އެކައުންޓަންޓް ޖެނެރަލްގެ މަޤާމަށް މުހައްމަދު އާޒާދު އައްޔަންކޮށްފި
މާލިއްޔަތު ޤާނޫނުގެ 44 ވަނަ މާއްދާގެ ދަށުން އުފައްދަން ކަނޑައަޅާފައިވާ އެކައުންޓެންޓު ޖެނެރަލްގެ މަޤާމު އުފައްދަވާ އެ މަޤާމަށް މުހައްމަދު އާޒާދު އައްޔަންކޮށްފި އެވެ.
އެކައުންޓަންޓް ޖެނެރަލް އަކީ ދައުލަތުގެ ފައިސާއާއި، ހިސާބާއި ހިސާބުގެ ލިޔެކިޔުންތަކުގެ ނިޒާމް، މި ގާނޫނާއި ދައުލަތުގެ މާލިއްޔަތުގެ ގަވާއިދުގައި ކަނޑައަޅާފައިވާ ގޮތުގެމަތިން ބެލެހެއްޓުމާއި ހިންގުމުގެ މަސްއޫލިއްޔަތު އަދާކުރުމަށް މާލިއްޔަތު ގާނޫނުން މަތިކޮށްފައިވާ ފަރާތެވެ.
ދައުލަތުގެ ފައިސާ ބަލައިގަނެވެނީ، ނުވަތަ ރައްކާތެރިކަމާއެކު ބެލެހެއްޓެނީ، ނުވަތަ ހަރަދުކުރެވެނީ، ނުވަތަ އިންވެސްޓްކުރެވެނީ މި ގާނޫނާއި ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވާ ގޮތުގެމަތިންތޯ ބެލުމާއި، ދައުލަތުގެ މުދާ ގަނެވެނީ، ނުވަތަ ރައްކާތެރިކަމާއެކު ބެލެހެއްޓެނީ، ނުވަތަ ބޭނުންކުރެވެނީ، ނުވަތަ ވިއްކެނީ، ނުވަތަ ނައްތާލެވެނީ،ނުވަތަ ދޫކޮށްލެވެނީ މި ގާނޫނާއި ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވާ ގޮތުގެމަތިންތޯ ބެލުމަކީ އެކައުންޓަންޓް ޖެނެރަލްގެ ޒިންމާއެކެވެ.
އޭގެ އިތުރުން އިތުރުން ދައުލަތުގެ މާލިއްޔަތުގެ ގަވާއިދުގެ ދަށުން ކަނޑައަޅާ އެނޫންވެސް ކަންކަމަކީ އެކައުންޓެންޓު ޖެނެރަލްގެ މަސްއޫލިއްޔަތުގެ ތެރޭގައި ހިމެނޭ ކަންކަމެވެ.
އެ މަގާމަށް މުހައްމަދު އާޒާދު އައްޔަންކޮށްފައިވަނީ ފިނޭންސް މިނިސްޓަރުގެ ލަފާފުޅާއެކު ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހެވެ.
Advertisement
This content is created and paid for by advertisers and does not involve Voice Journalists