ކެއާ ސޮސައިޓީން ހުޅުމާލޭ ފޭސް ދޭގައި، ރިހެބިލިޓޭޝަނާއި، އިންޓަވެންޝަން ޚިދުމަތަށް އަމާޒުކޮށްގެން "ހިޔާ އެނެކްސް" ގެ ނަމުގައި ސެންޓަރެއް ޤާއިމްކުރުމަށް ނިންމައިފިއެވެ.

ކެއާ ސޮސައިޓީން ބުނީ މި ސެންޓަރު ހެދުމުގެ ޢަމަލީ މަސައްކަތުގައި މިއަދު ސޮއިކޮށްފައިވާކަމަށެވެ. މި ސެންޓަރު ޤާއިމްކުރުމަށް ކެއާ ސޮސައިޓީން އެއްބަސްވުމުގައި ސޮއިކޮށްފައިވަނީ އާރބަން ރިއަލް އެސްޓޭޓް ކުންފުންޏާއެކުއެވެ.

މި ސެންޓަރުގެ މަސައްކަތް ތާވަލާ އެއްގޮތަށް ކުރިއަށްދާނަމަ އަންނަ ޖޫންމަހުގެ ފަހުކޮޅު ނިމޭވަރު ވާނެކަމަށް ކެއާ ސޮސައިޓީން ބުންޏެވެ. އަދި، މަސައްކަތް ކުރަމުންދަނީ އެންމެ ލަސްވެގެންވެސް އަންނަ އޮގަސްޓް މަހު އެ ސެންޓަރުން ޚިދުމަތް ފެށުމަށްކަމަށްވެސް ބުނެފައިވެއެވެ.

Advertisement

ކެއާ ސޮސައިޓީން ހުޅުމާލޭ ފޭސް ދޭގައި، ރިހެބިލިޓޭޝަނާއި، އިންޓަވެންޝަން ޚިދުމަތަށް އަމާޒުކޮށްގެން "ހިޔާ އެނެކްސް" ގެ ނަމުގައި ސެންޓަރެއް ޤާއިމްކުރުމަށް އެއްބަސްވުން-- ފޮޓޯ/ ކެއާ ސޮސައިޓީ

މި ސެންޓަރުން ފޯރުކޮށްދިނުމަށް ނިންމާފައިވާ ޚިދުމަތްތަކުގެ ތެރޭގައި، ކުދިންގެ ޅަފަތުގައި އެކިއެކި ހުނަރުތައް ތަރައްޤީކުރުމަށް އާރލީ އައިޑެންޓިފިކޭޝަން އަދި އާރލީ އިންޓަވެންޝަން ފޯރުކޮށްދިނުން ހިމެނެއެވެ. މިއީ މައިގަނޑު ގޮތެއްގައި 6 އަހަރުން ދަށުގެ ކުދިންނަށް އަމާޒުކޮށްގެން ހިންގޭ ޕްރޮގަރާމެކެވެ.

މީގެ އިތުރުން ވޮކޭޝަނަލް ޕްރޮގްރާމްވެސް އެ ސެންޓަރުން ހިންގާނެކަމަށް ކެއާ ސޮސައިޓިން ބުންޏެވެ. މިއީ ސްކޫލް ނިންމާ އުމުރުގެ ކުދިންނަށް މަސައްކަތްތެރިކަން ދަސްކޮށްދިނުމުގެ ގޮތުން ހިންގޭ ޕްރޮގްރާމެއްކަމަށާއި، މި ޕްރޮގްރާމުގެ އަމާޒަކީ ސްކޫލް ނިންމާ ކުދިންނަށް ޢާމްދަނީ ހޯދޭނެ ގޮތެއް ނުވަތަ ވަޒީފާއަށް ނެރުމަށް ތައްޔާރުކޮށްދިނުންކަމަށްވެސް ކެއާ ސޮސައިޓީން ބުންޏެވެ.

ހަމަ އެހެންމެ މި ސެންޓަރުން ތެރަޕީ ޕްރޮގްރާމްވެސް ކުރިއަށް ގެންދިޔުމަށް ހަމަޖެހިފައިވާ ކަމަށް ކެއާ ސޮސައިޓީން ބުންޏެވެ. މިއީ ޅަފަތުގެ އުމުރު ފުރާގަޔާ އަދި ކުދިންނަށް ބޭނުންވާ އިތުރު އެހީގެ ތެރެއިން ޚާއްޞަކޮށް އެކިއެކި ތެރަޕީ ބޭނުންވާ ކުދިންނަށް ފޯރުކޮށްދޭ ޚިދުމަތެކެވެ.

އަދި މީގެ އިތުރުން ސަބްޖެކްޓް ކޯޗިންގެ ޚިދުމަތްވެސް ފޯރުކޮށްދޭނެކަމަށާއި، މިއީ ސްކޫލަށް ޤަވައިދުން ދެވޭ ކުދިންނަށް އެހެންނަމަވެސް ކުއްޖާގެ ހުރި އުނގެނުމުގެ އެކި ދަތިކަމަކާހެދި އިތުރު އެހީ ބޭނުންވާ ކުދިންނަށް ވަކިވަކި މާއްދާތަކުން އެހީތެރިކަން ދިނުމުގެ ގޮތުން މުޅިން އަލަށް ހިންގަން ރާވާފައިވާ ޕްރޮގްރާމެއްކަމަށް ކެއާ ސޮސައިޓިން ބުންޏެވެ.

1998 ވަނަ އަހަރު އުފެއްދި ކެއާ ސޮސައިޓީއަކީ މުޖުތަމައުގައި ތިބި ނުކުޅެދުންތެރިކަން ހުންނަ މީހުންނަށް އެހީތެރިވުމުގެ ގޮތުން އުފެއްދި ޖަމުޢިއްޔާއެކެވެ.