އައް ޞަފާ ޕްރައިވެޓް ލިމިޑެޓްގެ ހަވާލުގައި މި ރަމަޞާން މަހު ޢުމްރާއަށް ދިއުމަށް ހަމަޖެހުނު ޢުމްރާވެރިންގެ ވިސާ ހަމަނުޖެހުުނު ކަމަށްބުނެ ދަތުރު ކެންސަލް ކުރުމަށްފަހު، ފްލައިޓެއް ޗާޓަރުކޮށް އެ ޢުމްރާވެރިން ފުރުވާލުމުގެ މަސައްކަތް ކުރަމުންދާ ކަމަށް އެކުންފުނިން ހާމަ ކޮށްފައިވާ ކަމަށް އިސްލާމިކް މިނިސްޓްރީ އިން ބުނެފިއެވެ. 

ޞަފާ އިން، މި ރަމަޟާން މަހު ޢުމްރާއަށް ދިއުމަށް 180 މީހަކު ފައިސާ ދައްކައި ފައިވެއެވެ. އޭގެ ތެރެއިން ފުރަތަމަ ގްރޫޕް ފުރުމަށް ކުޑަ ވަގުތު ކޮޅަކަށް ވެފައި ވަނިކޮށް ވިސާ ހަމަނުޖެހޭތީ ދަތުރު ކެންސަލް ކުރި ކަމަށް ޞަފާ އިން ވަނީ ޢުމްރާ ވެރިންނަށް އަންގައިފައެވެ. 

މިކަމާއި ގުޅިގެން އިސްލާމިކް މިނިސްޓްރީ އިން ނެރެފައިވާ ބަޔާނެއްގައި ބުނެފައިވަނީ އައް ޞަފާ ޕްރައިވެޓް ލިމިޓެޑްގެ ފަރާތުން 1444 ވަނަ އަހަރުގެ ރަމަޟާން މަހު ޢުމްރާއަށް ގެންދިއުމަށް ހަމަޖެހިފައިވާ ޢުމްރާވެރިންނަށް ވިސާ ހަމަނުޖެހުމުގެ ސަބަބުން ކަމަށްބުނެ، ޢުމްރާ ދަތުރު ކެންސަލްކުރުމަށް އެކުންފުނިން ނިންމި ނިންމުމަކީ އެމިނިސްޓްރީއިން އިންތިހާއަށް ކަންބޮޑުވާ ކަމެއް ކަމަށެވެ. 

އެކަން މިނިސްޓްރީގެ ސަމާލުކަމަށް އައި ހިސާބުން ފެށިގެން، އެކަން ހިނގާފައިވާ ގޮތް ބަލައި، ޢުމްރާވެރިންގެ ހައްގުތައް ކަށަވަރުކޮށްދިނުމަށް މިނިސްޓްރީގެ ފަރާތުން ދަނީ މަސައްކަތްކުރަމުން ކަމަށް އެމިނިސްޓްރީ އިން ބުނެފައިވެއެވެ.

މި މައްސަލާގައި ކަންހިނގާފައިވާ ގޮތާއި ޢުމްރާވެރިން މި އަހަރު ރަމަޟާން ޢުމްރާއަށް ގެންދިއުމުގެ ކަންކަން ހަމަޖެއްސުމާއި ގުޅޭގޮތުން، އައް ޞަފާ ޕްރައިވެޓް ލިމިޓެޑްގެ މެނޭޖިން ޑިރެކްޓަރ ޢަބްދުﷲ ނަސީމް މުޙައްމަދު ވަނީ މިނިސްޓްރީއަށް ހާޟިރުކުރެވިފައި ކަމަށާއި، މި ރަމަޟާން މަހު ޢުމްރާއަށް ގެންދިއުމަށް ކުންފުންޏަށް ފައިސާ ދައްކާފައިވާ ޢުމްރާވެރިން، އެންމެ ލަސްވެގެން ރަމަޟާންމަހުގެ ފަހު 10 އަށް ޢުމްރާއަށް ގެންދިއުމުގެ އެންމެހައި އިންތިޒާމްތައް ހަމަޖެއްސުމަށް އެ ކުންފުންޏަށް  މިނިސްޓްރީން ވާނީ އަންގާފައި ކަމަށްވެސް އިސްލާމިކް މިނިސްޓްރީ އިން ވަނީ ބުނެފައެވެ.

ޢުމްރާވެރިން ފުރުވާލުމަށް 8 އޭޕްރީލްގައި އެއަރލައިންއަކާއެކު އެއްބަސްވުމެއްގައި ސޮއިކުރާނެކަމަށާއި އަދި ރަމަޟާންމަހުގެ ފަހު 10 އަށް ހުރިހާ ޢުމްރާވެރިން މައްކާއަށް ގެންދާނެކަމުގެ ޔަގީންކަން އެކުންފުނިން ދީފައި ވާކަމަށް އެމިނިސްޓްރީ އިން ބުނެފައިވެއެވެ.

މި މައްސަލާގައި، އެކުންފުނިން ޢަމަލުކުރަމުންދާގޮތް މިނިސްޓްރީން ވަރަށް ގާތުން ބަލަމުންދާ ކަމަށާއި އަދި އުޞޫލުގެ ތެރެއިން މިކަމުގައި އެޅެންހުރި ހުރިހާ ފިޔަވަޅެއް އަޅާނެކަމަށް ކުންފުންޏަށް އަންގައިފައިވާނެ ކަމަށް އިސްލާމިކް މިނިސްޓަރީ އިން ވަނީ ބުނެފައެވެ.