ޗެލްސީގެ ކޯޗުކަމުގެ މަގާމަށް، އެކުލަބުގެ ލެޖެންޑް ފްރޭންކް ލަމްޕާޑް ދެވަަނަ ފަހަރަށް ހަމަޖައްސައިފިއެވެ. ނަމަވެސް މިފަހަރު އޭނާ ޗެލްސީ އާއި ހަވާލުވި މިސީޒަނުގެ ނިޔަލަށެވެ.
ގްރަހަމް ޕޮޓާ މަގާމުން ވަކިކުރި ފަހުން ޗެލްސީ ކުޅުނު ފުރަތަމަ މެޗުގައި ލިވަޕޫލް އާއި ވާދަކޮށް އެއްވަރު ވެފައިވާއިރު، ލަމްޕާޑްގެ އިރުޝާދުގެ ދަށުން އެޓީމު އަންނަ ހޮނިހިރު ދުވަހު ނުކުންނާނީ ވުލްވްސް އާއި ދެކޮޅަށެވެ.
2021 ވަނަ އަހަރު ޗެލްސީ އިން ލަމްޕާޑް ދޫކޮށްލުމުން އެވަޓަންގެ ކޯޗުކަމާއި ހަވާލުވެ މިދިޔަ ސީޒަނުގައި އޭނާ ވަނީ އެކުލަބު ރެލިގޭޝަން ސަލާމަތްކޮއްދީފައެވެ. ނަމަވެސް މި ސީޒަނުގައި ނަތީޖާތައް ދައްވެ މިއަހަރުގެ ޖެނުއަރީމަހު އެވަޓަން އިން ވަނީ އެކުލަބުގެ ކޯޗުގެ މަގާމުން ލަމްޕާޑް ވަކިކޮށްފައެވެ.
މިސީޒަނުގެ ދަށް ނަތީޖާތަކެއްނެރެމުން އަންނަ ޗެލްސީ މިވަގުތު އޮތީ ޕްރެމިއާ ލީގު ތާވަލުގެ 11 ވަނައިގައެވެ. އެފްއޭ ކަޕްގެ ތިންވަނަ ބުރުން އެޓީމު ކަޓާފައިވާ އިރު މިސީޒަނުގައި އެޓީމުގެ ނަތީޖާތައް އެންމެ ރަނގަޅީ ޗެމްޕިއަންސްލީގުގައެވެ.
ޗެންޕިއަންސް ލީގުގެ ކުއާޓާ ފައިނަލުގެ ފުރަތަމަ ލެގުގައި އަންނަ ބުދަ ދުވަހު ރެއާލް މެޑްރިޑްގެ ދަނޑުގައި އެޓީމާއި ދެކޮޅަށް ޗެލްސީ ނުކުންނައިރު، ޗެލްސީގެ ދަނޑުގައި މިދެޓީމު ކުޅޭ ދެވަަނަ ލެގު ކުޅުމަށް ހަމަޖެހިފައިވަނީ މި މަހުގެ 18 ވަނަ ދުވަހު އެވެ.
Advertisement
This content is created and paid for by advertisers and does not involve Voice Journalists
