އިންޓަނޭޝަނަލް ބްރޭކަށް ފަހު ސައުދީ ޕްރޮފެޝަނަލް ލީގުގެ ކުޅުން މިރޭ އަލުން ފެށިއިރު، ރަށުން ބޭރުގައި އަލް އަދަލްހް އާއި ވާދަކުރި މެޗު ފަސޭހަކަމާއެކީ 5-0 ގެ ނަތީޖާއަކުން އަލް ނަސްރު އިން ކާމިޔާބުކޮށްފި އެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔައިރު، ފުރަތަަމަ ހާފުގެ 40 ވަނަ މިނެޓުގައި އަލް ނަސްރަށް ލިބުނު ޕެނަލްޓީއަކުން އެޓީމަށް ލީޑު ހޯދައިދިނީ ކެޕްޓަން ކްރިސްޓިއާނޯ ރޮނާލްޑޯއެވެ.

ދެވަަނަ ހާފު ފެށިގެން 55 ވަނަ މިނެޓުގައި އަލް ނަސްރުގެ ދެވަަނަ ލަނޑު ކާމިޔާބުކޮށްދިނީ އެޓީމުގެ ބްރެޒިލް މިޑްފީލްޑަރު ޓަލިސްކާއެވެ. މިއީ އެޓީމުގެ ޑިފެންޑަރު އަލް އަމްރީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އަލް ނަސްރުގެ ތިން ވަނަ ލަނޑު ޓަލިސްކާ ތަނަވަސްކޮށްދިން ފުރުސަތެއްގައި ދެވަަނަ ހާފުގެ 66 ވަނަ މިނެޓުގައި ކާމިޔާބުކޮށްދިނީ ރޮނާލްޑޯ އެވެ. މިއީ މިސީޒަނުގައި އަލް ނަސްރުއާއި ގުޅުނުފަހުން ލީގުގައި ކުޅުނު 9 މެޗުގައި ރޮނާލްޑޯ އެޓީމަށް ކާމިޔާބުކޮށްދިނީ 11 ވަނަ ލަނޑެވެ.

މި މެޗުގައި އަލް ނަސްރުގެ ހަތަރު ވަނަ ލަނޑު ދެވަނަ ހާފުގެ 78 ވަނަ މިނެޓުގައި ކާމިޔާބުކޮށްދިނީ ވެސް ޓަލިސްކާ އެވެ. މިއީ ލީގުގައި ކުޅުނު 16 މެޗުގައި ބްރެޒިލްގެ މިޑްފީލްޑަރު ކާމިޔާބުކޮށްދިން 16 ވަނަ ލަނޑެވެ.

އަލް ނަސްރުގެ ފަސްވަނަ ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ޒުވާން މިޑްފިލްޑަރ އައިމަން ޔަހުޔާ އެވެ. 

މިރޭގެ މެޗުގެ ލިބުނު ތިން ޕޮއިންޓާއެކު 22 މެޗުން ލިބުނު 52 ޕޮއިންޓާއެކު އަލް ނަސްރު މިވަގުތު އޮތީ ލީގު ތާވަލްގެ ދެވަނައިގައި އެވެ. އެއްވަނައިގައި އޮތީ 22 މެޗުން 53 ޕޮއިންޓް ހޯދާފައިވާ އަލް އިއްތިހާދު އެވެ. އެޓީމު ވަނީ މިރޭ އަމިއްލަ ދަނޑުގައި ދަމަކް އަތުން 3-0 ގެ ނަތީޖާއަކުން މޮޅުވެފައެވެ. މިރޭގެ މެޗުން ބަލިވި އަދަލްހް 22 މެޗުން ލިބުނު 17 ޕޮއިންޓާއެކު ތާވަލްގެ 15 ވަނައިގައެވެ.