އިގިރޭސި ޕްރިމިއާ ލީގު ތާވަލުގެ ކުރީގައި 8 ޕޮއިންޓުގެ ލީޑެއް ނެގުމަށް އާސެނަލް ކުރި މަސައްކަތައް ލިވަޕޫލުން ހުރަސް އަޅައިފި އެވެ.

ލިވަޕޫލްގެ ދަނޑުގައި މިރޭ ކުޅެވުނު މެޗުގެ ފުރަތަަމަ ހާފުގައި އާސެނަލް އިން ދެލަނޑުގެ ލީޑެއްގައި ވަނިކޮށް ލިވަޕޫލުން ވަނީ ފަހަތުން އަރައި ދެ ލަނޑު ކާމިޔާބުކޮށް އާސެނަލް މޮޅުވިޔަނުދީ ހިފަހައްޓާފައެވެ.

މިރޭގެ މެޗުގެ ފުރަތަަމަ ހާފުގައި އާސެނަލް އިން ދެ ލަނޑުގެ ލީޑެއް ނެގިއިރު، އެޓީމުގެ ފުރަތަަމަ ލަނޑު ފުރަތަަމަ ހާފުގެ 8 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ ފޯވާޑް ގެބްރިއަލް މާޓިނެލްއެވެ. އަދި އެޓީމުގެ ދެވަަނަ ލަނޑު 28 ވަނަ މިނެޓުގައި މާޓިނެލް ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ ބްރެޒިލްގެ ފޯވާޑް ގެބްރިއަލް ޖީސަސް އެވެ.

Advertisement

އާސެނަލް އިން ދެލަނޑުގެ ލީޑެއްގައި ވަނިކޮށް ލިވަޕޫލަށް ނަތީޖާގެ ފަރަގު ކުޑަކޮށްދިނީ ފުރަތަަމަ ހާފުގެ 41 ވަނަ މިނެޓުގައި މިސްރުގެ ފޯވާޑް މުހައްމަދު ސަލާހް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން އާސެނަލް ކުރީގައި އޮވެގެންނެވެ.

ދެވަަނަ ހާފްގައި ލިވަޕޫލްއިން ވަނީ އެޓީމުގެ ކުޅުން ރަނގަޅުކޮށް އެޓޭކްތައް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 52 ވަނަ މިނެޓުގައި އެޓީމަށް ވަނީ މެޗުގެ ނަތީޖާ އެއްވަރުކުރުމަށް ރަނުގެ ފުރުސަތެއްލިބިފައެވެ. އާސެނަލްގެ ޕެނަލްޓީއޭރިއާގެ ތެރެއިިން އެޓީމުގެ ކުޅުންތެރިއަކު ކުރި ފައުލަކާ ގުޅިގެން ރެފްރީ ވަނީ ލިވަޕޫލަށް ޕެނަލްޓީއެއް ދީފައެވެ. ނަމަވެސް މުހައްމަދު ސަލާހް ފޮނުވާލި ޕެނަލްޓީ ގޯލާއި އަމާޒުނުވެ ދިޔައީ ބޭރަށެވެ.

ލިވަޕޫލަށް މެޗުގެ ނަތީޖާ އެއްވަރުކޮށްދިނީ ދެވަަނަ ހާފުގެ 87 ވަނަ މިނެޓުގައި ބްރެޒިލްގެ ފޯވާޑް ރޮބާޓޯ ފިރްމީނޯ އެވެ. މިއީ އެޓީމުގެ އިގިރޭސި ޑިފެންޑަރު އެލެގްޒެންޑަރ އާނޯލްޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުން ލިބުނު އެއް ޕޮއިންޓާއެކު 30 މެޗު ކުޅެގެން އާސެނަލްއަށް ވަނީ 73 ޕޮއިންޓް ލިބިފައެވެ. ދެވަނައިގައި އޮތް މެންޗެސްޓާ ސިޓީ 29 މެޗު ކުޅެފައިވާއިރު އެޓީމަށް ލިބިފައިވަނީ 67 ޕޮއިންޓެވެ. އަދި މިރޭ މެޗުން ލިބުނު އެއް ޕޮއިންޓާއެކު 29 މެޗު ކުޅެގެން ލިވަޕޫލަށް ލިބިފައިވަނީ 44 ޕޮއިންޓާއެކު ތާވަލްގެ 8 ވަނަ އެވެ.