އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި 2-0 ގެ ނަތީޖާއަކުން އެސްޓަންވިލާ އަތުން ޗެލްސީ ބަލިވެއްޖެ އެވެ.

އިންޓަނޭޝަނަލް ބްރޭކަށް ފަހު ލީގުގެ ކުޅުން މިއަދު ފެށިއިރު، މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ޗެލްސީ އިންނެވެ. އަދި މިހާފުގައި ޗެލްސީ އިން ވަނީ އެސްޓަން ވިލާގެ ގޯލާއި އަމާޒުކޮށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. ނަމަވެސް މިހާފުގައި އެސްޓަން ވިލާ އިން އުފެއްދި ހަމައެކަނި ހަމަލާގައި، ފުރަތަމަ ހާފުގެ 18 ވަނަ މިނެޓުގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ.

މިލަނޑު އެޓީމަށް ކާމިޔާބުކޮށްދިނީ އެޓީމުގެ އިގިރޭސި ފޯވާޑް  އޮލީ ވަޓްކިންސް އެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އެސްޓަން ވިލާ ކުރީގައި އޮވެގެންނެވެ.

ދެވަަނަ ހާފްގައި ވެސް ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ޗެލްސީ އެވެ. އަދި މިހާފުގައި ވެސް އެޓީމުން އުފެއްދި ގިނަ ހަމަލާތަކެއް އެސްޓަން ވިލާގެ ގޯލްކީޕަރު މަޓީނޭޒް ވަނީ ދިފާއުކޮށްފައެވެ.

އެސްޓަން ވިލާ އިން މި މެޗުގައި ކާމިޔާބުކުރި ދެ ވަނަ ލަނޑު ދެވަނަ ހާފުގެ 56 ވަނަ މިނެޓުގައި ކާމިޔާބުކޮށްދިނީ އެޓީމުގެ ސްކޮޓްލޭންޑް މިޑްފީލްޑަރު ޖޯން މެކްގިން އެވެ. މިއީ އެޓީމުގެ އިގިރޭސި މިޑްފީލްޑަރު ޖޭކޮބް ރަމްސޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު ތިން ޕޮއިންޓާއެކު އެސްޓަން ވިލާ އިން ވަނީ ތާވަލުގެ 9 ވަނައަށް ކުރިއަށް ޖެހިލާފައެވެ. 28 މެޗު ކުޅެގެން އެޓީމަށް 41 ޕޮއިންޓް ލިބިފައިވާއިރު، މިރޭގެ މެޗުން ބަލިވި ޗެލްސީއަށް 28 މެޗުން ލިބިފައިވަނީ 38 ޕޮއިންޓާއެކު ތާވަލުގެ 11 ވަނަ އެވެ.