އިނގުރައިދޫ ކައުންސިލް ފުޓްސަލް ފިއެސްޓާގެ ސެމީ ފައިނަލުގެ ދެވަަނަ މެޗުގައި މިރޭ ފަސޭހަކަމާއި އެކު 8-3 ގެ ނަތީޖާއަކުން ދަ ސްކޯޕިއަން ބަލިކޮށް ފައިނަލްގެ ދެވަަނަ ޖާގަ އެފްސީ ހެސަ ވާދަ އިން ހޯދައިފި އެވެ.

ގުރޫޕް ބީގެ އެއްވަނަ ދަ ސްކޯޕިއަން އާއި ދެކޮޅަށް ގްރޫޕް އޭގެ ދެވަަނަ އެފްސީ ހެސަ ވާދައިން ފުރަތަަމަ ހާފުގައި ހަތަރު ލަނޑު ކާމިޔާބު ކުރި އިރު މި ހާފުގައި ދަ ސްކޯޕިއަން އިން ވެސް ދެ ލަނޑު ކާމިޔާބު ކުރި އެވެ. އަދި ދެވަނަ ހާފުގައި އެފްސީ ހެސަ ވާދަ އިން އިތުރުހަތަރު ލަނޑު ކާމިޔާބު ކުރި އިރު މިހާފުގައި ދަ ސްކޯޕިއަންއަށް ކާމިޔާބުކުރެވުނީ އެންމެ ލަނޑެކެވެ.

މިރޭގެ މެޗުގައި އެފްސީ ހެސަ ވާދައިގެ މުހައްމަދު މަމްދޫހު ހަތަރު ލަނޑު ކާމިޔާބުކޮށްދިން އިރު އެޓީމުގެ ހުސެއިން އިރުފާހް ވަނީ ދެ ލަނޑު ކާމިޔާބުކޮށްފައެވެ. އެޓީމު އަނެއް ދެ ލަނޑު ކާމިޔާބުކޮށްދިނީ އަބްދުލްﷲ ނަބީހް އާއި ހުސެއިން މާއިސް އެވެ.

ދަ ސްކޯޕިއަންގެ ލަނޑުތައް ކާމިޔާބުކޮށްދިނީ އިބްރާހިމް ޝަފްރާޒް، ހުސެއިން ޝަފްރާޒް އިބްރާހިމް އިތުރުން އަހުމަދު ޝަޔާޒް އިބްރާހިމް އެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ އެފްސީ ހެސަ ވާދައަށް މި މެޗުގައި ހަތަރު ލަނޑު ކާމިޔާބުކޮށްދިން މުހައްމަދު މަމްދޫހު އެވެ.

މުބާރާތުގެ ފައިނަލް މެޗުގައި އެފްސީ ހެސަ ވާދަ ނުކުންނާނީ މިރޭގެ ފުރަތަަމަ ސެމީ ފައިނަލް މެޗުން މޮޅުވި ސްޓްރީޓް ބްރަދާސް އާއި ދެކޮޅަށްށެވެ. މުބާރާތުގެ ގްރޫޕް ސްޓޭޖުގައި މިދެޓީމު ވާދަކުރި މެޗު 4-1 ގެ ނަތީޖާއަކުން ކާމިޔާބުކުރީ ސްޓްރީޓް ބްރަދާސް އެވެ. މިދެ ޓީމު ވާދަކުރާ ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް މަހުގެ ތިންވަނަ ދުވަހު ރޭ އެވެ.