ސްޕެއިން ލަލީގާގައި މިރޭ ރަށުން ބޭރުގައި ފަސޭހަކަމާއި އެކު 4-0 ގެ ނަތީޖާއަކުން އެލްޗޭ ބަލިކޮށް ބާސެލޯނާ އިން ލީގު ތާވަލުގެ ކުރީގައި 15 ޕޮއިންޓްގެ ލީޑެއް ނަގައިފި އެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ބާސެލޯނާ އިންނެވެ. އަދި ފުރަތަަމަ ހާފުގެ 20 ވަނަ މިނެޓްގައި އެޓީމަށް ލީޑު ނަގައިދިނީ ރޮބަޓް ލެވަންޑޮވްސްކީ އެވެ. މިއީ އެޓީމުގެ އުރުގުއާއީ ޑިފެންޑަރު ރޮނާލްޑް އަރައުޖޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ބާސެލޯނާ ކުރީގައި އޮވެގެންނެވެ.

ދެވަނަ ހާފުގެ 56 ވަނަ މިނެޓުގައި ބާސެލޯނާގެ ލީޑު ފުޅާކޮށްދިނީ ޒުވާން ފޯވާޑް އަންސޫ ފާޓީއެވެ. މިއީ ފެރާން ޓޮރޭޒް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިހާފުގައި އެލްޗޭ އިން އެޓީމުގެ ކުޅުން ރަނގަޅުކޮށް ރަގަޅު ހަމަލާތަކެއް ބާސެލޯނާގެ ގޯލަށް ފޮނުވާލި ނަމަވެސް ދެންވެސް ފެނިގެންދިޔައީ ބާސެލޯނާގެ ލަނޑެކެވެ.

Advertisement

ދެވަަނަ ހާފްގެ 66 ވަނަ މިނެޓުގައި ގަވީ ތަނަވަސްކޮށްދިން ފުރުސަތެއްގައި ލެވަންޑޮވްސްކީ ބާސެލޯނާގެ ތިންވަނަ ލަނޑު ކާމިޔާބުކޮށްދިން އިރު އެޓީމުގެ ހަތަރުވަނަ ލަނޑު ދެވަނަ ހާފުގެ 79 ވަނަ މިނެޓުގައި ލެވަންޑޮވްސްކީ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ފެރާން ޓޮރޭޒް އެވެ.

މިރޭގެ މެޗުން ލިބުނު ތިން ޕޮއިންޓާއެކު 27 މެޗުން ބާސެލޯނާއަށް 71 ޕޮއިންޓް ލިބިފައިވާއިރު ދެވަނައިގައި އޮތް ރެއާލް މެޑްރިޑަށް 26 މެޗުން ލިބިފައިވަނީ 56 ޕޮއިންޓެވެ.