އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ލިވަޕޫލް އާއި ދެކޮޅަށް ޗެލްސީ ކުޅުނު މެޗު، ދެޓީމުންކުރެ ޓީމަކަށް ލަނޑެއް ކާމިޔާބު ނުކުރެވި އެއްވަރުވެގެން ނިމިއްޖެއެވެ.

މިއީ ޗެލްސީގެ ކޯޗު ގްރަހަމް ޕޮޓާ މަގާމުން ވަކިކުރި ފަހުން އެޓީމު ކުޅުނު ފުރަތަަމަ މެޗެވެ. މި މެޗުގެ ފުރަތަަމަ ހާފުގައި ޗެލްސީގެ ފަރާތުން ރަގަޅު އެޓޭކިންގް ކުޅުމެއް ފެނިގެންދިޔަ އިރު، ފުރަތަަމަ ހާފުގެ ހަ ވަނަ މިނެޓުގައި ޗެލްސީގެ ކްރޮއޭޝިޔާ މިޑްފީލްޑަރު މެޓްރޯ ކޮވަސިކް ފޮނުވާލި ހަމަލާ ލިވަޕޫލްގެ ޑިފެންޑަރު އިބްރާހިމާ ކޯނާޓޭ ބްލޮކް ކުރީ ގޯލު ރޮނގުމަތިންނެވެ.

ފުރަތަަމަ ހާފުގެ 12 ވަނަ މިނެޓުގައި ޗެލްސީގެ ޖަރުމަން މިޑްފީލްޑަރު ކައި ހާވަޓްޒް ފޮނުވާލި ބާރު ހަމަލާ ލިވަޕޫލްގެ ގޯލްކީޕަރު އެލިސަން ދިފާއުކުރިއިރު، ފުރަތަަމަ ހާފުގެ 25 ވަނަ މިނެޓުގައި ޗެލްސީގެ އިގިރޭސި ޑިފެންޑަރު ރީސް ޖޭމްސް ވަނީ އެޓީމަށް ލަނޑެއް ކާމިޔާބުކޮށްދީފައެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެބޯޅަ ޖޭމްސް އަށް ލިބުމުގެ ކުރިން ޗެލްސީގެ ކުޅުންތެރިއެއް އޮފްސައިޑް ވެފައިވާކަމަށެވެ.

ދެވަަނަ ހާފު ފެށިގެން ތިން ވަނަ މިނެޓުގައި ކޮވަސިކްއަށް ލިބުނު ހުސް ފުރުސަތެއްގައި އޭނާ ފޮނުވާލި ބޯޅަ ގޯލާއި އަމާޒުނުވެ މާ މަތިން ދިޔައިރު، 50 ވަނަ މިނެޓުގައި ކައި ހާވަޓްޒް ވަނީ އަނެއްކާވެސް ޗެލްސީއަށް ލަނޑެއް ކާމިޔާބުކޮށްދީފައެވެ. ނަމަވެސް މިފަހަރުވެސް ވީއޭއާރުން ބެލުމަށްފަހު ރެފްރީ ނިންމީ ބޯޅަ ގޯލަށް ވަނުމުގެ ކުރިން ކައި ހާވަޓްޒް އަތުގައި ޖެހިފައިވާތީ އެއީ ރަގަޅު ލަނޑެއް ނޫންކަމަށެވެ.

ދެވަަނަ ހާފުގެ ފަހުކޮޅު ލިވަޕޫލުން ލިވަޕޫލުން އެޓީމުގެ ކުޅުން ރަނގަޅުކޮށް ޗެލްސީގެ ގޯލާއި އަމާޒުކޮށް ރަގަޅު ހަމަލާތަކެއް ފޮނުވާލި ނަމަވެސް ދެޓީމުންކުރެ އެއްވެސް ޓީމަކަށް މި މެޗުގައި ލަނޑެއް ކާމިޔާބުކުރެވޭގޮތެއް ނުވިއެވެ. މި ދެޓީމު ލީގުގައި އެންމެ ފަހުން ކުޅުނު 4 މެޗު އެއްވަރުވެގެން ނިމިފައިވާ އިރު، އެންމެ ފަހުން ކުޅުނު ދެ މެޗުވެސް ނިމުނީ 0-0 ގެ ނަތީޖާއަކުން ދެޓީމު އެއްވަރު ވެގެންނެވެ.

މިރޭގެ މެޗުން ލިބުނު ޕޮއިންޓާ އެކު 28 މެޗުން ލިވަޕޫލަށް 43 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ 8 ވަނައިގައެވެ. މި މެޗުން ލިބުނު އެއް ޕޮއިންޓާއެކު 29 މެޗު ކުޅެގެން ޗެލްސީއަށް 39 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ 11 ވަނައިގައެވެ.