މިއަހަރުގެ ފުޓްބޯޅަ ސީޒަން ފެއްޓުމުގެ ގޮތުން މިރޭ ކުޅެވުނު ޗެރިޓީ ޝީލްޑް މެޗު، ކްލަބް އީގަލްސް އާއި ވާދަކޮށް 2-1 ގެ ނަތީޖާއަކުން މާޒިޔާ ކާމިޔާބުކޮށްފި އެވެ.

މިއީ ސީޒަން ފެށުމުގެ ގޮތުން ކުޅެވޭ ޗެރިޓީ ޝީލްޑް މެޗު މާޒިޔާ އިން ކާމިޔާބުކުރި ފަސްވަނަ ފަހަރެވެ. މީގެ ކުރިން މާޒިޔާ އިން ވަނީ 2015، 2016، 2017، 2021 އަދި 2023 ވަނަ އަހަރު ޗެރިޓީ ޝީލްޑް މެޗު ކާމިޔާބުކޮށްފައެވެ. އަދި މިރޭގެ މެޗުން ބަލިވި އީގަލްސް އިން ވަނީ 2020 ވަނަ އަހަރު މާޒިޔާ ބަލިކޮށް ޝީލްޑް އުފުލާލައިފަ އެވެ.

މިރޭގެ މެޗުގެ ފުރަތަަމަ ހާފުގެ 15 ވަނަ މިނެޓުގައި މާޒިޔާއަށް ލީޑު ނަގައިދިނީ ހަސަން ރާއިފް އަހުމަދު (ހަންނަ) އެވެ. މިއީ އެޓީމުގެ ހައިޝަމް ހަސަން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. 

މާޒިޔާގެ ދެވަނަ ލަނޑު ފުރަތަމަ ހާފުގެ 18 ވަނަ މިނިޓްގައި ކާމިޔާބުކޮށްދިނީ އެޓީމުގެ ސާބިއާ ފޯވާޑް، ސްޓެފަން މިހަލޮވިޗް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން މާޒިޔާ ކުރީގައި އޮވެގެންނެވެ.

ފުރަތަަމަ ހާފުގައި އީގަލްސްގެ ކުރިއަށް ކުޅުނު ކުޅުންތެރިންގެ ފަރާތުން މާޒިޔާގެ ގޯލާ އަމާޒުކޮށް ނުރައްކާތެރި ހަމަލާއެއް ފޮނުވާލެވިފައި ނުވާއިރު، ދެ ވަނަ ހާފަށް އެޓީމުން ނުކުތީ ބަދަލަކާ އެކު އެވެ. އެގޮތުން އިސްމާއީލް އީސާގެ ބަދަލުގައި ބްރެޒިލްގެ ފޯވާޑް އިވާން ކާލޯސް ވަނީ ކުޅެން ނުކުމެފަ އެވެ.

މެޗުގެ ދެވަަނަ ހާފުގައި އީގަލްސް އިން ވަނީ އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން އެޓީމުގެ ކެޕްޓަން ރިޒޭއަށް މުޅިން ހުސްކޮށް ލިބުނު ފުރުސަތެއްގައި އޭނާ ފޮނުވާލި ބޯޅަ އަމާޒުވީ ގޯލުގެ އަރިމަތީ ދާގަނޑަށެވެ. މީގެއިތުރުންވެސް އެޓީމުގެ ބްރެޒިލް ފޯވާޑް އިވާން ވަނީ އެޓީމަށް ލަނޑެއް ކާމިޔާބުކޮށް ދީފައެވެ. ނަމަވެސް ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. ނަމަވެސް ރެފްރީގެ އެ ނިންމުމާ މެދު އީގަލްސްގެ ބެންޗުން ވަރަށް ބޮޑަށް ހިތްހަމަނުޖެހުން ފާޅުކުރި އެވެ.

މި މެޗުގައި އީގަލްސް އިން ކާމިޔާބުކުރި ހަމައެކަނި ލަނޑު ދެވަނަ ހާފުގެ 72 ވަނަ މިނިޓްގައި ކާމިޔާބުކޮށްދިނީ އެޓީމުގެ ބިދޭސީ ޑިފެންޑަރު، ޖަހަންގިރު ބަހޯދިރު އެވެ. މިއީ މާޒިޔާގެ ޕެނަލްޓީއޭރިއާގެ ބޭރުން އެޓީމަށް ލިބުނު ހިލޭ ޖެހުމަކުން ޕެނަލްޓީއޭރިއާ ތެރެއަށް ހުރަސްކޮދިން ބޯޅައެއްގައި އޭނާ ކާމިޔާބުކޮށްދިން ލަނޑެކެވެ.

އީގަލްސްގެ ލަނޑަށްފަހު ލީޑު ފުޅާކުރުމަށް މާޒިޔާއަށް ލިބުނު ފުރުސަތުތަކުގައި އެޓީމަށް ބޭނުންނުކުރެވުނުއިރު އީގަލްސްއަށް ވެސް މެޗުގެ ނަތީޖާ ހަމަހަމަ ކުރުމަށް ލިބުނު ފުރުސަތުތަކުގައި ބޭނުންހިފޭ ގޮތެއްނުވިއެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން މާޒިޔާ ކުރީގައި އޮވެގެންނެވެ.