އަލް ނަޞްރަށް ކުޅެމުން އަންނަ ބްރެޒިލް ފޯވާޑް އެންޑަސަން ޓަލިސްކާގެ އެއްބަސްވުން އެ ކުލަބުން 2026 އަހަރާއި ހަމައަށް އައުކޮށްފި އެވެ.

2021 ވަނަ އަހަރު ޗައިނާގެ ގުއެންޒޯ ދޫކޮށް ޓަލިސްކާ އަލް ނަސްރަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުން ނެވެ. އޭގެ ފަހުން މިއީ އަލް ނަޞްރުން ޓަލިސްކާގެ އެއްބަސްވުން އައުކުރި ފުރަތަމަ ފަހަރެވެ.

އެންމެ ފުރަތަމަ ޓަލިސްކާ އަލް ނަޞްރާއި އެކު ހެދިި އެއްބަސްވުމުގެ މުއްދަތު މި ސީޒަނުގެ ނިޔަލަށް ހަމަވާނެއެވެ. އެހެން ނަމަވެސް ޓަލިސްކާ އާއި އަލް ނަޞްރާއި ދެމެދު ކުރިއަށް ދިޔަ މަޝްވަރާތަކަށް ފަހު މިހާރު ވަނީ އައު އެއްބަސްވުމުގައި ސޮއި ވެސް ކޮށްފަ އެވެ. އަލް ނަޞްރާއި އެކު ޓަލިސްކާ ހަދާފައިވާ އައު އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ނިޔަލަށެވެ.

Advertisement

އެއްބަސްވުމުގައި ސޮއި ކުރުމަށްފަހު ޓަލިސްކާ ބުނީ، އަލް ނަޞްރު މިހާރު އޮތީ ކޯޗާއި އޭނާގެ އެހެނިހެން ސްޓާފުންނާއެކު ދާން ބޭނުންވާ އަމާޒަށް މިސްރާބު ހިފާފައި ކަމަށެވެ. އޭނާ ބުނީ މިހާރު ލިބިފައިވާ ފުރުސަތަކީ ވަރަށް ޚާއްސަ ކަންތައްތަކެއް ހާސިލްކުރުމަށް ލިބިފައިވާ ރަނުގެ ފުރުސަތެއް ކަމަށެވެ.

ރޮނާލްޑޯ އާއި އެކު އެއްޓީމަކަށް ކުޅެލަން ފުރުސަތު ލިބުމަކިީ ފަހުރުވެރިވާ ކަމެއްކަމަށާއި، ކުލަބުގައި މަޑުކުރުމަށް ރޮނާލްޑޯ ލަފާދިން ކަމަށްވެސް ޓަލިސްކާ ބުންޏެވެ.

ޓަލިސްކާގެ އެއްބަސްވުން އައުކުރުމާއި ގުޅިގެން ވާހަކަ ދައްކަމުން އަލް ނަޞްރުގެ ކޯޗު ރުޑީ ގާސިއާ ބުނީ، ޓަލިސްކާގެ އެއްބަސްވުން އައު ކުރުމަކީ ލިބުނު އުފަލެއް ކަމަށެވެ. އަދި ޓަލިސްކާ ވަނީ މި ސީޒަންގައި ވެސް މޮޅު ކުޅުމެއް ދައްކައި ގިނަ ލަނޑުތަކެއް ވެސް ޖަހައިފައެވެ. މީގެ އިތުރުން ގާސިއާ ވަނީ ޓަލިސްކާއަށް ވަރަށްބޮޑަށް ތައުރީފުކޮށް ވާހަކަ ދައްކަވައެވެ.

އުމުރުން 29 އަހަރުގެ ފޯވާޑް ވަނީ މިހާތަނަށް އަލް ނަޞްރަށް ކުޅެދިން 51 މެޗުގައި 39 ލަނޑު އެޓީމަށް ޖަހައިފަ އެވެ. އަލް ނަޞްރަށް ބަދަލުވި ފަހުން ޓަލިސްކާ އަންނަނީ އެ ޓީމުގެ ފޯވަޑް ލައިނުގައި މުހިންމު ދަައުރެއް އަދާކުރަމުންނެވެ.