2018 ވަނަ އަހަރު ވެރިކަމަށް އައުމަށް މަސްތުވާތަކެއްޗާއި ދެކޮޅަށް އެމްޑީޕީން އެކުލަވާލި ސިޔާސަތު ތަންފީޒުކުރުމަށް ސަރުކާރު ފެއިލްވެ މި ސަރުކާރުގައި މަސްތުވާތަކެތީގެ މައްސަލަތައް ވީ އިތުރުކަމަށް މަޖިލީހުގެ އުނގޫފާރު ދާއިރާގެ މެމްބަރު މުޙައްމަދު ވަހީދު (ވައްޑެ) ވިދާޅުވެއްޖެ އެވެ.
ވަހީދު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.
އެގޮތުން އޭނާ ވިދާޅުވީ ރާއްޖޭގައި އޮތް އެންމެ ބޮޑު އިޖްތިމާއީ އެއް މައްސަލަކަމށްވާ މަސްތުވާތަކެތީގެ ވަބާއިން ސަލާމަތްވުމަށް އެމްޑީޕިއިން ވަރަށް ވަރުގަދަ ސިޔާސަތެއް އެކުލަވާލާފައިވާ ކަމަށެވެ.
އެހެން ނަމަވެސް މި ސަރުކާރުން އެ ސިޔާސަތު ތަންފީޒުކުރުމުގައި ފެއިލްވެފައިވާ ކަމަށާއި، ސަރުކާރަށް ބާކީ 7 ވަރަކަށް މަސް އޮތް އިރު ފެންނަމުންދާ މަންޒަރަކީ މަސްތުވާތަކެތީގެ މައްސަލަ ބޮޑުވެ އިތުރުވެފައިވާ މަންޒަރުކަމަށް އޭނާ ވިދާޅުވި އެވެ.
"އަޅުގަނޑުމެން މި ހިނގާ ދައުރަށް އާ ސިޔާސަތުތަކާ އެކީގައި އެމްޑީޕީން ނިކުތީ ރާއްޖޭގައި މި ފަރުވާ ފުޅާކުރެވޭނެ ގޮތްތަކާއި ބެހޭގޮތުން ރާއްޖެއަށް މސްތުވާތަކެތި އެތެރެކުރަން ހުރި ދޮރުތައް އަދި މި މައްސަލައަށް، މި އާއިލާތަކަށް ތަސައްލީއެއް ހޯދައިދެވޭނެ ބައިވަރު ސިޔާސަތުތަކާއެކު. އެހެން ނަމަވެސް ދައުރުނިމެން 6 އެއްކަ 8އެއްކަ މަހަށް ވެގެން ދިޔައިރު އަޅުގަނޑުމެންނަށް ފެންނަމުން މި ދަނީ ދުވަހެއް ދުވަހަށް މި މައްސަލައިގެ ހާލަތު ދަށްވަމުން ގޯސްވަމުން ދިއުން ދިޔަވާ އަޅުގަނޑުމެންގެ ސަރުކާރަށް ރަނގަޅު އެކަށީގެންވާ ނަތީޖާއެއް ނުނެރެވި މިކަން ދޫކޮށްލެވިފައި އޮތްތަން"
މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު
ވަހީދު ވިދާޅުވީ ލާމަރުކަޒީ އުސޫލުގެ ތެރެއިން ސިއްޙީ މަރުކަޒުތަކާއި ހޮސްޕިޓަލުތަކުން މަސްތުވާތަކެތިން އަރައިގަންނަން ބޭނުންވާ ފަރާތްތަކަށް ފަރުވާ ހަމަޖެއްސޭނެ އިންތިޒާމުތައް ގާއިމްކުރުމަކީ އެމްޑީޕީން ވަކާލާތު ކުރަމުން އައި ކަމެއް ކަމަށެވެ.
އަދި މަސްތުވާތަކެތީގެ ވަބާގައި ގިނަ އަދަދެއްގެ ޒުވާނުން ޖެހިފައިވާއިރު، އެމީހުން އެކަމުން އަރައިގަތުމަށް އާސަންދައިންވެސް ފަރުވާ ކުރެވޭނެ އިންތިޒާމުތައް ހަމަޖައްސައިދޭން ޖެހޭކަމަށެވެ.
މިއިން އެއްވެސް ސިޔާސަތެއް ތަންފީޒުކުރުމަށް ސަރުކާރުން މަސައްކަތް ކުރަމުން ނުދާކަން ވަހީދު ފާހަގަކުރެއްވި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިކަމާއި ގުޅޭގޮތުން ވާހަކަދެއްކެވި ގިނަ މެމްބަރުން ވަނީ މަސްތުވާތަކެތީގެ މައްސަލަ ޙައްލު ކުރުމަށް ސަރުކާރުން އެކަށީގެންވާ މަސައްކަތްތަކެއް ކުރަމުން ނުދާކަން ފާހަގަކުރައްވާ ބޮޑެތި ފާޑުކިޔުންތަކެއް އަމާޒުކުރައްވާފަ އެވެ.
Advertisement
This content is created and paid for by advertisers and does not involve Voice Journalists
