ރައްޔިތުން މަޖިލީހުގެ ރައީސް މުހައްމަދު ނަޝީދުގެ ވެރިކަން  ވެއްޓުނު ފަހުން ފުރަތަމަ ފަހަރަށް، އެމަނިކުފާނުގެ ނައިބު ރައީސް ކަމުގައި އޭރު ހުންނެވި ރައީސް ޑރ.މުހައްމަދު ވަހީދު ހަސަން މަނިކާ އެއް މޭޒަކުން ބައްދަލު ވެއްޖެއެވެ.

ރައީސް ނަޝީދާއި ރައީސް ޑރ.ވަހީދު ބައްދަލުވީ ރާއްޖެއަށް ސައުދީން ކަނޑައަޅުއްވާފައި ހުންނަވާ ސަފީރު މަތްރިކް އައްދައުސަރީ އިއްޔެ ދެއްވި ރޯދަ ވީއްލުމަކުންނެވެ. މި ރޯދަ ވީއްލުމުގައި މަޖިލީހުގެ ބައެއް މެންބަރުންވެސް ބައިވެރިވެވަޑައިގެންފައިވެއެވެ. 

މި ރޯދަ ވީއްލުމާއި ގުޅޭ ފޮޓޯތައް މަޖިލީހުން މީސްމީޑިއާގައި ހިއްސާކޮށްފައިވާއިރު ރައީސް ނަޝީދާއި، ރައީސް ޑރ.ވަހީދު އިންނެވީ އެއް މޭޒެއްގައި ކައިކައިރީގައެވެ. އަދި ދެ ބޭފުޅުންގެ މޫނުމަތިންވެސް ފެންނަނީ ހިނިތުންވުމެވެ. އެއްވެސް ކަހަލަ ސިޔާސީ ރުޅިވެރިކަމެއް ނުވަތަ ދެކޮޅުވެރިކަމެއް ދެ ބޭފުޅުންގެ މެދުގައި މިހާރު އޮތް ކަމަށް ފެންނަ ފެނުމުން ހީނުވާކަމަށް ފޮޓޯއަށް ކޮމެންޓު ކުރި މީހުންވެސް ބުނެފައިވެއެވެ. 

Advertisement

2012 ވަނަ އަހަރުގެ ފެބްރުއަރީ މަހުގެ 07 ވަނަ ދުވަހު އޭރު ވެރިކަމުގައި ހުންނެވި ނަޝީދު ވެރިކަމުން އިސްތިއުފާ ދެއްވާފައިވާއިރު، އިސްތިއުފާ ދެއްވަން މަޖުބޫރުވީ ބަޣާވާތަކުން ކަމަށާއި އެބަޣާވާތުގައި އެންމެ އިސްކޮށް ހުންނެވީ އެމަނިކުފާނުގެ ނައިބު ރައީސް، ރައީސް ވަހީދު ކަމަށް ރައީސް ނަޝީދާއި އެމްޑީޕީގެ އިސް މެންބަރުން ވަނީ އެތައް ފަހަރަކު ތުހުމަތު ކުރައްވާފައެވެ.

އެފަހުން 2013 ގައި ރިޔާސީ އިންތިހާބުގެ ބަހުސްގައިވެސް ދެ ބޭފުޅުން އެއްތަންވެފައި ވާއިރު އެ ބަހުސް ނިންމުމަށްފަހު ކެންޑިޑޭޓުންނާއި ސަލާމް ކުރެއްވި އިރުވެސް ރައީސް ނަޝީދު ރައީސް ޑރ. ވަހީދާއި ސަލާމް ނުކުރައްވައެވެ.