ފްރާންސް ލީގުގައި މިރޭ ރަށުން ބޭރުގައި ނައިސް އާއި ވާދަކޮށް 2-0 ގެ ނަތީޖާއަކުން މޮޅުވެ ޕީއެސްޖީ އިން ލީގު ތާވަލުގެ ކުރީގައި ހަ ޕޮއިންޓްގެ ލީޑެއް ނަގައިފި އެވެ.

ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔަ މިމެޗުގައި ޕީއެސްޖީއަށް ލީޑު ހޯދައިދިނީ ފުރަތަމަ ހާފުގެ 26 ވަނަ މިނެޓުގައި އާޖެންޓީނާގެ ކެޕްޓަން ލަޔޮނަލް މެސީ އެވެ. މިއީ އެޓީމުގެ ޕޯޗުގަލް ޑިފެންޑަރު ނޫނޯ މެންޑޭސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުގައި ކާމިޔާބުކުރި ލަނޑާއެކު ޔޫރަޕްގެ ކުލަބް ފުޓްބޯޅައިގައި އެންމެ ގިނަ ލަނޑުޖެހުމުގެ ރެކޯޑް މެސީއަށް ވަނީ ލިބިފައެވެ. ކުރިން މި ރެކޯޑް އޮންނަނީ މިހާރު ސައުދީ ޕްރޮފެޝަނަލް ލީގުގެ ކުޅެމުން އަންނަ ކްރިސްޓިއާނޯ ރޮނާލްޑޯގެ އަތުގައެވެ. ރޮނާލްޑޯ ވަނީ ސްޕޯޓިން ލިސްބަން، މެންޗެސްޓާ ޔުނައިޓެޑް، ރެއާލް މެޑްރިޑް އަދި ޔުވެންޓަސް އަށް ކުޅެދިން 949 މެޗުގައި 701 ލަނޑު ކާމިޔާބުކޮށްފައެވެ.

މެސީ ވަނީ ބާސެލޯނާ އާއި ޕީއެސްޖީއަށް ކުޅެދިން 841 މެޗުގައި 702 ލަނޑު ކާމިޔާބުކޮށްފައެވެ.

މިރޭގެ މެޗުގައި ޕީއެސްޖީގެ ދެވަަނަ ލަނޑު، ދެވަަނަ ހާފުގެ 76 ވަނަ މިނެޓުގައި ކާމިޔާބުކޮށްދިނީ ތަޖުރިބާކާރު ޑިފެންޑަރު ސާޖިއޯ ރާމޯސް އެވެ. މިއީ މެސީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 30 މެޗު ކުޅެގެން ޕީއެސްޖީއަށް ވަނީ 69 ޕޮއިންޓް ލިބިފައެވެ. ދެވަނައިގައި އޮތް ލެންސް އަށް 30 މެޗުން 63 ޕޮއިންޓް ލިބިފައިވާއިރު، މިރޭގެ މެޗުން ބަލިވި ނައިސްއަށް 30 މެޗުން ލިބުނު 45 ޕޮއިންޓާއެކު އެޓީމު މިވަގުތު އޮތީ ލީގު ތާވަލްގެ 8 ވަނައިގައެވެ.