ސައޫދީ ޕްރޮފެޝަނަލް ލީގުގައި މިރޭ ރަށުން ބޭރުގައި އަލް ނަސްރު އެއްވަރު ވުމުގެ ފައިދާނަގައި އަލް އިއްތިހާދުން ލީގު ތާވަލުގެ ކުރީގައި ތިން ޕޮއިންޓުގެ ލީޑެއް ނަގައިފިއެވެ.

މިރޭ ރަށުން ބޭރުގައި އަލް ނަސްރު އާއި އަލް ފީހާ ވާދަކުރި މެޗު ނިމުނީ 0-0 ގެ ނަތީޖާއަކުން ދެޓީމު އެއްވަރުވެގެންނެވެ. އަދި ރަށުން ބޭރުގައި އަލް އިއްތިހާދު ވަނީ 2-1 ނަތީޖާއަކުން އަލް ވަހްދާ އަތުން މޮޅުވެފައެވެ.

މިރޭ އަލް ނަސްރު އާއި އަލް ފީހާ ވާދަކުރި މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މިހާފުގައި ދެޓީމުން ވެސް ވަނީ ލަނޑު ޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މިހާފުގައި ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ.

މެޗުގެ ދެވަނަ ހާފުގައި އަލް ނަސްރުން އެޓީމުގެ ކުޅުން ރަނގަޅުކޮށް ރަގަޅު ފުރުސަތުތަކެއް ތަނަވަސްކުރި ނަމަވެސް މިހާފުގައި ވެސް އެޓީމުގެ ކުރިއަށް ކުޅެމުންދިޔަ ދެ ފޯވާޑުން ކަމަށްވާ ކްރިސްޓިއާނޯ ރޮނާލްޑޯ އަދި ޓަލިސްކާއަށް އަލް ފީހާގެ ޑިފެންސް ފޫއަޅުވާލެވޭގޮތެއް ނުވިއެވެ. މިހާފުގައި އެޓީމުން 10 ހަމަލާއެއް އުފެއްދި އިރު އޭގެތެރެއިން އަލް ފީހާގެ ގޯލަށް އަމާޒުކޮށްލެވިފައި ވަނީ އެންމެ ހަމަލާއެކެވެ.

އަލް އިއްތިހާދު އާއި އަލް ވަހްދާ ވާދަކުރި މެޗުގެ ފުރަތަަމަ ހާފުގެ 20 ވަނަ މިނެޓުގައި އަލް އިއްތިހާދަށް ލިބުނު ޕެނަލްޓީއަކުން އެޓީމަށް ލީޑު ހޯދައިދިނީ މޮރޮކޯގެ ފޯވާޑް ޢަބްދުއްރަޒަކް ޙަމްދުالله އެވެ. އަދި އޭގެ 10 މިނެޓު ފަހުން އެޓީމުގެ ބްރެޒިލް މިޑްފީލްޑަރު ބުރޫނޯ ހެންރީކޭ ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

މި މެޗުގައި ވަހްދާ އިން ކާމިޔާބުކުރި ހަމައެކަނި ލަނޑު ދެވަނަ ހާފުގެ 69 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރާންސް ފޯވާޑް ޑޭވިޑް ބިއުގުއެލް އެވެ. މިއީ އެޓީމުގެ ފްރާންސް މިޑްފީލްޑަރު އަބުދުލް ކަރީމް ޔޯދާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު މެޗުގެ ކުޅުން ނިމިގެންދިޔައީ 2-1 ގެ ނަތީޖާއަކުން އަލް އިއްތިހާދު މޮޅުވެގެންނެވެ.

މިރޭގެ މެޗުން ލިބުނު ތިން ޕޮއިންޓާއެކު 23 މެޗުން އަލް އިއްތިހާދަށް 56 ޕޮއިންޓް ލިބިފައިވާއިރު، މިރޭގެ މެޗުން ލިބުނު އެއް ޕޮއިންޓާއެކު 23 މެޗުން އަލް ނަސްރަށް ލިބިފައިވަނީ 53 ޕޮއިންޓެވެ. އަލް ފީހާއަށް 22 މެޗުން 25 ޕޮއިންޓް ލިބިފައިވާއިރު އެޓީމު މިވަގުތު އޮތީ ލީގު ތާވަލްގެ  11 ވަނައިގައެވެ. އަދި އަލް އިއްތިހާދު އަތުން ބަލިވި އަލް ވަހްދާ 23 މެޗު ކުޅެގެން އެޓީމަށް ލިބިފައިވަނީ 22 ޕޮއިންޓާއެކު ތާވަލްގެ 13 ވަނަ އެވެ.