އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ބްރެންޓްފޯޑާއި ވާދަކުރި މެޗު 1-0 ގެ ނަތީޖާއަކުން މެންޗެސްޓާ ޔުނައިޓެޑް ކާމިޔާބުކޮށްފި އެވެ.

މިދެޓީމު މިސީޒަނުގައި ބްރެންޓްފޯޑް ދަނޑުގައި ކުޅުނު މެޗު 4-0 ގެ ނަތީޖާއަކުން ޔުނައިޓެޑް ވަނީ ބަލިވެފަ އެވެ. އަދި ލީގުގައި އެންމެ ފަހުން ކުޅުނު މެޗުގައި ނިއުކާސަލް ޔުނައިޓެޑް އަތުން ބަލިވެ ލީގުގެ ތިންވަނަ މަގާމު ގެއްލުނު އިރު، ފަސްވަނައިގައި އޮތް ޓޮޓެންހަމް އޮތީ ފަހަތުގައި ވިއްދާފައި އެވެ.

ޔުނައިޓެޑުގެ އޯލްޑް ޓްރެފޯޑުގައި ކުޅުނު މި މެޗުގެ ފުރަތަަމަ ހާފުގެ 27 ވަނަ މިނެޓުގައި އެޓީމަށް ލީޑު ހޯދައިދިނީ ރަޝްފޯޑް އެވެ. މިއީ އެޓީމުގެ އޮސްޓްރިއާ މިޑްފީލްޑަރު މާސެލް ސަބިޓްޒަރ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މޮޅަށް ކުޅެ ޔުނައިޓެޑުން ގިނަ ފުރުސަތުތަކެއް ތަނަވަސްކުރި ނަމަވެސް މި ހާފުގައި އެޓީމަށް އިތުރު ލަނޑެއް ކާމިޔާބުކުރެވޭގޮތެއް ނުވިއެވެ.

ދެވަަނަ ހާފްގައި ބްރެންޓްފޯޑުން އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރި ނަމަވެސް މި ހާފުގައި ވެސް ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި މެޗު ނިމިގެންދިޔައީ 1-0 ގެ ނަތީޖާއަކުން މެންޗެސްޓާ ޔުނައިޓެޑް މޮޅުވެގެންނެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 28 މެޗުން މެންޗެސްޓާ ޔުނައިޓެޑަށް 53 ޕޮއިންޓް ލިބިފައިވާއިރު މިވަގުތު އެޓީމު އޮތީ ލީގު ތާވަލްގެ 4 ވަނައިގައެވެ. ތިންވަނައިގައި އޮތް ނިއުކާސަލް ޔުނައިޓެޑަށް ވެސް 28 މެޗުން 53 ޕޮއިންޓް ލިބިފައިވާއިރު އެޓީމަށް ތިންވަނަ ލިބެނީ ލަނޑުގެ ތަފާތުންނެވެ.

މިރޭގެ މެޗުން ބަލިވި ބްރެންޓްފޯޑަށް 29 މެޗު ކުޅެގެން ލިބިފައިވަނީ 43 ޕޮއިންޓާއެކު ތާވަލްގެ 9 ވަނަ އެވެ.