ޖަރުމަނު ބުންޑަސްލީގާގައި މިރޭ އަމިއްލަ ދަނޑުގައި ބޮރޫޝިއާ ޑޯޓްމަންޑް 4-2 ގެ ނަތީޖާއަކުން ބަލިކޮށް ތާވަލުގެ އެއްވަނައަށް ބަޔާން މިއުނިކުން ޖެހިލައިފިއެވެ.

މި މެޗަކީ ބަޔާން މިއުނިކްގެ އައު ކޯޗު ޓުޗެލް ޓީމާއި ހަވާލުވި ފަހުން އެޓީމު ކުޅުނު ފުރަތަަމަ މެޗެވެ. އަދި މި މެޗުގެ ފުރަތަަމަ ހާފުގައި ބަޔާން މިއުނިކުން ވަނީ ތިން ލަނޑުގެ ލީޑެއް ނަގާފައެވެ.

އެޓީމުގެ ފުރަތަަމަ ލަނޑަކީ ފުރަތަަމަ ހާފުގެ 13 ވަނަ މިނެޓުގައި ޑޯޓްމަންޑްގެ ކީއްޕަރު ކޮބެލް އަތުން ބައިކޮޅަށް ވަން ލަނޑެކެވެ. އަދި އޭގެ ފަސް މިނެޓު ފަހުން ތޯމަސް މުލާ ވަނީ ގާތްގާތުގައި ދެ ލަނޑު ކާމިޔާބުކޮށް ބަޔާން އަށް ތިން ލަނޑުގެ ލީޑެއް ހޯދައިދީފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ބަޔާން ކުރީގައި އޮވެގެންނެވެ.

ދެވަަނަ ހާފު ފެށިގެން ފަސްވަނަ މިނެޓްގައި ބަޔާންގެ ހަތަރު ވަނަ ލަނޑު ކާމިޔާބުކޮށްދިނީ ކިންގްސްލީ ކޯމަން އެވެ. މިއީ އެޓީމުގެ ޖަރުމަނު ފޯވާޑް ލެރޯއީ ސާނޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބަޔާން މިއުނިކް ހަތަރު ލަނޑުގެ ލީޑެއްގައި ވަނިކޮށް ޑޯޓްމަންޑަށް ނަތީޖާ ފަރަގު ކުޑަކޮށްދިނީ ދެވަަނަ ހާފުގެ 72 ވަނަ މިނެޓުގައި އެޓީމަށް ލިބުނު ޕެނަލްޓީއަކުން އެމްރޭ ކޭން އެވެ. އަދި ދެވަނަ ހާފުގެ އެންމެ ފަހު މިނެޓްގައި ޑޯޓްމަންޑުން ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 4-2 އަށް ބަދަލުކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ނެދަލޭންޑްސްގެ ފޯވާޑް ޑޮނިޔެލް މަލެން އެވެ. މިއީ އެޓީމުގެ ޕޯޗުގަލް ޑިފެންޑަރު ރަފައެލް ގުރޭރޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުން ލިބުނު ތިން ޕޮއިންޓާއެކު އެކު 26 މެޗުން ބަޔާން މިއުނިކަށް 55 ޕޮއިންޓް ލިބިފައިވާއިރު، ދެވަނައިގައި އޮތް ޑޯޓްމަންޑަށް 26 މެޗުން ލިބިފައިވަނީ 53 ޕޮއިންޓެވެ.