އިގިރޭސި ޕްރިމިއާ ލީގުގައި މިރޭ ރަށުން ބޭރުގައި ވުލްވްސް އާއި ވާދަކޮށް 1-0 ގެ ނަތީޖާއަކުން ޗެލްސީ ބަލިވެއްޖެ އެވެ.

މިރޭގެ މެޗަކީ ޗެލްސީގެ ކޯޗު ފްރޭންކް ލަމްޕާޑް ޓީމާއި ހަވާލުވި ފަހުން އެޓީމު ކުޅުނު ފުރަތަަމަ މެޗެވެ. ކުރީގެ ކޯޗު ގްރަހަމް ޕޮޓާ މަގާމުން ވަކިކުރި ފަހުން ޗެލްސީ ކުޅުނު ތިން މެޗުގައި އެޓީމަށް މޮޅެއް ހޯދިފައިނުވައިރު، މިސީޒަނުގައި ޕްރެމިއާ ލީގުގެ ގަދަ 10 ގައި އެޓީމު ހިމެނިދާނެކަމާއި މެދު މިހާރު ވަނީ ސުވާލު އުފެދެންފަށާފައެވެ.

މިރޭގެ މެޗުގެ ފުރަތަަމަ ހާފުގައި ޗެލްސީ އިން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް މިހާފުގައި ރަގަޅު ފުރުސަތުތަކެއް ތަނަވަސްކުރި ވުލްވްސް އިންނެވެ. މި ގޮތުން ފުރަތަަމަ ހާފުގެ 31 ވަނަ މިނެޓުގައި ވުލްވްސް އިން ވަނީ ލަނޑެއް ކާމިޔާބުކޮށް މެޗުގެ ލީޑު ނަގާފައެވެ.

މި ލަނޑު އެޓީމަށް ކާމިޔާބުކޮށްދިނީ ޕޯޗުގަލްގެ މިޑްފީލްޑަރު ނުނޭޒް އެވެ. މިއީ ޗެލްސީގެ ޕެނަލްޓީ އޭރިއާގެ ތެރެއިިން ލިބުނު ބޯޅައެއް މުޅިން ހުސްކޮށް ހުރެ ގޯލުގެ މަތީ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ދެވަަނަ ހާފްގައި ޗެލްސީގެ ކުޅުން ފުރަތަމަ ހާފަށްވުރެ ދަށްކޮށް ފެނިގެންދިޔަ އިރު މިހާފުގައި ލަމްޕާޑް ގެނައި ބަދަލުތަކުގެ ސަބަބުން އެޓީމުގެ ކުޅުމަށް އެއްވެސް ވަރެއްގެ ބަދަލެއް އައިތަން ނުފެނެއެވެ. ޗެލްސީގެ ކުޅުންތެރިންގެ ފަރާތުން ގިނަ މިސްޓޭކްތަކެއް ފެނިގެންދިޔަ އިރު ކުޅުންތެރިންގެ މަސައްކަތުގެ ރޭޓު ވެސް ފެނުނީ އެހެން މެޗުތަކާއި އަޅާބަލާއިރު ވަރަށް ދަށްކޮށެވެ.

މިރޭގެ މެޗުން ލިބުނު ތިން ޕޮއިންޓާއެކު ވުލްވްސް އިން ވަނީ 30 މެޗު ކުޅެގެން 31 ޕޮއިންޓާއެކު ތާވަލްގެ 12 ވަނައިގައެވެ. މި މެޗުން ބަލިވި ޗެލްސީ އަށް 30 މެޗު ކުޅެގެން ލިބިފައިވަނީ 39 ޕޮއިންޓާއެކު ތާވަލްގެ 11 ވަނަ އެވެ.