ކޮޕާ ޑެލްރޭ ސެމީ ފައިނަލުގެ ދެވަަނަ ލެގުގައި މިރޭ ރަށުން ބޭރުގައި ބާސެލޯނާ 4-0 ގެ ނަތީޖާއަކުން ބަލިކޮށް ރެއާލް މެޑްރިޑުން އެޓީމު ލަދުގަންނަވާލައިފި އެވެ.

ރެއާލް މެޑްރިޑްގެ ދަނޑުގައި ކުޅެވުނު ފުރަތަަމަ ލެގު ބާސެލޯނާ އިން 1-0 ގެ ނަތީޖާއަކުން މޮޅުވެފައި އޮތުމުން މިރޭގެ މެޗު އެއްވަރު ކޮށްލައިގެން ވެސް އެޓީމަށް ފައިނަލަށް ދިއުމުގެ ފުރުސަތު އޮތެވެ. އަދި މި ދެޓީމު އެންމެ ފަހުން ކުޅުނު ދެ މެޗުން އެޓީމު މޮޅުވެފައި އޮތުމުން މިރޭގެ މެޗު ބާސެލޯނާ އިން ފެށީ އިތުބާރާއި އެކުގައެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅުނީ ބާސެލޯނާ އިންނެވެ. ނަމަވެސް ފުރަތަަމަ ހާފުގެ އިތުރު ވަގުތުގެ ތެރޭގައި ރެއާލް މެޑްރިޑުން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މި ލަނޑު އެޓީމަށް ކާމިޔާބުކޮށްދިނީ ބްރެޒިލްގެ ފޯވާޑް ވިނީޝިއަސް ޖޫނިއަރ އެވެ. މިއީ އެޓީމުގެ ކެޕްޓަން ކަރީމް ބެންޒީމާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

Advertisement

ދެވަަނަ ހާފު ފެށިގެން ރެއާލް މެޑްރިޑުން ވަނީ ގާތްގާތުގައި ދެ ލަނޑު ކާމިޔާބުކޮށް ބާސެލޯނާ ޕްރެޝަރަށް ވައްޓާލާފައެވެ. މި ގޮތުން އެޓީމުން އުފެއްދި ކައުންޓާ އެޓޭކެއްގައި ދެވަަނަ ހާފްގެ 50 ވަނަ މިނެޓުގައި ލޫކަ މޮޑްރިޗް ތަނަވަސްކޮށްދިން ފުރުސަތެއްގައި ބެންޒީމާ އެޓީމުގެ ދެވަަނަ ލަނޑު ކާމިޔާބުކޮށްދިން އިރު 58 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ރެއާލްގެ ތިންވަނަ ލަނޑު ކާމިޔާބުކޮށްދިނީ ވެސް ބެންޒީމާ އެވެ.

ރެއާލްގެ ހަތަރު ވަނަ ލަނޑު ދެވަނަ ހާފުގެ 80 ވަނަ މިނެޓުގައި ވިނީޝިއަސް ޖޫނިއަރ ތަނަވަސްކޮށްދިން ފުރުސަތެއްގައި ކާމިޔާބުކޮށްދީ ބެންޒީމާ ވަނީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ.

މިރޭގެ މެޗުގެ ދެވަނަ ހާފުގައި ރެއާލް މެޑްރިޑްގެ ފަރާތުން ތަފާތު މޮޅު ކުޅުމެއް ފެނިގެންދިޔަ އިރު، ލީގުގައި މިދެޓީމު ދެމެދުގައި 12 ޕޮއިންޓުގެ ފަރަގެއް އެބައޮތެވެ.

މުބާރާތުގެ ފައިނަލުގައި ރެއާލް މެޑްރިޑް ވާދަކުރަންޖެހެނީ ސެމީގައި އެތްލެޓިކް ބިލްބާއޯ ބަލިކޮށް ފައިނަލުން ޖާގަ ހޯދި އޮސަސޫނާ އާއި ދެކޮޅަށެވެ. ފައިނަލް މެޗު ކުޅުމަށް ހަމަޖެހިފައިވަނީ މެއި މަހުގެ 6 ވަނަ ދުވަހު އެވެ.