ހުރިހާ ސުކޫލެއްގައި ތިބި މޫނު ބުރުގާ އަޅާކުދިން ސުކޫލަށްދާއިރު މޫނު ބުރުގާ ނެގުމަށް އެޑިއުކޭޝަން މިނިސްޓްރީން އަންގައިފި އެވެ. 

ސުކޫލަށް ދާއިރު މޫނު ބުރުގާ ނަގަން އެންމެ ފުރަތަމަ އެޑިއުކޭޝަނުން އެންގީ އަރަބިއްޔާ ސުކޫލަށެވެ. އަރަބިއްޔާ ސުކޫލުގެ ޓީޗަރުންނަށްވެސް މޫނު ބުރުގާ އަޅައިގެން ކުދިންނަށް ކިޔަވައިދޭން ކްލާސްތަކަށް ވަނުން ވަނީ އެޑިއުކޭޝަނުން މަނާކޮށްފަ އެވެ. 

އެފަހުން ރާއްޖޭގެ ހުރިހާ ސުކޫލުތަކަކަށް އެޑިއުކޭޝަނުން ވަނީ އެފަދައިން އަންގާފައެވެ. އަދި ސުކޫލަށް ދާއިރު މޫނު ބުރުގާ ނެގުމަށް ހުރިހާ ސުކޫލުތަކަށް ވަނީ އަންގާފަ އެވެ. 

މޫނު ނެގުމަށް އެޑިއުކޭޝަނުން އެންގި އެންގުން އަރަބިއްޔާ ސުކޫލުން ތަންފީޒު ކުރަން ފެށުމާއި ގުޅިގެން އެ ސުކޫލުގެ ދަރިވަރުންގެ ބެލެނިވެރިން ކޯޓަށް އެމައްސަލަ ހުށަހަޅާން ނިންމާފަ އެވެ. 

އޭގެ އިތުރުން ތައުލީމު ހަސީލު ކުރާ ދަރިވަރުންނަށް، މޫނު ބުރުގާ ނަގަން އެންގުމަކީ ކުރެވޭނެ ކަމެއް ނޫންކަމަށާ، މޫނު ބުރުގާގެ ސަބަބުން އެ ދަރިވަރުން ތަޢުލީމުން މަހްރޫމް ނުކުރެވޭނެ ކަން ދިވެހި ރާއްޖޭގެ ހައިކޯޓުން މީގެ ކުރިން ނިންމާފައިވާ ކަމަށް ކުރީގެ ބަންޑާރަ ނައިބު އައިޝަތު އާޒިމާ ޝަކޫރު ވަނީ ވިދާޅުވެފަ އެވެ. 

އެހެން ނަމަވެސް އެޑިއުކޭޝަން މިނިސްޓްރީން ތަކުރާރުކޮށް ދަނީ މޫނު ބުރުގާ ނަގަން ދަރިވަރުންނަށް އަންގާ މަޖުބޫރު ކުރަމުންނެވެ.