ޖަރުމަނު ކަޕްގެ ކުއާޓާ ފައިނަލުގައި މިރޭ އަމިއްލަ ދަނޑުގައި ފްރެއިބާގް އަތުން ބަލިވެ ބަޔާން މިއުނިކް މުބާރާތުން ކަޓައިފި އެވެ. މި މެޗު ފްރެއިބާގް އިން ކާމިޔާބުކުރީ 2-1 ގެ ނަތީޖާއަކުންނެވެ.

މިރޭގެ މެޗުގެ ފުރަތަަމަ ހާފުގެ 19 ވަނަ މިނެޓުގައި ބަޔާން މިއުނިކަށް ލީޑު ހޯދައިދިނީ އެޓީމުގެ ފްރާންސް ޑިފެންޑަރު ދަޔޯޓް އަޕަމެކާނޯ އެވެ. މިއީ އެޓީމުގެ މިޑްފިލްޑަރު ޖޯޝުއާ ކިމިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފްރެއިބާގަށް މެޗުގެ ނަތީޖާ އެއްވަރުކޮށްދިނީ ފުރަތަމަ ހާފުގެ 27 ވަނަ މިނެޓުގައި ތަޖުރިބާކާރު މިޑްފިލްޑަރު ނިކޮލަސް ހޮފްލަރ އެވެ. ފްރެއިބާގްގެ ލަނޑަށްފަހު ލީޑު ނެގުމަށް ބަޔާންގެ މިޑްފީލްޑަރު ތޯމަސް މުލާއަށް ވަނީ ހުސް ދެ ފުރުސަތު ލިބި ބޭނުންކުރެވޭ ގޮތްނުވެފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

Advertisement

ދެވަަނަ ހާފްގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ބަޔާން މިއުނިކުންނެވެ. ނަމަވެސް މިހާފުގައި ވެސް ދޭތެރެދޭތެރެއިން ފްރެއިބާގް އިން ދިޔައީ ރަގަޅު ފުރުސަތުތަކެއް ތަނަވަސްކުރަމުންނެވެ. މިގޮތުން ދެވަަނަ ހާފުގެ އިތުރު ވަގުތުގައި އެޓީމަށް ލިބުނު ޕެނަލްޓީއަކުން ތަޖުރިބާކާރު ފޯވާޑް ލޫކަސް ހޯލަރ ވަނީ ލަނޑެއް ކާމިޔާބުކޮށް އެޓީމަށް މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްދީފަ އެވެ.

މި މެޗުން ބަލިވެ ބަޔާން މުބާރާތުން ކެޓިއިރު، އެޓީމުގެ ކޯޗު ޓުޗެލް ޓީމާއި ހަވާލުވެ ކުޅުނު ފުރަތަަމަ މެޗުގައި ބޮރޫޝިއާ ޑޯޓްމަންޑް އަތުން މޮޅުވެ ލީގުގެ އެއްވަނަ މަގާމު އަލުން އެޓީމަށް ވަނީ ހޯދައިދީފައެވެ.