ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަހުމަދު ސިޔާމް މުހައްމަދުގެ ސަން ޓްރެވަލްސް އިން ހިލްޓަންއަށް 24 މިލިއަން ޑޮލަރު 14 ދުވަސްތެރޭ ދެއްކުމަށް ސިވިލްކޯޓުން ކުރި އަމުރު ތަންފީޒުކުރުން މަޑުޖައްސާލުމުގެ ވަގުތީ އަމުރެއް ހައިކޯޓުން ނެރެދީފި އެވެ. 

ހިލްޓަންއަށް 24 މިލިއަން ޑޮލަރު ދެއްކުމަށް ސަން ޓްރެވަލްސް ކުންފުނީގެ މައްޗަށް ސިވިލް ކޯޓުން އަމުރުކޮށްފައިވަނީ އެ ފައިސާދެއްކުމަށް ދެއްކުމަށް ސިންގަޕޫރުގެ އާބިޓްރޭޝަނުން ކޮށްފައިވާ ހުކުމަށް ތާއީދުކޮށް މިދިޔަ ފެބްރުއަރީމަހުގެ ނެރުނު އަމުރެއްގައެވެ. 

އެފަހުން ސަން ޓްރެވަލްސްގެ ފަރާތުން ވަނީ އެ މައްސަލަ ހައިކޯޓުގައި އިސްތިއުނާފު ކޮށްފަ އެވެ. 

Advertisement

އެ މައްސަލައާއި ގުޅޭ އަޑުއެހުމެއް މިއަދު ހައިކޯޓުގައި ކުރިއަށް ގެންގޮސްފައިވާއިރު ހައިކޯޓުން ވަނީ ސަން ޓްރެވަލްސްއިން އެދުނުގޮތަށް ހައިކޯޓުގައި އޮތް އިސްތިއުނާފީ މައްސަލަ ވަކިގޮތަކަށް ނިމެންދެން ސިވިލް ކޯޓުގެ އަމުރު ތަންފީޒުކުރުމުގެ ވަގުތީ އަމުރެއް ނެރެދީފަ އެވެ. 

އެގޮތުން ހައި ކޯޓުން ސަން ޓްރެވަލްސްގެ އެދުނު ގޮތަށް މިއަދު ނެރުނު ވަގުތީ އަމުރުގައި ބުނެފައިވަނީ، އެ މައްސަލައިގައި އެ ކޯޓުން ވަކި ގޮތެއް ކަނޑައަޅަންދެން ސިވިލް ކޯޓުން 5 ފެބްރުއަރީގައި ނެރެފައިވާ އަމުުރު ތަންފީޒުކުރުން މަޑުޖައްސާލަން އަމުރުކުރާ ކަމަށެވެ. 

އަދި އެ އަމުރު ނެރެދެނީ ހައި ކޯޓުގައި އެ މައްސަލަ އިސްތިއުނާފުކޮށްފައި ވަނިކޮށް ސިވިލް ކޯޓުގެ އަމުރު ތަންފީޒުކޮށްފިކަމަށް ވާނަމަ ސަން ޓްރެވަލްސް ކުންފުނީގެ މަސްލަހަތަށް ގެއްލުންވެދާނެތީ ކަމަށް ހައި ކޯޓުން ވަނީ ބުނެފައެވެ. 

ޝިޔާމު ކުންފުނިން ހިލްޓަންއަށް ދައްކަންޖެހޭ ފައިސާ ނުދައްކާ މަޑުޖައްސާލުމުގެ ވަގުތީ އަމުރެއް ހައިކޯޓުން ނެރެދީފައިވާއިރު، ޝިޔާމަކީ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހަށް ދެވަނަ ދައުރެއް ހޯއްދަވާދެއްވުމަށް އެމަނިކުފާނާއި އެކު ކޯލިޝަން ހަދަން އެއްބަސްވެވަޑައިގެން ހުންނެވި ބޭފުޅެކެވެ. 

އަދި މިފަހުން ޝިޔާމާއި އޭނާގެ ޕާޓީގެ އިސް ބޭފުޅުން ގެންދަވަނީ ރައީސް ޞާލިހަށް ވަރަށް ބޮޑަށް ހުޝާމަދުކޮށް އެމަނިކުފާނު ސަރުކާރު ހިންގަވާލެއް މޮޅުކަން ފާހަގަކުރައްވާ ތައުރީފު ކުރައްވަމުންނެވެ.