ޕާކިސްޠާނުގެ ކަރާޗީގައި ރަމަޟާން މަހާއި ގުޅިގެން ހިލޭ ކާބޯތަކެތި ބެހި ތަނެއްގައި ފިތި ބާރުވެގެން 11 މީހުން މަރުވެއްޖެއެވެ.

މިހާދިސާގައި މަރުވި މީހުންގެ ތެރާގައި ހިމެނެނީ އަންހެނުންނާއި ކުޑަކުދިން ކަމަށް އަލްޖަޒީރާގައި ބުނެފައިވެއެވެ.

މިހާދިސާ ހިނގައިފައިވަނީ ފާއިތުވި ހުކުރުދުވަހު ކަރާޗީގެ ފެކްޓްރީއެއްގެ ކައިރީގައެވެ. 11 މީހަކު މަރުވުމުގެ އިތުރުން މިހާދިސާގައި ގިނަ އަދަދެއްގެ ބަޔަކަސް އެކިވަރުގެ އަނިޔާތައް ވަނީ ލިބިފައެވެ. އެގޮތުން ކާބޯތަކެތި ބަހަން ފެށުމުން އަވަހަށް އެތަކެތި އަތުލުމަށް އަވަސްވެގަތުމުގެ ތެރޭގައި ގިނަ ބަޔަކު ވެއްޓި، ވެއްޓުނު މީހުންގެ ގައިމައްޗަށް އެރި ފިތި ބާރުވުމުގެ ސަބަބުން އެއްބަޔަކު މަރުވެ އަނެއް ބަޔަކު ވަނީ ޒަހަމްވެފައެވެ. އަދި ކައިރީގައި ހުރި ވަޅުގަނޑެއްގެ ތެރެޔަށްވެސް އެއްބައިމީހުން ވެއްޓިފައިވާކަމަށްވެސް މީޑިއާ ރިޕޯޓް ތަކުން ވަނީ ބުނެފައެވެ.

Advertisement

ޕާކިސްތާނުގެ މީޑިއާ އަކުން ބުނެފައިވަނީ މަރުވިމީހުންގެ ތެރޭގައި ހިމެނެނޭ 8 އަންހެނަކާއި 3 ކުޑަކުއްޖެއް ކަމަށެވެ.

ކަރާޗީ ޕޮލިހުގެ ފަރާތުން ވާހަކަދެއްކި މުޤީސް ހަޝްމީ ބުނެފައިވަނީ ކާބޯތަކެތި ބެހި ފެކްޓްރީގެ ވެރިޔާ އެކަން އިންތިޒާމް ކުރާކަން ޕޮލިހުންނަށް އަންގައިފައިނުވާ ކަމަށެވެ. އަދި އެކަން ކުރުމުގެ ކުރިން އިޝާރާތެއް ކުރިނަމަ އެތަނަށް ސެކިޔުރިޓީ ފޯސް ފޮނުވައި އިންތިޒާމް ތައް ރަނގަޅު ކުރެވުނީސް ކަމަށް ވަނީ ބުނެފައެވެ.

ޕާކިސްތާނުގެ ފޮރިންގ މިނިސްޓަރ ބިލާވަލް ބުއްޓޯ ޒަރްދާރީ ވަނީ މިކަން ހިނގައި ދިޔަގޮތް ތަހުޤީގު ކުރުމަށް ކަމާއިބެހޭ އިދާރާތަކަށް އަންގައިފައެވެ.

ރަމަޟާން މަހާއި ދިމާކޮށް ޕާކިސްތާނުގައި، ހިލޭ ކާބޯތަކެތި ބަހާ ތަންތަނުގައި މިފަދަ ހާދިސާއެއް މި ރަމަޟާން މަހު ކުރިންވެސް ވަނީ ހިނގައިފައި ކަމަށް އަލްޖަޒީރާގައި ބުނެފައިވެއެވެ. އެހާދިސާގައިވެސް ބަޔަކު ވަނީ މަރުވެފައެވެ. ހުކުރުދުވަހުގެ ހާދިސާގައި މަރުވި މީހުންނާއި އެކު މިރަމަޟާން މަހު މިފަދަހާދިސާތަކުގައި މަރުވި މީހުންގެ ޢަދަދު 21 އެރީކަމަށް ވެސް އަލްޖަޒީރާގައި ބުނެފައިވެއެވެ.

ދުވަސްވަރަކީ ޕާކިސްތާނުގެ މާލީ ހާލަތު ވަރަށް ބޮޑަށް ދަށްވެފައިވާ ދުވަސްވަރެކެވެ. ގިނަ އާއިލާތަކުން ގަޑިން ގަޑިއަށް ކާބޯތަކެތި ހޯދުމަށް ނުކުޅެދޭ ހިސާބަށް ވަނީ އެޤައުމުގެ ހާލަތުގޮއްސައެވެ.

ޕާކިސްތާނުގެ ސަރުކާރުން އިންތިޒާމް ކޮށްގެން، ކުޑަ އާމްދަނީ އެއް ލިބޭ އާއިލާތަކަށް ޚާއްސަކޮށްގެން، ބޭއްވި ގޮދަން ފުށް ބެހުމުގެ  ހަރަކާތަކަށްވެސް އެތައް ބަޔަކު ވަނީ އެއްވެފައެވެ. ސަރުކާރުގެ ފަރާތުން މިފަދަ ކަމެއް އިންތިޒާމް ކޮށްފައިވަނީވެސް ރަމަޟާން މަހާއި ދިމާކޮށް ދަތިހާލުގައި އުޅޭ ފަރާތްތަކަށް ލުޔެއް ހޯދައި ދިނުމަށް ކަމަށް ޕާކިސްތާނުގެ ސަރުކާރުން ވަނީ ބުނެފައެވެ.