް ޑިފެންޑަރު ރަސްމުސް ކްރިސްޓެންސެން އެވެ. އަދި އޭގެ 8 މިނެޓު ފަހުން އާސެނަލް އިން ވަނީ އިތުރު ލަނޑެއް ކާމިޔާބުކޮށް އަނެއްކާވެސް ތިން ލަނޑު ލީޑެއް ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ސްވިޒަލޭންޑްގެ މިޑްފީލްޑަރު ޒަކާއެވެ. މިއީ އެޓީމުގެ ކެޕްޓަން މާޓިން އޮޑެގާޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުގެ ލިބުނު ތިން ޕޮއިންޓާއެކު 29 މެޗުން އާސެނަލްއަށް ވަނީ 72 ޕޮއިންޓާއެކު ލީގު ތާވަލުގެ ކުރީގައި 8 ޕޮއިންޓުގެ ލީޑެއް ލިބިފައެވެ. ދެވަނައިގައި އޮތް މެންޗެސްޓާ ސިޓީއަށް 28 މެޗުން 64 ލިބިފައިވާ އިރު ބާކީ އޮތް 9 މެޗުން ލީގު ޗެމްޕިއަންކަން ހޯދުމަށް އާސެނަލްއަށް މިހާރު ބޭނުންވަނީ 23 ޕޮއިންޓެވެ.