އަވައްޓެރި ބަންގްލަދޭޝްގައި ހުންނަ އަންނައުނު މާކެޓެއްގައި އަލިފާން ރޯވެ އަނދައިފިއެވެ.

ހާހަކަށްވުރެ ގިނަ އަންނައުނު ފިހާރަ ހުންނަ މި މާކެޓުގައި ރޯވެ ގިނަ ބަޔަކަށް އެކި ވަރުގެ އަނިޔާތައް ވަނީ ލިބިފައެވެ. އެއްވެސް މީހަކު މަރުވެފައިވާ ކަމަކަށް މިހާތަނަށް ރިޕޯޓް ކޮށްފައެއް ނުވެއެވެ.

ބަންގާބާޒާރުގައި ރޯވި އަލިފާން ގަނޑު ކޮންޓްރޯލް ކުރުމަށް އެތައްސަތޭކަ ފަޔަރފައިޓަރުންނަކާއި އެތައް އަރމީ އޮފިސަރުންނެއް ވަނީ މަސައްކަތް ކޮށްފައެވެ. އަލިފާން ގަނޑު ކޮންޓްރޯލް ކުރެވިފައިވަނީ ޖީއެމްޓީ ގަޑިން 6:45 ގައެވެ. އަލިފާން ގަނޑު ރޯވެ 6 ގަޑިއިރު ވަންދެން އަނދައިފައިވެއެވެ.

މިއަލިފާނުގެ ހާދިސާއާއި ގުޅިގެން އެ މާރކެޓްގައި ފިހާރަ ހިންގާ ފަރާތްތަކަށް ކުރިމަރިމަތިވެފައިވަނީ ފޫނުބެއްދޭ ވަރުގެ ގެއްލުންތަކެއް ކަމަށް އެ މާރކެޓްގައި ފިހާރަ ހިންގާ ފަރާތްތަކުން ވަނީ ބުނެފައެވެ. ކުރިއަށް އޮތް ފިޠުރު ޢީދަށް މުދާ ވައްދައި ފިހާރަތައް ތައްޔާރު ކޮށްފައި އޮއްވައި މިފަދަ ބޮޑު ހާދިސާއެއް ހިނގުމުން ވިޔަފާރިވެރިން ތިބީ މުޅިން މާޔޫސްވެފައެވެ.

ބަންގާބާޒާރު އެސޯސިއޭޝަންގެ އޮފިޝަލަލް ޑީއެމް ހަބީބް އަލްޖަޒީރާއަށް ބުނެފައިވަނީ 3000 އެއްހާ ފިހާރަ ހަދައިފައި ހުންނަނީ ލަކުޑިއާއި ޓިނުން ކަމަށެވެ. އެ ހުރިހާ ފިހާރައެއް އަނދައި ހުލިވެފައި ވާކަމަށް އޭނާ ވަނީ ބުނެފައެވެ.

"މަރކެޓް މިވަގުތު އޮތީ ރެޑީމޭޑް ހެދުން ތަކުން ފުރިފައި، ބައެއް ވިޔަފާރިވެރިން އިތުރު ސްޓްކްވެސް ވައްދާފަ ހުރީ، ޢީދަށް ދެހަފްތާއެއް ހާ ދުވަސް މިއޮތީ ދެން، ކޮންމެއަކަސް އެތައް ސަތޭކަ މިލިއަން ރުފިޔާގެ ގެއްލުން މިވަނީވެފައި، ލިބުނު ގެއްލުން އަންދާޒާކޮށްލާފަވެސް ބުނާކަށް ނޭނގެ" ހަބީބް ބުނެފައިވެއެވެ.

އެއްބައި ވިޔަފާރިވެރިން ބުނެފައިވަނީ ޢީދަށް މުދާ ވެއްދުމަށް އެމީހުން ލޯނު ނަގައިގެން މުދާ ގަނެ ފިހާރައަށް ވެއްދިކަމަށެވެ. އަދި އެހުރިހާ ފައިސާއެއް ގެއްލުނީ ކަމަށް ބުނެފައިވެއެވެ.

ބަންގާބާޒާރުގައި އަލިފާން ރޯވާން މެދުވެރިވި މައިގަނޑު ސަބަބެއް އަދި ބަންގްލަދޭޝްގެ ކަމާއިބެހޭ ފަރާތްތަކަށް ހޯދިފައެއް ނުވެއެވެ.