ގެއިން ނެރެލި އަންހެން މީހާއާއި ދެކުދިންގެ ހާލު ގާތުން ބަލަމުންދާކަމަށް ޖެންޑާ މިނިސްޓްރީން ބުނެފި އެވެ. 

ހިފައިގެންގުޅޭ ހުރިހާ ސާމާނާއެކު އަންހެނަކު ގެއިން ނެރެލުމާއި ގުޅިގެން އެމީހާ ކުދިންނާއެކު އެތަނުން ބައެއް ސާމާނު ނަގަމުންދާތަން ފެނިގެންދާ ފޮޓޯއެއް ވަނީ ސޯޝަލް މީޑިއާގައި އާންމުވެފައެވެ. 

މައުލޫމާތު ލިބޭ ގޮތުގައި އޭނާ ގެއިން ނެރެލާފައިވަނީ ކުރީގެ ފިރިމީހާއެވެ. ވަރި ކުރި ނަމަވެސް ވަންނާނެ އިތުރު ބޯހިޔާވަހިކަމެއް ނެތުމާއި ގުޅިގެން އެ އަންހެން މީހާ ކުރީގެ ފިރިމީހާ ދެއްކި ތަނެއްގައި ދިރިއުޅެމުން ދިޔަ ނަމަވެސް އެމީހާގެ ފުށުން ބޮޑެތި އަނިޔާތަކެއް ލިބެމުން ދިޔަކަން ވަނީ ހާމަވެގެން ގޮސްފައެވެ. 

އެ ފޮޓޯ ސޯޝަލް މީޑިއާގައި އާންމުވުމާއި ގުޅިގެން އެކަން ޖެންޑާ މިނިސްޓްރީގެ ސަމާލުކަމަށް މީޑިއާތަކުން ވަނީ ގެނެސްފައެވެ. އެވަރުގެ ހާދިސާއެއް ހިނގައިގެން ދިޔައިރު ޖެންޑާ މިނިސްޓްރީން އެޅީ ކޮން ފިޔަވަޅެއްތޯ ނޫސްވެރިއަކު ވަނީ ސުވާލުކޮށްފަ އެވެ. 

އެކަމާއި ގުޅޭގޮތުން ޖެންޑާ މިނިސްޓްރީން ބުނީ އަންހެނަކު އޭނާގެ ދެކުދިންނާއެކު ދިރިއުޅެމުންދިޔަ ގެއިން ނެރުނު މައްސަލައެއް އެ މިނިސްޓްރީއަށް ހުށައެޅިފައިވާ ކަމަށެވެ. 

އެ މައްސަލަ ހުށައެޅުމާއި ގުޅިގެން އެ އަންހެން މީހާ މިހާރު ދިރިއުޅެމުންދާތަން ބަލާ މައިންނާއި ދަރިންގެ ހާލު ބަލާފައިވާކަމަށް ޖެންޑާ މިނިސްޓްރީން ވަނީ ބުނެފައެވެ. އަދި މިނިސްޓްރީން ބުނީ އެ އަންހެންމީހާއާއި ދަރިންނަށް ބޭނުންވާ އެހީތެރިކަން ފޯރުކޮށްދީފައިވާކަމަށެވެ. 

އޭގެ އިތުރުން ޖެންޑާއިން ބުނީ ގެވެށިއަނިޔާ ހުއްޓުވުމުގެ ޤާނޫނުގެ ދަށުން ގެވެށި އަނިޔާގެ ޝިކާރައަކަށް ވާ ފަރާތަށް ލިބިދޭ ޤާނޫނީ ހިމާޔަތާއި ރައްކާތެރިކަން ހޯދަން މިނިސްޓްރީއިން ވަނީ މަގުފަހިކޮށްދީފައި ވާނެ ކަމަށެވެ. އަދި އެ މީހާއަށް އެކިފަހަރު މަތިން ޤާނޫނީ ހައްޤު ހޯދާދިނުމަށްވެސް މަސައްކަތްކަތް ކުރެވިފައިވާކަމަށް އެ މިނިސްޓްރީން ވަނީ ހާމަކޮށްފަ އެވެ.