ސިޔާސީ ގޮތުން ފިކުރު ތަފާތުވެގެން އެއްވެސް ފަރާތަކަށް ވަޒީފާގެ ބިރެއް ނޯންނާނެކަމަށާއި އެހެން ނަމަވެސް ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހުގެ ސިޔާސަތާއި ދެކޮޅު މީހުން މަޤާމުތަކުން ވަކިކުރެވޭނެކަމަށް ސަރުކާރުން ބުނެފިއެވެ. 

ސަރުކާރާއި، ސަރުކާރު ކުންފުނިތަކުގެ އިސް މަޤާމުތަކުގައި ތިއްބަވާ އެމްޑީޕީގެ ރައީސް މުޙައްމަދު ނަޝީދަށް ތާއީދުކުރައްވާ ގިނަ މެންބަރުންތަކެއް މިފަހުން ވަނީ މަޤާމުން ވަކިކުރައްވާފަ އެވެ. 

އެކަމާއި ގުޅޭގޮތުން މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބުދެއްވަމުން ރައީސް އޮފީހުގެ ތަރުޖަމާނު މިއުވާން މުޙައްމަދު ވިދާޅުވީ މި ސަރުކާރުން އެއްވެސް ފަރާތަކަށް ވަޒީފާގެ ބިރު ނުދައްކާ ކަމަށެވެ. 

Advertisement

އެހެން ނަމަވެސް ސިޔާސީ މަޤާމުތަކަށް މީހުން އައްޔަންކުރަނީ ރައީސުލްޖުމްޙޫރިއްޔާއަށް ޤާނޫނު އަސާސީން ލިބޭ ބާރުގެ ބޭނުން ހިއްޕައވައިގެން ރައީސްގެ ސިޔާސަތުތައް ތަންފީޒުކުރުމަށް ކަމަށްވާއިރު، މަޤާމުތަކުގައި ތިއްބަވާ އެ ސިޔާސަތުތަކަށް ފާޑުވިދާޅުވާނަމަ، އެފަދަ ފަރާތްތަކަށް ސިޔާސަތު ތަންފީޒު ނުކުރެވޭނެކަން އެއީ ޤަބޫލުކުރަން ޖެހޭ ކަމެއްކަމަށް މިއުވާން ވިދާޅުވި އެވެ. 

އަދި މަޤާމުތަކުގައި ތިއްބަވާ ރައީސްގެ ސިޔާސަތާއި ދެކޮޅަށް ފާޑުވިދާޅުވާނީ ސިޔާސީގޮތުން ކުފޫ ހަމަނުވާތީކަމަށް އޭނާ ވިދާޅުވިއެވެ. އެއާއެކު މިއުވާން ވިދާޅުވީ އެފަދަ ބޭފުޅުން މަޤާމުތަކުން ވަކިކުރެވޭނެ ކަމަށެވެ. 

އެކަން ފާހަގަކުރައްވާ މިއުވާން ވިދާޅުވީ އާންމު ވަޒީފާތަކުގައި ތިއްބަވާ ފަރާތްތަކަށް ވަޒީފާއާއި ބެހޭ ޤާނޫނުގައި ބަޔާންކޮށްފައިވާ ވަޒީފާގެ ރައްކާތެރިކަމާއި ކަށަވަރުކަން ސަރުކާރުން ޔަގީންކޮށްދޭނެ ކަމަށެވެ. އަދި އެއްވެސް ފަރާތަކަށް ވަޒީފާގެ ބިރު ސަރުކާރުން ނުދައްކާނެ ކަމަށެވެ. 

މިއުވާން އިތުރަށް ވިދާޅުވީ ރިޔާސީ އިންތިޚާބަށް ޖުމްހޫރީ ޕާޓީން ނިކުތުމަށް ނިންމުމާއި ގުޅިގެން، އެ ޕާޓީގެ ސްލޮޓުތަކުގައި ތިއްބެވި ފަރާތްތަކާއި ދޭތެރޭ އަމަލުކުރާނެ ގޮތެއް ސަރުކާރުން ޖޭޕީއާއި މަޝްވަރާ ކުރައްވާނެ ކަމަށެވެ. 

ކޯލިޝަން ދެމެހެއްޓުމުގެ މަސައްކަތްޕުޅު ރައީސް ޞާލިހު ކުރައްވަމުން ގެންދަވާކަމަށާއި، އިޚްލާސްތެރިކަމާއެކު މަސައްކަތްކުރަން ބޭނުންވާ ފަރާތްތަކަށް އެ ފުރުސަތު އޮތްކަމަށް މުއުވާނު ވިދާޅުވި އެވެ.