ސުޕްރިމްކޯޓުގެ ނިހާއީ ހުކުމެއް ނާންނަހާ ހިނދަކު ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމަށް ކުރިއަށް އޮތް ރިޔާސީ އިންތިޚާބުގައި ވާދަކުރުމުގެ ފުރުސަތު ބޮޑުކަމަށް އިލެކްޝަން ކޮމިޝަންގެ ރައީސް ފުއާދު ތައުފީގު ވިދާޅުވެއްޖެ އެވެ.
ފުއާދު ތައުފީގު މިފަދައިން ވިދާޅުވެފައިވަނީ އިންތިޚާބުތަކަށް އީސީން ވަމުންދާ ތައްޔާރީތަކާއި ގުޅޭގޮތުން ޗެނަލް-13 އަށް ދެއްވި އިންޓަވިއުއެއްގައި ކުރި ސުވާލަކަށް ޖަވާބުދެއްވަމުން ނެވެ.
ފުއާދު ވިދާޅުވީ ރައީސް ޔާމީންގެ ކެންޑިޑެންސީ ބަލައިގަތުމާއި ގުޅިގެން އިލެކްޝަން ކޮމިޝަނުން އަދި ސީދާ ކަނޑައެޅިގެން ވަކިގޮތެއް ނިންމާފައި ނުވާކަމަށެވެ.
އެހެން ނަމަވެސް އޭނާއަށް ލިބިވަޑައިގެންފާ ތަޖުރިބާގެ އަލީގައި، އަދި އީސީގެ މެމްބަރެއްގެ ހައިސިއްޔަތުން އެއްޗެއް ދަންނަވާނަމަ ސުޕްރިމް ކޯޓުގެ ނިހާއީ ހުކުމެއް ރައީސް ޔާމިންގެ މައްޗަށް ނާންނަހާ ހިނދަކު އެމަނިކުފާނަށް ރިޔާސީ އިންތިޚާބުގައި ވާދަކުރުމުގެ ފުރުސަތު އޮންނާނެކަމަށް ދެކެވަޑައިގަންނަވާކަމަށް ފުއާދު ވިދާޅުވި އެވެ.
"މެމްބާރެއްގެ ހައިސިއްޔަތުން، ނޫނީ އިލެކްޝަންސްގައި މަސައްކަތްކޮށްފައިވާ ފަރާތެއްގެ ގޮތުން ނޫނީ ވިއްޔާ ދިވެހި ރައްޔިތެއްގެ ގޮތުން އަޅުގަނޑު ދަންނަވާނީ ނިހާއީ ހުކުމެއް ނާންނަހާ ހިނދެއްގައި ވަރަށް ބޮޑަށް ފުރުސަތު އެބައޮތޭ. އެއީ ޝަރީއަތުގައި މައްސަލަ އޮތުމަކީ އަދި އަޅުގަނޑުމެން އެއްގޮތަކަށްވެސް އެ ބޭފުޅާއަކީ، ކުރީގެ ރައީސް އަބްދުالله ޔާމީން އަބްދުލްގައްޔޫމަށް ފުރުސަތު ނެތޭ ބުނުމުގެ ޖާގައެއް އޮތްކަމެއްކަމަކަށް އަޅުގަނޑު ނުދެކެން"
އިލެކްޝަން ކޮމިޝަންގެ ރައީސް ފުއާދު ތައުފީޤު
ފުއާދުގެ އެ ވާހަކަ އިތުރަށް ތަފްސީލުކޮށްދެއްވަމުން ވިދާޅުވީ މީގެ ކުރިންވެސް ރައީސް ޔާމީންގެ މައްޗަށް އުފުލި ދައުވާތަކުން އެމަނިކުފާނު ސުޕްރިމް ކޯޓު މަރުހަލާގައި ބަރީއަވެވަޑައިގެންފައި ވާކަމަށެވެ.
މިހާރުވެސް އެމަނިކުފާނު މައްޗަށް ދަށު ކޯޓުގައި އޮތް މައްސަލަ ހައިކޯޓުގައި އިސްތިއުނާފުކޮށްފައި ވާއިރު، އެ މައްސަލަ ވަކިކޮޅަކަށް ނިމުމުގެ ކުރިން ރައީސް ޔާމީނަށް ވާދަނުކުރެވޭނެކަމަށް ކަނޑައެޅިދާނެކަމަށް ގަބޫލުފުޅު ނުކުރައްވާކަމަށް ފުއާދު ވިދާޅުވިއެވެ.
އެއާއެކު ފުއާދު ވިދާޅުވީ އިންތިޚާބުގައި ކުރިމަތިލާން ބޭނުންވާ ފަރާތްތަކަށް ފުރުސަތު ދެވޭނެ އެންމެ ފަހި ގޮތްތައް ބެލުމަށް އިލެކްޝަން ކޮމިޝަނުން ފުޅާދާއިރާއެއްގައި މަސައްކަތް ކުރާނެ ކަމަށެވެ. އަދި އިންތިޚާބުގައި ބައިވެރިވުމަކީ އީސީއިން ބާރު އަޅާ ކަމެއްގެ ގޮތުގައި ފުއާދު ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
