ދެޤައުމުގެ ދެމެދުގައި ހީނަރުވެފައިވާ ގުޅުންތައް އަލުން ބަދަހި ކުރުމަށް އިރާން އާއި ސަޢުދީޢަރަބިއްޔާގެ ފޮރިންގ މިނިސްޓަރުން ބައްދަލުކޮށްފިއެވެ.
7 އަހަރަށް ފަހު އިރާން އާއި ސަޢުދީޢަރަބިއްޔާގެ އިސްވެރިންގެ ދެމެދުގައި ބޭއްވުނު ބައްދަލުވުން ބޭއްވިފައިވަނީ ޗައިނާގެ ބެއިޖިންގައެވެ.
ސަޢުދީ ސަރުކާރުން ގެ ފަރާތުން ހިންގާ މީޑިއާ އަކުން ވަނީ އެމީޑިއާގެ ޓްވިޓާރ ހެންޑްލްގައި ސަޢުދީގެ ފޮރިން މިނިސްޓަރ އަމީރް ފައިސަލް ބިން ފަރްހާން އާއި އިރާންގެ ފޮރިން މިނިސްޓަރ ހުސެއިން އަމީރް ޢަބްދުއްލިހްޔާން އާއި ދެމެދުގައި ޗައިނާގައި ބޭއްވުނު ބައްދަލުވުމުގެ ވިޑީއޯ ހިއްސާ ކޮށްފައެވެ.
ދެ ޤައުމުގެ ފޮރިންމިނިސްޓަރުންގެ ދެމެދުގައި ދެކެވުނު ވާހަކަ ތަކުގެ ތަފްސީލެއް އަދި ހާމަކޮށްފައެއް ނުވެއެވެ.
ދެޤައުމުގެ ދެމެދުގައި ހީނަރުވެފައިއޮތް ގުޅުން އަލުން ބަދަހިކޮށް އެގުޅުން އައު މަންޒިކަށް ގެންދިޔުމުގެ ވާހަކަތައް އިރާން އާއި ސަޢުދީ އިން ފެށީ މާޗް މަހުގެ ތެރޭގައެވެ. އޭރު ކުރެވުނު މަޝްވަރާ ތަކުގެ ތެރެއިން ދެމަސް ދުވަސް ތެރޭގައި ދެޤައުމުގައި ޑިޕްލޮމެޓިކް މިޝަންތައް ގާއިމް ކުރުން ހިމެނެއެވެ.
އިރާން އާއި ސަޢުދީ އާއި ދެމެދު އުފެދިފައި އޮތް ހަމަނުޖެހުން ތަކުގެ ސަބަބުން ގަލްފް ރީޖަން ގައި ފާއިތުވި އަހަރުތަކުގެ ތެރޭގައި އެތައް ކަންބޮޑުވުންތަކެއް ވަނީ އުފެދިފައެވެ.
އިރާންގެ އިސްލާމިކް ރިޕަބްލިކް ނިއުސް އެޖެންސީ އިން ބުނެފައިވަނީ ދެޤައުމުގެ ފޮރިން މިނިސްޓަރުންގެ މި ބައްދަލުވުމުގައި މަޝްވަރާ ކުރެވުނީ ދެ ޤައުމުގައި އަލުން އެމްބަސީތައް ހުޅުވުމާއި މެދުގައި ކަމަށެވެ. އިރާން އާއި ސަޢުދީޢަރަބިއްޔާ އާއި ދެމެދު އޮތް ހަމަނުޖެހުންތައް ނިމުމަކަށް ގެނެސް ސުލްހައިގެ ވާހަކަތަކުގެ މެދުވެރިއެއްގެ ރޯލު ކުޅެފައިވަނީ ޗައިނާއިންނެވެ.
Advertisement
This content is created and paid for by advertisers and does not involve Voice Journalists
