ސްޕެނިޝް ލަލީގާގައި މިރޭ އަމިއްލަ ދަނޑުގައި ވިޔަރެއާލް އަތުން ބަލިވެ، ބާސެލޯނާ އާއި ދެމެދުގައި އޮތް ފަރަގު ކުޑަކުރަން ލިބުނު ފުރުސަތު ރެއާލް މެޑްރިޑުން ނަގާލައިފިއެވެ.

މިރޭގެ މެޗުގައި ދެޓީމުގެ ފަރާތުން ވާދަވެރި އެޓޭކިންގް ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ކުރިހޯދީ ރެއާލް މެޑްރިޑުންނެވެ. މިލަނޑަކީ ފުރަތަަމަ ހާފުގެ 16 ވަނަ މިނެޓުގައި ވިޔަރެއާލްގެ ޑިފެންޑަ ޕައު ޓޮރޭޒް އަތުން ބައިކޮޅަށް ވަން ލަނޑެކެވެ.

ވިޔަރެއާލްއަށް މެޗުގެ ނަތީޖާ އެއްވަރުކޮށްދިނީ ފުރަތަމަ ހާފުގެ 39 ވަނަ މިނެޓުގައި  ސެމިއުލް ޗުކްވުއޭޒް އެވެ. މިއީ އެޓީމުގެ އާޖެންޓީނާ މިޑްފީލްޑަރު ކުރުވަނީ ޖިއޯވާނީ ލޮ ސެލްސޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ދެވަަނަ ހާފު ފެށިގެން ތިންވަނަ މިނެޓުގައި ރެއާލް މެޑްރިޑަށް މި މެޗުގައި ދެވަނަ ފަހަރަށް ލީޑު ހޯދައިދިނީ ބްރެޒިލްގެ ފޯވާޑް ވިނީޝިއަސް ޖޫނިއަރ އެވެ. ދެވަަނަ ފަހަރަށް ވިޔަރެއާލްއަށް މެޗުގެ ނަތީޖާ އެއްވަރުކޮށްދިނީ ދެވަަނަ ހާފްގައި 70 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް ތަޖުރިބާކާރު މިޑްފިލްޑަރު ހޯސޭ ލުއިސް މޮރާލޭސް އެވެ.

ދެޓީމު އެއްވަރުވެގެން މެޗު ނިމެން ދަނިކޮށް މި މެޗުން ވިޔަރެއާލް މޮޅުވި ލަނޑު ދެވަނަ ހާފުގެ 80 ވަނަ މިނެޓުގައި އެޓީމަށް ކާމިޔާބުކޮށްދިނީ އެޓީމުގެ ފުރަތަަމަ ލަނޑު ވެސް ކާމިޔާބުކޮށްދިން ސެމިއުލް ޗުކްވުއޭޒް އެވެ. މިއީ ރެއާލް މެޑްރިޑްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ދުރު ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މި މެޗުން ލިބުނު ތިން ޕޮއިންޓާއެކު އެކު 28 މެޗުން ވިޔަރެއާލްއަށް ވަނީ 47 ޕޮއިންޓް ލިބިފައެވެ. އެޓީމު މިވަގުތު އޮތީ ލީގު ތާވަލްގެ ފަސްވަނައިގައެވެ. އަދި މި މެޗުން ބަލިވި ރެއާލް މެޑްރިޑަށް 28 މެޗު ކުޅެގެން ލިބިފައިވަނީ 59 ޕޮއިންޓެވެ.

އެއްވަނައިގައި އޮތް ބާސެލޯނާ މާދަމާރޭ ޖިރޯނާ އާއި ދެކޮޅަށް ކުޅޭ ކުޅޭ މެޗުން މޮޅުވެއްޖެ ނަމަ އެޓީމަށް ލީގު ތާވަލުގެ ކުރީގައި 15 ޕޮއިންޓްގެ ލީޑެއް ލިބިގެންދާނެއެވެ.