މޫނު ބުރުގާ އެޅިޔަސް އެކުދިންނާއި މެދު ތަފާތު ކުދިންތަކެއްގެ ގޮތަށް ޢަމަލުކުރެވިވެގެން ނުވާނެ ކަމަށް ޢަރަބިއްޔާ ސްކޫލްގެ މޫނުބުރުގާ އަޅާ ކުދިން ގެ ވަކީލާ އަލްއުސްތާޒާ ޢާޒިމާ ޝުކޫރު ވިދާޅުވެއްޖެއެވެ.
ޢާޒިމާ މިފަދައިން ވިދާޅުވީ މޫނުބުރުގާ މައްސަލަ އާއި ގުޅިގެން އޭނާ ވޮއިސް އަށް ދެއްވި ޚާއްސަ ބަސްދީގަތުމެއްގައެވެ.
އެގޮތުން ވާހަކަ ދައްކަވަމުން ޢާޒިމާ ވިދާޅުވީ އޭނާ އާއި ހިސާބަށް މައްސަލަ މީގެ ދެތިން މަހެއްހާ ދުވަސް ކުރިން އައިރު މޫނު ބުރުގާ އަޅާ ކުދިންނާއި ބެލެނިވެރިންގެ ތެރެއިން މޫނު ބުރުގާ އަޅާ އަންހެން ބެލެނިވެރިންނާއި މެދު ކަންކުރާ ގޮތާއި މެދުގައި ބެލެނިވެރިންގެ ކަންބޮޑުވުންތަކެއް ހުރިކަމަށެވެ.
އެގޮތުން ރަސްމީ ބައްދަލުވުންތަކުގައި އަންހެން ބެލެނިވެރިންގެ ތެރެއިން މޫނު ބުރުގާ އަޅާ ބެލެނިވެރިންނާއި ދިމާއަށް އެ ބެލެނިވެރިންގެ އަޑަކީ އައުރައަކަށް ވާއިރު ތަންތަނަށް ގޮސް އަޑު އުފުލަނީ ކީއްވެތޯއޭ ބުނެ ސުވާލުކޮށްފައި ވާކަމަށެވެ.
މިމައްސަލައިގައި ބެލެނިވެރިން އޭނާ އާއި ފުރަތަމަ ބައްދަލު ކުރީ ޤާނޫނީ ލަފަޔަކަށް އެދިގެން ކަމަށާއި، މިމައްސަލައިގައި އޭނާ އެންމެ ބޮޑު ކަންބޮޑުވުމަކަށްވީ މޫނު ބުރުގާ އަޅައިގެން ސްކޫލަށް ދާ ކުދިންނަކީ ތަފާތު ކުދިން ތަކެއްގެ ގޮތުގައި އިހްސާސު ވާފަދައިން އެކުދިންނާއި މެދު ޢަމަލުކުރާ ޢަމަލުކުރުން ކަމަށެވެ.
އެގޮތުން އެކުދިން ސްކޫލަށް ހާޒިރުވުމުން ކައުންސިލަރ ކޮޓަރިއަށް ގެންގޮސް އެކުދިންގެ ގޭތެރޭގެ ދިރިއުޅުމާއި މެދު ސުވާލުކޮށް ހަދާ ކަން އެނގިފައި ވާކަމަށެވެ. އަދި އަތްތިލަ އަކީ އައުރައަކަށް ވާއިރު މޫނު ނިވާކުރާއިރު އަތްތިލަ ނިވާ ނުކުރަނީ ކީއްވެތޯ އާއި މިފަދަ ސުވާލުތައް ކުރާކަން އެނގިފައިވާ ކަމަށް ޢާޒިމާ ވިދާޅުވިއެވެ.
އަދި ސްކޫލްގެ އިމްތިހާނު ހޯލުގައި ކުދިން އިމްތިހާނު ހަދަން ތިއްބައި މާސްކުން މޫނު ނިވާ ކޮށްގެން ތިބޭ އަންހެންކުދިންގެ މާސްކު ނަގުވައި، އިސް ދަށަށް ޖެހުމުން އިސް އުފުލަން މަޖުބޫރުކުރުވާ، ރަސްމީ ބައްދަލުވުންތަކުގައި ދެން ޢަރަބިއްޔާ ކުދިން ފެންނާނީ ސީރިޔާ ގައި ތިއްބައި ކަމަށް ބުނުމާއި، އެކުދިން ބޮޑުވެގެން ވާން ބޭނުންވަނީ ޓެރަރިސްޓުންނަށް ތޯ ސުވާލު ކޮށް ހަދައިފައި ވާކަމަށް ޢާޒިމާ ވޮއިސް އަށް ދެއްވި ޚާއްސަ ބަސްދީގަތުމުގައި ވިދާޅުވިއެވެ.
"ސަރުކާރުގެ ކަންބޮޑުވުން ތަކެއް ހުރެދާނެ، ހުންނާނެ އެކޭ ނޫން، ހުރުން "ލެޖިޓަމޭޓް" އެކޭވެސް ނޫން، ހުރެދާނެ، އެކަމު ހުއްޓަކަސް އެކުދިން ގެންގޮސްގެން ކުދިން ކައިރީގައި ހެއްޔޭ މިފަދަ ސުވާލުތައް ކުރަންވީ، އޭރަށް ކުދިން ކޮންކަހަލަ އިހްސާސެއްތޯ ސްކޫލްގަ ކުރަން ވީ، ސްކޫލަށް ދިޔުމާއި މެދުގައި ކުރަންވީ، ސަރުކާރުގެ ކަންބޮޑުވުންތަކެއް ސްކޫލްގެ ކަންބޮޑުވުން ތަކެއް ހުރިނަމަ އެކުދިންގެ ގެޔަށް ސޯޝަލް ވޯކަރަކު ފޮނުވައިގެން ބެލެނިވެރިންނާއި ސުވާލު ކުރެވިދާނެ"
ޢާއިޝަތު ޢާޒިމާ ޝަކޫރު
ކޮންމެ ސަބަބަކާއި ހުރެ އެކުދިން މޫނު ބުރުގާ އެޅިނަމަވެސް އެކުދިންނާއި މެދު ތަފާތު ބައެއްގެ ގޮތުގައި ޢަމަލުކުރެވިގެން ނުވާނެ ކަމަށް ޢާޒިމާ ވިދާޅުވިއެވެ. ޢަރަބިއްޔާ ކުދިންނަކީ އަޚްލާޤު ރަނގަޅު ކުށްތަކަށް އަރައިގަތުން މަދު ބައެއްގެ ގޮތުގައި ފެންނައި އިރު އެކުދިންނަސް މިފަދަ ގޮތަކަށް އަމާޒު ކުރެވެންވީ ކީއްވެތޯ ޢާޒިމާ ސުވާޅުކުރެއްވެވިއެވެ.
ޢަރަބިއްޔާ ގައި ކިޔަވާ އަންހެން ކުދިންގެ ތެރެއިން މޫނު ބުރުގާ އަޅާ ކުދިންގެ ތަޢުލީމު އުގެނުމުގެ ހައްޤު ގެއްލިދާތީ އެހައްޤު ކަށަވަރުކޮށްދިނުމަށް އެކުދިންނާއި ބެލެނިވެރިންގެ ފަރާތުން ވަކާލާތު ކުރައްވާނީ ޢާޒިމާއެވެ. އެކުދިންނަށް މޫނު ބުރުގާ އަޅައިގެން ސްކޫލަށް ދެވޭނޭ ގޮތައް ވަގުތީ އަމުރެއް ހޯދުމަށް މިހާރު ވަނީ ކޯޓަށް ހުށައަޅައިފައެވެ. އަދި މިމަހުގެ 10 ވަނަ ދުވަހަށް އެމައްސަލަ ވަނީ ކޯޓުގައި ތާވަލު ކުރެވިފައެވެ.
Advertisement
This content is created and paid for by advertisers and does not involve Voice Journalists
