މިއަދު އަހަރުމެންގެ ބައެއް ޒުވާނުންނަށް ބަލައިލުމުން ފެންނަނީ ދީނީ އިލުމުން ފެއަށް ޖެހިފައިވާ އުއްމަތެއްގެ ނަތީޖާއެވެ. އިލާހީ އަމުރުފުޅުތަކާއި ނަހީތަކަށް އިސްކަންނުދޭ މާއްދިއްޔަތަށް މަސްތުވެފައިވާ ޖީލެކެވެ. ރަސޫލާ ޞޢވ ގެ ކިޔަމަންތެރިކަމުގެ ދަށަށް ބަހާއި އަމަލުން ވަނުމަށް އުޒުރުވެރިވާ ޖިސްމުތަކެކެވެ. ހުޅަނގުގެ ފިކުރުން ފެންބޮއިގެން އެމީހުންގެ ޘަޤާފަތުން ބަނޑުފުރުއިގެން ބޮޑުވާ ޒުވާނުން މިއަދު ގިނަވަމުންދާކަމީ ހިތާމައިގެ ކޮޅެއް ނެތް ކަމެކެވެ. ޔަހޫދީންނާއި ނަޞާރާއިން ދުވަމުން ގޮސް ސަހަރާމަތީ އުޅޭ ބޮނޑުގެ ހޮރަށް ވަންކަމުގައިވީނަމަ އެހަރަކަށްވެސް ފަހަތުން ގޮސް ވަންނާނެ މުސްލިމު ނަންތަކެއް މިއަދު މިވަނީ އުފަންވެފައެވެ. 

މިއަދުގެ ޒުވާން ބައެއް ފިރިހެނުންނަށް ބަލައިލިމުން ފެންނަނީ ޣައިރި މުސްލިމުންގެ ތަސްވީރެކެވެ. ގައިގެ އެތަން މިތަނުގައި ޓޭޓޫ ޖަހާފައި، ކަންފަތާއި ބުމަ ތޮރުފާ ކަރުގައި ފަށް އަޅާފައި، އަތާއި ފައިގައި ތަފާތު ވައްތަރުގެ ތަކަހޮޅިތައް އަޅާ ފުރާފައެވެ. މިފަދަ މީހުންގެ މައިންބަފައިންނަށްވެސް މިގޮތްތައް ކަމުދާކަހަލައެވެ. އެކުވެރިންގެ ތެރޭގައިވެސް މިފަދަ ކަމަކާ ބަހެއް ބުނެލާނެ މީހަކު ނުހުރެއެވެ. ނުވިތާކަށް މިފަދަ މީހަކު މިފަދަ ޣައިރު މުސްލިމުންގެ އާދައެއް ނަކަލުކޮށް ނަގާފައިވާ ފޮޓޯއެއް ސޯޝަލް މީޑިއާއަށް ލައިފިނަމަ އެއީ ވަރަށް ކޫލް، ލޯބި، ރީތި މީހެއްގެ ގޮތުގައި ސިފަކުރެއެވެ. ތައުރީފުގެ މެސެޖްތަކުން އެފަދަ ޕޯސްޓްތަކަށް އެތައް ބަޔަކު ކޮމެންޓްވެސް ކުރެއެވެ.

ދެން މިއޮތީ ޖާހިލިއްޔަ ޒަމާނުގެ ވާހަކައެވެ. އިސްލާމްދީން ބާވައިލައްވަމުންދިޔަ ދުވަސްވަރު ރަސޫލާގެ ޞަހާބީންވެސް މިފަދަ ބައެއް ކަންކަން ކުރަމުންދިޔަކަން ތާރީޚުން ހެކިދެއެވެ. އޭރު އެމީހުންގެ ތެރޭގައި ޓެޓޫޖެހުންވެސް އޮތެވެ. ފިރިހެނުން ގަހަނާ ބޭނުންކުރުންވެސް އޮތެވެ. ރަން އަނގޮޓީއާއި ފަށްވެސް ޒީނަތްތެރިވުމުގައި އެބައިމީޙުން ބޭނުންކުރިއެވެ. ނަމަވެސް އިސްލާމްދީން ބާވައިލެއްވީ މިސްތަކުންނަށް ޢަޤީދާއާއި އަޅުކަން އުނގައްނައިދެއްވަމުންނެވެ. މުޢަމަލާތާއި އަޚްލާޤުވެސް ބުނެދެއްވަމުންނެވެ. ރަނގަޅުކަންކަމަށް ބާރުއަޅުއްވާ ނުބައިކަންކަމާއި އަދާތައް ނަހީކުރާ ޙާލުގައި މިޝާމިލީ ޝަރިޢަތް ފުރިހަމަވަމުންދިޔައެވެ. ޓެޓޫ ޖަހާމީހާއާއި ޖަހުވައިދޭމީހާއާއި ރަސޫލާގެ ދޫފުޅުން ލަޢުނަތް ލެއްވެވިއެވެ. ފިރިހެންނުން ރިހި އަނގޮޓި ހުއްދަކުރެއްވިއެވެ. ރަނުގެ ހުރިހާ ބާވަތެއް ހަރާމް ކުރެއްވެވިއެވެ.

ދުވަސްތަކުގެ ތެރެއިން ދުވަހެކެވެ. ރަސޫލާ ޞައްލައްالله އަލައިހި ވަސައްލަމައަށް ޞަޙާބީއެއްގެ އަތުގެ އިނގިއްޔެއްގައި ރަން އަނގޮޓިއެއް އަޅާފައިވަނިކޮށް ފެނުނެވެ. އެހިނދު އިތުރު އެކަލޭގެފާނު އެކަމާ ކޯފާ އިސްކުރައްވާ އެއަނގޮޓި ނަންގަވާ އެއްލަވާލެއްވިއެވެ. އަދި އަލިފާނުގެ ޖަމްރާއެއް އަތަށްލައިގެން ހުންނަން ތިޔަބައިމީހުންގެ ތެރެއިން މީހަކު ބޭނުންވަނީތޯ އައްސަވާ ފިރިހެނުން ރަނުގެ ގަހަނާ ބޭނުންކުރުމާ އިންކާރު ކުރެއްވިއެވެ. ދެން އެކަލޭގެފާނު އެތަނުން ވަޑައިގަތުމުން އެމީހަކަށް އެރަން އަނގޮޓި ނެގުމަށް އެތަނުގައި ތިއްބެވި ޞަހާބީ ބޭކަލުން އިރުޝާދު ދެއްވެވިއެވެ. އަޅަން ބޭނުން ނުކުރިޔަސް ވިއްކަލައިގެން ނުވަތަ އެނޫންވެސް ބޭނުންކުރެވިދާނެ ކަމަށް ލަފާދިނެވެ. އެހިނދު އެޞަހާބީ الله ގަންދީ ހުވާކޮށް އެއަނގޮޓި ނުނަގާނެ ކަމުގައި ވިދާޅުވިއެވެ. ރަސޫލާ ނުރުހުންވެ އެކަލޭގެފާނުގެ އަތްޕުޅުން އެއްލަވާލެއްވި އެއްޗެއް ދުވަހަކުވެސް ނުނަންގަވާނެކަމަށް ވިދާޅުވިއެވެ.

ކިޔަމަންތެރި ވުމުގައި މިއީ ކޮންފަދަ ނަމޫނާއެއްބާއެވެ! ވަރަޢަވެރިކަމުގައި މިޞަޙާބީގެ އަމަލުފުޅު ކިހާ ރިވެތިބާއެވެ! އަހަރުމެންގެ ޒުވާނުންނަށް މިޞަޙާބީންގެ ސިޔަރަތުން އިބުރަތެއް ނުލިބޭބާއެވެ! ރީތިކަމާއި ޒީނަތްތެރިކަން ވަނީ ޤުރުއާނާއި ސުންނަތުގައިބާއެވެ. ނުވަތަ ހުޅަނގުގެ ކާފަރުންގެ ހަމައެއް ލަމައެއް ނެތް އާދަތަކާއި ޘަޤާފަތުގައިބާއެވެ!